En Art Tagebuech

24.07.2002. Packt hani scho zimmli und fertig bini grad au... (hihihi)! Und die blöde Holländer händ etz au nu no ei Nacht zum verlumpe. Falls nid, schtohni morn öppe am Zwei uf em SFO Intl. Airport. Und offesichtlich freut's eu meh als mich...!...
Hütt hani min "alte Kämpfer", de Jeep, gfiglet. Wie me uf em Bildli gseht, hani's bis knapp vor 200'000 Kilometer gschafft. (Ha glaub no nie so en alts Gfährt ghaa!) Aber irgendwie isch mer dä Cheib während dene 19'000 Meile, won ich mit em gmacht ha, e bitzli a's Härz gwachse. Er hätt mi jo au nie versecklet, usser däm einte Mol i de Hills of Tennessee. Und säb hätt sich jo dänn no als e glatts Erläbnis usegschtellt. Aber etz glänzt er wie en Negerseckel (politically schuurig incorrect, hmmm?)...
Mir gönd hütt z'Oobig is "Forbe's Island" sündhaft tüür go fuettere. Aber es isch jo schliessli min letzte z'Nacht i de USA, und do mag i etz au nümme mit schpare aafange... Ha de Ben und d'Keiko iiglade, die sind no nie dött gsii. Und si händ mich jo di letschte Täg au verhätschelet.
22.07.2002. S' Shasta-Wildfire (i de Nöchi vom Käffli "Weed") hani vom I-5 uus chöne knipse. Aber etz händ's grad einigi am tue z'Oregon! S'nöchschti zu de Zippel's isch i de Ortschaft "Ruch", vilicht 20-25 Mls. vo Grants Pass entfärnt.
Am Friitig Morge hani mini beide "Buddies" im Dog Creek Valley dänn ändgültig verloh und bi de 101-er (Redwood Highway) südwärts gfahre. S'händ mer zwar alli devo abgroote, aber ich ha's natürli gliich gmacht. Hätt sich glohnt, die Schtrecki isch vill schöner als de I-5. Aber es sind genau 480 Mls. vo de Zippel's bis zum Ben sim Huus z'Safranisco, und ich ha genau 10 Schtund bruucht... (de Ufewäg hani i 6 1/2 gschafft)! So bini dänn am Friitig Oobig zimmli "verchätschet" aacho und no am gliiche Tag is Bett!
Am Samschtig hani de Ben und d'Keiko zum Fondue im "Matterhorn" (2323 Van Ness Ave., SFO) iiglade. Sauguet, grossi Uuswahl (9-erlei Chäsfondue sowie Chinoise und Bourgignonne) aber d'Ländlermusig "sucks"... Item, die beide händ de Plausch gha und de Priis hätt mi einigermasse im Rahme tüecht, usser em Fendant für 31$!
Geschter hani de (hoffentli) letscht Trip i's Amoeba gmacht und bi natürli wider mit 9 CD's usetappet. De Richard hätt mer es paar alti "Must Have"-Blues-Schiibe ufgschribe und die hani mer no gholt. Etz sötti dänn no in en Outlet go Klamotte und Schue poschte. Und dänn hani no im Sinn, de Jeep optisch echli här z'richte (a so called "Puure-Bländi"), damit en de Ben rasch- und tüürmöglichscht cha vertschutte. Und dänn warti eigentli nu no uf de Donschtig (vilicht verlumpet jo d'KLM no bis dänn...?...).
18.07.2002. Jedefalls hämmer wider e zimmlichi Gaudi, do z' "East Bumfucking Egypt" (da isch de Fachuusdruck für es Gebiet, wo sich Füchs und Hase guet Nacht wünsched)...!...
Vorgeschter hätt mi de Richard a'd "Jackson County Fair" mitgnoh, bi üüs wür me da als en Art Chilbi bezeichne. Wa mi am meischte erschtuunt hätt, isch die hochkarätig Lischte vo Musiker, wo do i de Provinz ufträtted: Nitty Gritty Dirt Band / Tracy Bird / Neville Brother's und ähnlichi! Z'Nashville müesstisch für so es Konzärt en sichere 40-zger Iitritt zahle, und do schpiled die Guys "for free"!
Geschter bini mit em Conroy und sim Fischerboot uf em Rogue River gsii go fische. Mer händ zwar nüüt gfange, aber scho im Lauf vom früene Nomittag e zimmlichs "Damerüüschli" ghaa... Ich bi etz de "King of Salad-Fishermen", will a minere Angle dauernd Alge (oder suschtigs Grüenzüügs) ghanget isch. Jenu, me cha jo d'Fisch au im Safeway poschte!
Das Bildli vo dämm Wildfire hani am Ufewääg, i de Nöchi vom Mt.Shasta, gschosse. Aber si händ etz grad mehreri am Bränne, elei do i de Nöchi drüü Schtuck.
14.07.2002. Wäge Oregon: De Ben hätt mer en guete Deal miteme Rental-Car chöne mischle. Für knapp 40$ im Tag en Dodge Stratus mit "unlimited miles", do hani jo müese zueschloh. Ich ha, für en ähnlich's Gfährt, letscht Johr öppe s'dopplet zahlt...
So fahri am Mäntig morge biziite los und chume am Donschtig (evtl. am Friitig) uf SFO zrugg. Obwohl i mer nid rächt cha vorschtelle, warum: Mini zwei "Buddies" im Wald usse händ e Schiiss-Freud wäni nomoll ufechume. Und z'Safranisco hani während mine 10 Wuche Schuelziit halt würkli scho zimmli alles gseh und gmacht. Cha jo schliessli nid jede Tag is Amoeba go CD's poschte, da wär min sichere Ruin...
