Fasnacht
Miini Fasnachtskarriere het bereits als glaine Knopf im Alter vo säggsi aagfange, wo ich in d Fuess-schtapfe vo miim Babbe ha welle schtoo und aafoo drummle. Ich bi denn in d VKB cho, wo mir die erschte Schritt uf em Beggli biibrocht worde sin. Wie jeede Aafänger han au ich die erste paar Fasnachte im Vortraab derfe (miesse) mache, drbyy hät ich doch viil lieber drummlet. Aber dert han ich au scho miesse lehre, dass s drummle nid vo elaige kunnt, und dass me sehr viil iebe muess. So als glaine Binggis fallt das aim nadyyrlig schwer, aber irgendwenn han ich dr Rangg au no gfunde, und ha mer mieh gää, allerdings so wie ich damals gsi bi, soviil mieh wie jeede andere Minimalischt au.
Wo ich zem erschte Mol denne ha derfe mitdrummle, do erscht han ich dr Gaischt vo dr Baasler Fasnacht gschpyyrt, und dä het mi niemeh loosloo. S het sich denne aber irgendwenn au uusegschtellt, dass ich nid wirgglig fyr e Clique geignet bi, und ich lieber unabhängig due Fasnacht mache. Und so sinn die erschte Schissdräggzyygli gryndet worde. Aber laider hän au die sich immer vergreeseret, und denne het's mer maischtens nymme gfalle. Wo me denn emol im Schissdräggzyygli nach ere Fasnacht e GV mit 13 Lyt iiberuefe het, do het's mir wider usghänggt und ich bi gange.
Ai Joor han ich denne gfunde, ich well nymme Fasnacht mache, und bi am Määndig in Zivil in d Schtadt tschienggt zem Luege. Nid lang isch's gange, do bin ich au scho wider mit dräänli in de Auge haimgsegglet, well ich das nid ha kenne mit aaluege, so am Schtrooserand, und so yyberhaupt nid drbyy.
Kurz noch dr Fasnacht han ich denne eme Kolleeg aaglytte wo uf em Waage Fasnacht macht, und han en gfroggt, ob no e Plätzli dert oobe frey seg. Und so han ich mir e Glaikindertraum kenne erfylle. Fasnacht uf em Waage isch nid aifach, im Geegedail, es isch unhaimlich Schtressig, aber es het mer saumässig Schpass gmacht. Aber au numme 4 Joor, und denne han ich gschpyyrt, wie miini Finger noch Schleegel und mii Ranze noch ere Drummle schreie. Und so han ich bim Waage wider mii Usdritt gää, und flissig wider aagfange z iebe. Und wenn me soo lang kai Drummle me aaglänggt het, denn isch dä Iischtiig sagg schwer, aber ich han en gschafft.
Und denne isch si cho, die Fasnacht wo ich zem erschte mol nach langer Zyt wider mit e paar Kolleege due drummle. Genial isch gsi, dass die ganz Fasnacht s Conneli nid vo miinere Site gwiche isch. Und jetzt het si sich drzue entschlosse aafoo z pfyffe, und somit wärde mir nägscht Joor zue zwait go gässle, und die scheenscht Fasnacht erlääbe, wo mer baidi jee erläbt hän. I fray mi druff, und sii sich au. Aber genug der Worte. Jetzt git's no e paar Föteli vo dr Fasnacht. Viil vergniege.
Es sind numme e paar Impressione, ich bi numme uf aim vo däne Bildli druff, mol luege, ob dr's findet...
und das isch mii letschti Fasnacht uf em Waage gsi
Bezugstquellen:
Die wo mi kenne, die hän mi gfunde *gg* isch au nid schwer gsi. Fyr mehr Bildli vo mir an dr Fasnacht, miend iir s 2003 abwarte.
Zrugg zem Baaseldytsche Egge