Geschter hätt mi de Ben zu sinere "Shooting Range" (Schüssplatz) mitgnoh. Dött hani (s'erscht mol im Läbe e Handgun gschosse) mit sinere Beretta-9mm-Pistole öppe 50 Schuss fürepfäfferet. Und, glaubsch es nid: De Ben hätt i de letschte Rundi's Bier verlore, wo mer uusgmacht händ! (Aafängerglück...) Hätt mer natürli en Sau-Spass gmacht!
Und am Oobig hämmer e genials Rezäpt vo sinere Mueter (isch vo España) uusprobiert: Bacalao (Stockfisch) uf baskischi Art. Mer sind zwar bim choche fascht verhungeret (goht öppe 3 Stund...), aber s'hätt sich glohnt. Lecker, lecker!
So, etz fangi dänn langsam aa, e Reisetäsche für morn z'packe. De Ben und d'Keiko gönd hütt nomittag es Musical go lose ("Mamma Mia", mit luuter ABBA-Songs), und mer händ leider für mich käs Ticket me überchoo. Aber s'isch jo zum Glück nid eso, dass i mit ABBA früener z'churz cho wär...
10.07.2002. Geschter hani s' ultimativ Kontrast-Programm erläbt: Bi uf em Einer (Highway Nr.1) duruufgfahre bis Point Reyes. Underwägs hani vo 15 Grad (C.), a de Küschte, bis 40 Grad (C.) z' San Rafael alles erläbt. Momentan händ's e Hitzewälle do z' Nord-Kalifornie. Sobald vom Wasser ewäg gohsch, schwümmsch im eigne Saft! Uf hütt händ's Höchscht-Temp's bis 108 Degrees (42 C.) aakündiget! So hani beschlosse, ich bliibi halt echli i de Nöchi vo de Bay...
So, und etz no s'verschprochni Schluss-Fazit:
List sich guet, hmm? De Jeep hätt aktuell öppe 19'000 Meile meh, als wonen übernoh ha. Und etz git's natürli no einigi dezue. Ich rächne, dasi insgesamt mit beidne Gfährt uf e Strecki vo öppe 60'000 Km chume.
Etz haui's aber uf'd Pischte. Hütt z'Oobig hani de Ben und d'Keiko zum z'Znacht iiglade. Und noch em Dinner gömmer echli um'd Hüüser, eventuell in Tenderloin-District abe (mini "alt Heimet"...).
07.07.2002. D'Abgoob vom RV isch erschtuunlich problemlos verloffe! Die Type händ gseit, si heged Gfährt noch drüü Wuche zruggüberchoo, wo vill schlimmer uusgseh heged, als mine noch 10 Monet. Da hani natürli gärn ghört und als Komplimänt uufgfasst. D'Fränzi hätt de Plausch a mine düütsche Büecher ghaa und de Paul a de Fläsche Wii und de vorige Michelob's im Chüelschrank...
San Francisco hätt mi dänn mit em üebliche Summer-Fog und de entschprächende Temperature empfange... Ha z'mitzt uf de San Mateo-Bridge müese d'Jagge aalege und di churze Hose hani scho z'underscht im Koffer verschtaut...
Bim Ben bini lässig empfange worde! D' Keiko hätt am erschte Oobig e wunderschöns japanisches Menü gmacht, und geschter hätt de Ben uf Spanisch gwüetet: Tortilla und Jamon de Tomates.
Und am Nomittag simmer sim sältsame Hobby nohgange: De Ben chunnt öppe imene Monet e Immobilie-Händler-Lizenz über (er isch jo glärnte Attorney = Rächtsaawalt) und so goht er jede Sunntig die "Open-House's" (Immobilie-Verchäuf) go schtudiere. Mer sind 4 Objäkt go aaluege, und säb chasch mer glaube: Ab däne Priise bini schier uf de Arsch gheit! So choscht (zum Biischpil) e viktorianisches, 2-stöckigs Huus vo 1896 (e sogenannti "Painted Lady"), anere 2.klassige Laag (Potrero Hill) lockeri 960'000$...!... Und es (sensationells) "Loft" inere ehemalige Fabrik-Ligeschaft chunnt uf 595'000$! Ich froog mi, wie da öpper cha zahle! Aber schiins sig SFO, näbscht Manhattan (New York) s'tüürschti Pflaschter vo de ganze USA.
05.07.2002. De Mt.Shasta isch öppe 14'200 Ft. (4'330 m) höch, en erloschne Vulkan. Di letscht Eruption sig 1789 (oder so) gsii, und me weis nid rächt, wänn er di nöchscht planet hätt. Jedefalls hätt er sich, nätterwiis, i de letschte Täg nid gmolde...
A ne Independance-Day-Parade bini nid gange. Da, woni de ganz Tag im Radio ghört ha, hätt mer völlig glanget! Do chönnt sogar es Ross patriotisch wärde... Sind natürli alles no Folge vo dämm 11. Septämber!
Etz fahri dänn glii uf Stockton füre, dött hani geschter en "Truck Wash" gfunde. Ha die Chischte öppe vor 2 Mönet (z' Salt Lake) s'letscht mol gwäsche. Chasch der vorschtelle, wie guet dass si uusgseht... Aber bi dere Bullehitz (+/- 100 Degrees) freut's mi gliich nid eso rächt!
D'Rückgob isch morn vormittag, z' Hayward (bi Oakland). Luschtig: Das Girl (Fränzi Pirren), wo letschte Oktober no bi Moturis gschaffet und mer d'Chischte übergäh hätt, isch etz bi dere Firma, woni d' Rückgob mue mache.
Nochhär fahri (mit em Jeep) zum Ben übere und richt' mi dött hüüslich ii. Eventuell machi nomoll en Trip uf Oregon ufe, zum Richard & Conroy. Die händ mi scho wider iiglade... Mol luege!
03.07.2002. Ich bi vorgeschter (äntli) Richtig Mount Shasta abegfahre und ha geschter z'Nacht mit em Ben und de Keiko e zimmlich uusgibigi Party gfiiret. De Ben hätt e Fläsche irische Whiskey mitbroocht, und dänn hämmer natürli es Wettrüschte gäge Jack Daniel's veraaschtaltet. Old Jack won...!... Und hütt hani defür während 270 Meile min Hangover (Kater) pflegt...
Ha eigentli wele uf em Sacramento-KOA di letschte vier Tag verbringe, aber wäge dämm blöde 4.Juli (Independance Day) isch es zimmli prekär, uf eme Camingplatz e Site z'überchoo. Dä Tag isch für vili Ami's en Familie-Türgg, und für das isch en Campground natürli prädeschtiniert. Und zudämm fönd etz für vili d'Summerferie und d'Reisesaison aa. (De Conroy wür etz wider säge: "That's why god invented the tourists"!)
Ha aber, noch es paar Telefon, uf em Stockton-Lodi KOA no es Plätzli chöne ergattere. Ich wür de 4.Juli vermuetli mit Putze vo mim Motorhome verbringe, so quasi als mini persönlichi "Unabhängigkeits-Erchlärig"... Aber vilicht gangi mer au e Parade go aaluege. Die sind wohrschinli das Johr no en Räschte patriotischer, als suscht.
28.06.2002. Wäge dämm Vorfall vom Määntig: Ich ha (zu Hande vom Conroy Zippel sinere Firma) es A4-Siitigs Statement über dä Vorfall gschribe, aber s'hätt nüüt gnützt. Si lönd nid mit sich rede.
Aber geschter z'Nacht (wo mer am BBQ uf de Porch ghocket sind) hätt en Kapitäns-Kolleg vo imm aaglüte und verzellt, geschter heged's (uf einere Fahrt, wohlgmerkt!) ein Härz-Infarkt, en Beibruch und e kabutti Maschine ghaa! De Conroy hätt zimmli cool bemerkt: "Zippel's Curse...!..." Und uf das abe hätt er meh als en Liter Wodka nidergmacht...
De Richard hätt mer en Kolleg vo ihm wele vorschtelle, wo e Gold-Mine betriibt. Mer händ en aber leider nid aatroffe, und er hätt mi gwarnt: Gang uf kän Fall elei und ohni Vor-Aamäldig in e Mine ine, die Miner's verschtöged absolut e kä Spass, wänn's um ire Claim göngi. Es chönnt der schiins liecht passiere, dass' der e Ladig Schrot uf de Pelz brännt würt...
De Richard hätt mer geschter nomoll es Päärli vo sine beschte Kollege vorgschtellt, de Gary und d'Carrol. De Gary isch 65-zgi und hätt über 40 Johr Profi-Musik gmacht. (En luschtige Zuefall: De Ben / de Richard / de Gary schpiled alli Bass-Guitar! Ob ächt da öppis z'bedüüte hätt?)
Die Bildli, woni gmacht ha, chönd der leider nu en winzige Bruchteil vo dämm vermittle, wie's bi däne dehei uusgseht. Si läbed (wörtlich) imene "Home-Grown-Paradise", mit Lamas, Reh, Pfaue, Esel, Fisch (sogar Stör!), Papageie, Hünd und wa weis ich no alles, zäme. Unbeschriiblich! Und wildi Mountain Lions (Pumas), wo iri Tier riissed: De Gary liebt si alli...!...
Und im erschte Stock vom Huus hätt de Gary es "State of the art"-Tonstudio. Da lauft der im Fall iis-chalt über de Rugge, wänn de Opa Gary und sin Änkel Ike und de Richard e Jam-Session mached: S'Feeling, wo die Type händ, chame nid beschriibe, da mue me eifach ghöört haa...
So, hütt gömmer wider uf'd Leutsch, Richtig Pacific-Coast. I de Gägend vo Agness mües es au no Kollege vo de Zippel's haa... Und ich cha mer eifach immer no nid erkläre, warum dass die mich alli innert 10 Sekunde als "Friend from Switzerland" bezeichned...
25.06.2002. So, etz simmer also uf dämm 5-Schtündige Trip uf em Rogue River gsii. Chasch es eigentli i eim Uusdruck zämefasse: ATMG! (Affen-Titten-Mega-usw.)...
Das "Bootli" hätt drüü gueti, alti, gussiiserni Chevy's under de Huube, mit (zäme) 1050 Horses, wo chräftig poldered und schaffed... Chasch der das Feeling vorstelle, wänn'd mit bis zu 50 MpH (80 Km/h) über die Strom-Schnelle flüügsch? Oder de "Rogue-Three-Sixty", en Ortslänkig us vollem Tempo? S'isch en Art wie Ballett-Tanze... Voll Guet, aber leider nid "fotogen", will'd pflotschnass würsch und d'Kamera da vermuetli nid eso würdi schätze.
Am letschte "360"-er isch es dänn au würkli passiert: S'Boot hätt irgendwie aaghänkt (vermuetli e Heckwälle vomene andere Schiff), de Conroy und mich (ich bi natürli bim Captain hinne gschtande, will i dött ha chöne rauche) hätts überschlage und eine vo de Passagier isch über Bord! S'isch wiiter nüüt passiert, mer händ dä Typ wider is Boot inezoge und är hätt (noch de ganze Aktion) au wider möge lache, aber em Conroy sinere Karriere hätt's en zimmliche Knick versetzt: Si händ en (noch 16 Johr!) geschter no frischtlos entloh...!... S'Problem isch schiinbar, dass de Rogue River (will er in Pazifik füehrt) under de Uufsicht vo de "US Coast-Guard" schtoht. Und die heged schiins keinerlei Humor...
Jenu, de Oobig hätt dänn imene zimmliche Abschturz g'ändet. De Richard und ich händ de Conroy wider echli wele uufbaue, aber es isch üüs (verschtändlicherwiis) nu bedingt glunge...
Aber mir gfallts i dämm Kaff (mit so vill Action...) eso guet, das i etz beschlosse ha, de "Eureka"-Umwäg uuszloh und no zwei Tag länger bliibe.
Hütt goht's wider is Hinderland, de Richard kännt irgend en Gold-Miner (sind fascht alles Ex-Hippies, wo i de 60-er Johr dohäre choo und hangeblibe sind...) wo üüs eventuell sini Mine zeiget... Scho wider Action!
24.06.2002. Ich ha vorgeschter wider emol en Glücksgriff gmacht: Bi uf de "Grants Pass KOA" überegfahre, will mer de Mount Shasta z'nöch gsii isch (wott jo nid fascht 10 Tag dött hocke, bis de Ben chunnt). Und woni am Oobig is Schpüntli (Aunt Mary's Place) grad näbedraa bi, hani (näbscht eme scheussliche Abschturz) zwei ganz knurrligi Type känneglernt: De Richard und sin Brüeder. De Rick isch 55-zgi und Bruefsmusiker gsii und hätt vor 5 Johr en Art Leukämie überchoo, wo's aber mit Chnochemark-Transplantation händ chöne kuriere. Aber will er bis hütt no nid wider cha schaffe (und drumm Ziit hätt), hätt er mer offeriert, er zeigi mir es paar ganz spezielli Plätzli do i de Region. S' Huus (e sensationelli Loge!) vo dene beide Brüeder isch öppe 5 Kilometer imene Wald usse, du chämtisch nie im Läbe druuf, dass do hinne no öpper wohnt! Und so simmer geschter Nomittag an es "Swimming Hole" am Straight Creek gfahre, de totali Kitsch! Kristallklars (aber sauchalts) Wasser und Natur pur! Und dänn grad wider es Erläbnis: Öppe 10 jungi Type, alles Firefighters, sind iitrudlet und mer händ e Sau-Gaudi mit däne ghaa! Aber wa mi echli erschüttert hätt: Am Donschtig mue de ganz Trupp uf Colorado a die Mega-Waldbränd. Wär weiss, ob ächt alli wider heil heimchömed? Wo de Richard zum Abschied jedem einzel d'Hand gschüttlet und em alles Gueti gwünscht hätt, hani öppe es verdächtigs Glitzere imene Aug gseh...
Übrigens hani etz us "erschter Hand" ghört, wa die verheerende Waldbränd uusglöst hätt: En Aagschtellti vo de lokale Forst-Verwaltig...!... Si hocki i de Chischte und mües mit bis zu 30 Johr rächne...
De Brüeder vom Rick isch Captain vomene Jet-Boat uf em Rogue River. Törfsch drüü mol roote, wo mer hütt häregönd...
Jenu, ha halt nomol en Tag uf em KOA buechet. Eigentli hani no wele über Eureka go chehre, aber de Rick hätt gmeint, ich söll doch de säb Egge eifach uusloh und no es paar Tag doobliibe. Warum nid? Jedefalls isch mer dä Typ voll sympathisch. Und über Musig chasch schtundelang mit em laabere, Blues und Country isch genau sini Wällelängi... Und är cha sogar einigermasse Dütsch!
20.06.2002. Will er jo i de CH schiins e Prachts-Hitzewälle erläbed, hani tänkt, ich schicki hütt no es paar Schnee-Bildli zur Abchüelig...
Bi sit geschter uf em Klamath Falls KOA, öppe 10 Mls. vor de Californian Border. Hütt hani en Chehr zum "Crater Lake National Park" gmacht und bi äbe prompt im Schnee glandet. Das ganz "Oregon Central Valley" isch es vulkanisches Gebiet (teilwiis aktiv: Mount St.Helens!) und liit zwüsche 1000 und 1500 Meter ü.M. Dä Crater Lake hätt etz mit Abschtand s'kitschigscht Blau, woni scho je imene See gseh ha. D'Foti cha die Farb leider nu abgschwächt widergäh. Wunderschön!
Will de Tank vom RV läär isch, hani tänkt, ich güggsli no schnäll ännet de Gränze, wa de Sprit choscht: 2,09$ für d'Gallone! Bi dänn sofort reumüetig wider uf d'Oregon-Siite übere und füll halt morn do änne uuf, für 1,55$!
18.06.2002. Ich hocke etz de dritt Oobig uf em Sisters/Bend KOA und züche morn a di kalifornisch Gränze abe, uf Klamath Falls.
Oregon isch leider kä uusgeprägti "Cowboy-Zone", si händ zwar scho zimmli Landwirtschaft do, aber d' Forst-Wirtschaft dominiert klar. "Logging" isch do obe di füehrend Industrie. Und so trüffsch z'Oregon wohrschinli eher en Holzhacker-Wettschtriit, als es Roedo. Aber vilicht ghei i jo gliich no über eis ine?
Tüecht mi no härzig: Uf eim vo de Pic's, woni gschickt ha, sind "The Three Sisters" druff. Und, i gebührendem Abschtand, schtoht de "Mount Bachelor" (=Junggsell). Do obe wüssed d'Junggselle äbe no, wa sich schickt! (dä Feigling... hihihi)
15.06.2002. Bi hütt nomol uf d'Suechi vo dene blöde Holzbrugge. Also säb cha der säge: Die Cheibe findsch nid eifach eso, au mit ere spezielle Landcharte muesch zimmli im Gaggo umeturne, bis d'fündig würsch! Gemäss mim Buech git's i dere Region 34 Stuck, und ich ha (mit Müeh) imene guete halbe Tag (ohni vorgeschter!) nu 7 devo gfunde...Guet, ich nime aa, si weled gar nid eso en Riise-Rummel um iri "Covered Bridges" mache. Vermuetli wäred 1000 Autos im Tag de beschlüünigt Todes-Stoss für eso nes Ding... Aber die Cheibe sind würkli härzig, e gwüssi (ganz spezielli) Romantik händ's jedefalls. Si sind übrigens gar nid eso alt, wie ni zerscht tänkt ha: Di meischte sind um 1930 ume baue worde. Und vermuetli isch iri Lag im Backcountry au de Grund, dass s' nid abgrisse und dur grösseri (und schtärcheri) Beton-Brugge ersetzt worde sind.
No schnäll zu dene "Railroad Trestles" (isch irgendwie so e typisches Wildwest-Motiv, findsch nid au?): Die Brugge sind eigentli als Provisorium tänkt gsii, schnäll baut, damit d'Isebahn hätt chöne fahre. Eigentli hett me dänn schpöter das Holz-Grüscht mit Erde und Schotter zu richtige Isebahn-Dämm söle uffülle (ufschütte). Etz sind aber vill vo däne RR-Companies eso schnäll verlumpet, dass es hütt no öppe eine vo dene Trestles z'gseh git. Eigentli es Glück, hmm?
13.06.2002. Da vo de Sprit-Priise isch scho eso, jede Staat leit d'Stüüre für's Benzin sälber fescht. Eso langsam sött i mi jo a di Fürz (bi üüs wür me "Kantönli-Geischt" dezue säge) gwöhnt ha, aber es verwunderet mi gliich immer wider: z.B. hätt's z' Oregon käni Sälbschtbedienigs-Tankstelle, Montana kännt keis Tempo-Limite uf de Interstates, usw.usf.
Etz no churz vo minere geschtrige Tour: Ich bi 305 Mls. (knapp 500 Km) gfahre und ha im Lauf vom Nomittag s'Verdeck vom Jeep wider zuegmacht, will's mer z'heiss worde isch...!... Uf eme Wärbeschild z'Salem hani 96 Degrees (35 C.) gläse. Und so hani wenigschtens chöne am Schatte hocke...
Und glaubsch es nid: De Murphy hätt mi iiwandfrei um sämtlichi 34 Holzbrugge (gemäss mine Underlage) umeglotst. Ha's erfolgriich gschafft, kä einzigi z'finde! (Erinnert di da a'd Suechi vomene Food-Store z'Houston?) Aber d' Fahrt isch trotzdäm wunderschön gsii, woni am achti wider z'Astoria aachoo bi, hetti grad no es Schtündli oder so chöne wiiterfahre. Aber bi dänn gliich under d' Duschi und ha e prächtigi Dräck-Chruschte abgschpüelt...
Aber wart nu, em Murphy chochi's scho no: Ha im Sinn, uf em Albany-KOA eine oder zwei Tag z'verbringe. Und dänn bini ganz i de Nöchi vo dene blöde Brugge! Wär doch glacht...
S' Pic "Oregon Coast 2" zeiget übrigens s' Wrack vo de "Peter Iredale", emene änglische 3-Master, wo 1906 do uf Grund gloffe isch. D'Mündig vom Columbia River in Pazifik isch au hütt no eini vo de gfürchtetschte Schiffs-Passage, si säged dere Zone "Graveyard of the Pacific". Schiins liged über 2000(!) Wracks uf em Meeresbode und über 700 Seelüüt heged do s'Läbe gloh. Luschtig: Im Juni 1942 hätt e japanisches U-Boot (hätt sich vermuetli verfahre...) es paar Schüss uf's Fort Stevens abgfüüret. Da isch s'erscht mol sit 1812 gsii, wo'd USA uf eignem Territorium vonere fremde Macht aagriffe worde isch! Hätt ene natürli en zimmliche Schreck iigjagt, aber suscht sig wiiter nüüt passiert.
11.06.2002. Natürli bini uf em Astoria/Seaside... Isch en ganz schöne Platz und da, was si als "Deluxe-Site" bezeichned, isch eifach en Full-Hookup mit Cable-TV und Phone-Jack...
Und mini Vermuetig betr. Gift und Gas hätt sich au bewohrheitet! Ha s'RV gfüllt für 1,43$ d'Gallone (gägenüber 1,60 und meh z' WA) und für d'Stange Gift hani 25,80$ (inkl. Tax) grumplet. U da fröit eim!
No churz öppis über Astoria: Das Kaff isch 1811 vom (dännzumal scho) Millionär Johann Jacob Astor (us Walldorf / D) gründet worde. Sini Idee isch gsii, vo do uus alli Fäll und Pelz us em ganze Nordweschte vo de USA zämezchaufe und noch Asie z'verschiffe. Dött heged's uf da Züüg gschpunne und Höchschtpriise zahlt. Aber bereits noch 1 1/2 Johr heg er sin Handelsplatz am Columbia River de Britische Hudson Bay Company verchauft und sich de Hotellerie zuegwändet. Dött hätt er offesichtlich meh Erfolg ghaa: Seit der de Name "Waldorf Astoria" öppis?
Morn haui's gen Süde uf'd Leutsch. I de Gägend vo Albany / Stayton gäbi's schiins en Siech voll vo däne schöne alte, teckte Holzbrugge.
Und hütt git's früschi grüeni Schpargle und e blöds Filet dezue...
09.06.2002. Vo de Waldbränd hani im TV gseh und ghört. Etz grad händ's vo Colorado brocht, de Gouverneur heg de ganz Staat zum Notstands-Gebiet erchlärt. Häsch da scho emol ghört, dass en Brand us de Ärde cha entschtoh, also vo underirdisch (schiins wäge Chole)?
Do, z' Washington, isch überhaupt nid d'Red vo Trocheheit, im Gägeteil! Bi hütt im Olympic National Park umeturnet und ha tatsächlich Rägewalder gseh! Die hetti jo überall i de Trope gsuecht, aber nid eso höch im Norde. Bi natürli us luuter Freud grad no (z'Fuess...) drinn umetappet und ha gschtuunet. Da chunnt der vor, wie imene verwunschne Wald us em Märli! Über d'Rägewälder im Olympic Natl.Park schriibed's: "...What defines a rain forest quite simply is rain -lots of it... precipitation here ranges from 140 to 167 inches (355 - 424 cm) a year...the mountains to the east protect the areas from severe weather extremes...seldom does the temperature drop below freezing in the rain forest and summertime highs rarely exceed 80 degrees..."
S'Wätter isch wider prächtig und sött bis Ändi nöchschter Wuche eso bliibe. U da fröit eim! Bi etz de zweit Tag uf em Port Angeles KOA, a de "Strait of Juan de Fuca". D' Gränze zwüsche Kanada und de USA lauft i de Mitti vo dere Meer-Ängi dure, also nu öppe 10 Meile vo mir ewägg.
Morn züchi wiiter, no ganz um d' Peninsula ume und bis vor'd Gränze zu Oregon (hoffe immer no, d' Zigi siged dött billiger...).
07.06.2002. Hütt bini nomol echli i de Stadt umeturnet. Ganz lässig: De "Pike Place Market"! Da isch urschprünglich en Läbesmittel-Märt gsii, aber hütt findsch dött fascht alles, wott der nu chasch vorschtelle. Sehr zum Gaudi vom Publikum wörfet sich d'Fisch-Verchäufer gägesiitig öppe so nen glitschige Siech zue, aber mit ere unglaubliche Reaktion chönd's es fange! Ha jedefalls keine gseh, wo an Bode gheit isch! Dä Märt goht bis zu 3 Stöck in Undergrund, und da isch etz d'Überleitig zunere ganz inträssante Sach: "Underground Seattle".
Di erschte Sidler händ sich 1851 uf eme winzige Inseli, schlammig und lehmig, niderloh, em einzige flache Terrain wo's gfunde händ. Di iiheimische Indianer (de Chief hätt übrigens "Seattle" gheisse) heged sich deswäge kugled vor Lache! Bi Ebbe sig's es einigermasse ahnsehnlich gsii, aber bi Fluet isch es uf'd Flächi vo drüü mol zwei Hüser-Blocks zämegschrumpft. S'einzig Inträsse, wo di Wiisse gha händ, isch de schnäll Dollar gsii, wo's mit Holzschlag händ wele mache. Mit Sagmähl (chasch der jo vorschtelle, wa da für en guete Baugrund git...) händs em Wasser Quadratmeter um Quadratmeter abtrotzt, zum d'Schtadt z'vergrössere. D'Schlammlöcher sind so gross worde, dass me ne Näme gäh hätt! Aber wo 1887 d'Schlagziile vo de Ziitig gheisse hätt: "10-Jähriger beim Spielen auf der Hauptstrasse ertrunken!" und d'Stadtregierig a de Chrüüzige Schwümmweschte ufghänkt hätt, isch s'Image vo Seattle zimmli ramponiert gsii. I dämm Johr händ's au e Volkszählig gmacht und feschtgschtellt, dass 10% vo de Bevölkerig jungi, ledigi "Dame" gsii sind, wo alli im gliiche Block gwohnt händ und als Pruef "Näherin" aagäh händ. Binere gnauere Überprüefig hätt d'Stadt allerdings kä einzige Nähmaschine gfunde... Si händ dänn dene Madels e zimmli höchi Stüür uuferleit, wo di nöchschte Johr 87% vom Budget vo Seattle iitreit hätt! Aber s'allergröscht Problem isch gsii, dass'd Toilettene zweimol im Tag (bi Fluet) rückwärts gspüelt händ! De Druck sig mängmol eso höch gsii, dass es zwei Meter höchi Fontäne i de Schiishüsli gäh heg! Aber geschter vor 113 Johr hätt sich s'Problem glöst: Am 6.Juni 1889 isch Seattle total abebrännt. Am andere Tag händ's e Freiluft-Versammlig abhalte (zwangsläufig, will käs einzigs Huus me gschtande isch...) und beschlosse, si müesed's Terrain erhöhe, bevor's d'Stadt neu ufbaued. D'Stadtregierig hätt d'Idee ghaa, dä 60 Meter höch Hügel im Oste abzträge und mit dämm Dräck de Baugrund ufzfülle. De Gschäftslüüt hätt da zwar iiglüchtet, aber si händ nid wele 6-7 Johr warte, bis si iri Hüüser wider händ chöne ufbaue. So händs bereits am nöchschte Tag, am 8.Juni aagfange, z'baue. Und si händ irne Hüser zwei Iigäng gmacht, eine uf em alte Niveau und eine im erschte Schtock. Und d'Stadt hätt, zwüsche parallelle Stützmuure, d'Schtrosse um em Niveau vo de erschte Etage baue! Und im Hohlruum dezwüsche händ's d'Wasser- und Abwasserleitige chöne verlege. I eim Johr heg's 18 tödlichi Unfäll gäh, will Bsoffni ab de Leitere gheit siged, wo's a a de Übergäng uufgschtellt händ... Und mit de Ross isch es au echli schwirig gsii, die heged eifach nid uf'd Leitere wele! Und hütt chame äbe e (gfüehrti) Tour uf em alte Schtrosse-Niveau mache und die ehemalige Huus-Iigäng aaluege und uf de alte Trottoirs laufe...!...
Die Tour chani würkli jedem Bsuecher vo Seattle nu empfähle, eso öppis inträssants und luschtigs ("Dirt, Corruption, Sewers and Scandals" heisst's im Buech vom Bill Speidel, wo hütt no us de Klassezimmer vo Seattle verbannt isch / aber s'meischt-gschtolni Buech i de Stadtbibliothek...) hani glaub uf minere ganze Reis no nid aatroffe!
06.06.2002. Wini jo geschter scho aakündiget ha, bini hütt s' BOEING-Wärk z'Everett go aaluege. Cha nu säge: "Very impressive!" Die Halle isch tatsächlich fascht unvorschtellbar gross! Wägem Foti-Verbot häsch natürli (wider emol...) rächt ghaa, ha aber s' "Pfürzli" gliich für es paar Schnappschüss chöne bruuche. En Idee vo de Grössi chunnsch über, wänn'd di winzige Auto vor eim vo dene 6 Tor aaluegsch. S'isch s'gröscht Gebäude vo de Wält, vom Volume här gseh. Wa meinsch zu 13,3 Mio. Kubikmeter? Oder zu 39,8 Hektare under eim Tach? Oder zu 2'142 Eifamiliehüser, jedes mit 185 Q-Meter Umschwung? Jedes Tor isch härzigi 107x27 Meter gross... Etc.etc., si höred fascht nüme uuf mit de Superlativ! Baue tüend's übrigens 3 Type i dämm Trumm, d' 747-400 (Jumbo), d' 767 und d' 777.
Vilicht no en churze Abriss über'd Firma: De William Boeing isch 1908, als 22-jöhrige, uf Seattle cho und hätt es Vermöge mit Wald-Grundstück (um Grays Harbor) verdient. Er hätt sich dänn für 10$ (!) e Bootswerft kauft, vo churz vor em Konkurs gschtande isch, di ominös "Red Barn". Obwohl er erscht im Johr 1915 s'Flüüge glernt hätt, isch er vo de Aviatik völlig fasziniert gsii. Im Johr 1917 hätt er 28 Aagschtellti ghaa und ganzi zwei(!) Wasserflugzüüg baue. Wo dänn Amerika in erschte Wältchrieg iiträtte isch, hätt er sin erschte Vertrag mit de Army, über 50 Flugzüüg, im Sack ghaa.
E luschtigi Episode rankt sich um sini gröscht Business-Fählentscheidig: 1933 isch er Bsitzer vo "United Airlines" gsii. Und i dämm Johr hätt er s'erscht "richtig" Passagierflugzüüg uf de Markt brocht, s' Modäll B247. Und will er (verschtändlicherwiis) sini eige Firma hätt wele berücksichtige, sind di erschte 60 Maschine a "United" gange.
Allerdings hätt d'Firma TWA au 20 Flüüger vo dämm Typ wele, und isch nid innert vernünftiger Frischt beliferet worde. So hätt de Bsitzer vo TWA, de Jack Frye, bi sinere Konkurränz (Douglas Aircraft) aagfroget, und die händ em d' DC2 offeriert. Us dämm Typ isch schpöter di legendär DC3 worde, s' meischtverchauft und zueverlässigscht Flugzüüg i de ganze lange Gschicht vo de Flüügerei. 1939 sind 83% vo allne Verchehrsflugzüüg i de USA DC3 gsii! De "Bill" Boeing heg sich s'ganz Läbe lang ufgregt, wo'n er di monatliche Verchaufszahle vo Douglas gseh heg...
E nätts Wolchebrüchli hani hütt no durfahre (natürli ohni Siite- und Heckfänschter am Jeep), siehe Föteli. Guruguru...
05.06.2002. Ich bi hütt z'Seattle iigfahre und ha uf em "Seattle-South / Tacoma KOA" emol drüü Nächt buechet. Wani bis etz vo de Stadt gseh ha, isch vilverschprächend, wa me allerdings vom Staat Washington nid cha säge: De Sprit isch sautüür und für e Stange Camel hani imene Tobacco-Discount 35,99$ abtruckt! (De regulär Priis isch 46,99...) Zum Glück hani s'RV no z'Idaho ufgfüllt und mit em Rauche hebi etz au schuurig zrugg und hoffe, z' Oregon sig da Züüg wider billiger...
Übrigens: Uf em Bildli "Seattle 4", da ännet em See isch Redmond (Microsoft). Weiss gar nid, ob i no söll überefahre und em Bill en chräftige Tritt in Arsch gäh (für alli Abschtürz sid em Windows 3.11 und no eine prophylaktisch für alli Zuekünftige...)
Morn teered's uf em KOA dä Wäg vor mim RV. So mueni an Morge biziite use und dänn fahri emol uf Everett ufe und luege, ob i das "Boeing"-Schöberli finde, wo's d' "747" zämenagled. Müesst eigentli scho, will s'sig schiins di gröscht Halle vo de Wält...
03.06.2002. Vo Missoula chani leider nid eso vill prichte, wie ni gmeint ha: Erschtens isch's Wätter truurig gsii, s'hätt pisst was hätt abemöge. Und dänn sind am 1.Juni d'Semeschter-Ferie losgange. Die zwei Faktore wärded dezue biitreit ha, dass eigentli gar nid vill los gsii isch am Samschtig Oobig. De Norman Mailer hätt i eim vo sine Büecher gschribe "...the town with the best bars in a state of great bars..." und ich bi i drüüne gsii, im "Top Hat", im "Union Club" und im "Dinosaur Cafe". Im zweite händ's e Country-Band ghaa, aber s'hätt mi nid schpeziell vom Hocker grisse! Jenu, es paar Pirr hätt's dänn scho no möge gäh...
Woni hütt am Morge ab- und aaghänkt ha, hani defür mit zwei "Hörni's" Bekanntschaft gschlosse. Die zwei sind offesichtlich no zimmli jung gsii und überhaupt nid schüüch! Normalerwiis chasch die Viichli jo nid aalange, aber dene hätt's etz gar nüüt uusgmacht.
Chum bini losgfahre, händ's (zum Glück) wider am Wätterschalter trüllet! Etz bini uf em Coeur d'Alene-KOA (Idaho), en ganz härzige Platz diräkt am Seeufer. Bi natürli hütt Nomittag scho uf em "Scenic Byway" um de See umegfahre... Wunderschön! Übrigens, dä luschtig Name (Ahle-Härz) händ französisischi Trapper dämm Indianerstamm dozmol gäh, will die Sieche bim Handle bockhärt gsii siged und eso schpitzig grächnet heged!
02.06.2002. Also, etz no d'Erlüüterig zu dämm EBR1: Das Gländ, wo dä Reakter drin schtoht, heisst I.N.E.L. (Idaho & National Engineering Laboratories), isch 890 Square-Miles gross (=2305 qkm, zum Vergliich: De Kanton Thurgau hätt 991 qkm) und schtoht im "Sagebrush-Desert" vo Idaho, öppe e Schtund weschtlich vo Idaho Falls. Uf dämm Riise-Gländ händs natürli no es paar ganz heissi Ise im Füür, wo allerdings "Top Secret" und nid zuegänglich sind, z.B. "ATR / Advanced Test Reactor", "BNCT / Boron Neutron Capture Test", "NRF / Naval Reactors Facility", "TREAT / Transient Reactor Test Facility" und no es paar Dinger meh, wo's di scho am Name aa chönnt fürche...
Dä einzig öffentlich zuegänglich Reaktor isch äbe dä "EBR1", de erscht kommerziell Reaktor vo de Wält. Da isch hütt es Museum und e "National Historic Landmark". No während em zweite Wältchrieg isch d'Idee uufchoo, me müesst doch d' Atomenergie au für zivili Zwäck chöne nutze (Hiroshima lässt grüssen...). Und die Theorie uuszprobiere, wo'd Wüsseschaftler ghaa händ: En Reaktortyp z'baue, wo meh Energie produziert, als er zum Strom erzüüge verbruucht, also quasi es "Perpetuum Mobile". Und so händs äbe dä "Experimental Breeder Reactor" baue. Er hätt tatsächlich funktioniert, us Uranium 235 und 238 händs (hochgiftigs und extrem radioaktivs) Plutonium 239 chöne "brüete", mit eme maximale "Überschuss" vo 127%.
Aber säb cha der säge: Es hätt mi scho echli "tschuderet" i dämm Ding inne. Ich bi (vor Johre) emol z'Leibstadt gsii und ha di säbe Sicherheits-Vorchehrige gseh. Und etz muesch der vorschtelle, wie die do (guet, vor über 50 Johr) a dämm hoch-gföhrliche Züügs "umebaschtlet" händ... Es nähm mi Wunder, wie alt die Forscher und Büezer worde sind, wo do gschaffet händ. Und a wa dass dänn schlussändlich gschtorbe sind... (Über das Thema git's kei Info, isch jo klar!)
Die zwei Versuechs-Reakter wo verusse schtönd, sind Experimänt für en Flugzüüg-Aatrieb (...!...) gsii. Das Projäkt isch vom Präsident Kennedy im 1961 gstoppt worde. Vermuetli hätt sich eine überleit, wa ächt passieri, wänn sonen Flugi über bewohntem Gebiet würdi abstürze ("Tschernobyl for beginners" oder so...)!
Hütt bini denn äbe uf Dillon /MT ufegfahre und grad e Ghost-Town go aaluege. Vo dene hani jo scho es paar gseh, aber "Bannack" isch us zwei Gründ echli bsunders: Erschtens isch da emol d' Hauptstadt vo Montana gsii (chasch der da vorschtelle, wänn'd d'Föteli aaluegsch?). 1862 händ's im "Grasshopper Creek" Gold gfunde, und d' Iiwohnerzahl isch innert es paar Monet vo Null uf über 3000 gschtige.
Zweitens händ's de "berüehmt / berüchtigscht" Sheriff vo de ganze USA (de Henry Plummer) ghaa: Nochdämm er vo de Iiwohner glyncht worde isch, hätt em d'Justiz nochträglich 102(!) Mörd und suscht no es paar nätti Sächeli chöne nowiise...
Es schtönd hütt no öppe 50 Gebäude, di meischte sind offe und me cha elei drinn umelaufe. Wa mir bsunders guet gfallt, isch, dass do kän Kommerz (wie z.B. z'Tombstone) gmacht würt. Ich bi hütt glaub de einzig Bsuecher gsii. Und eso chasch äbe dini Fantasie "voll laufeloo" und der vorschtelle, wa i dämm Kaff emol alles abgange isch...
29.05.2002. Ha geschter Nomittag uf em Idaho Falls KOA iichecket. Hütt bini in "Grand Teton National Park" gfahre. Dä Name würt natürli englisch uusgschproche (Gränd Tiitn'), aber es füehrt kän Wäg draa verbii, dass französischi Trapper die Hügel tauft händ. Und uf französisch heisst da nüüt anders als "Grossi Titte"...!... (Chasch der vorschtelle, wa die für Entzugs-Erschiinige händ müese gha haa...)
Bi vorhär imene "Outback-Steakhouse" gsii go fuettere, und etz hani en zimmli ticke Buuch (ha natürli en Satz vo dene frittierte Chamignons zur Vorspiis müese bschtelle, ich Tubi...). Naja, echli Härzwasser hilft sicher zum verdaue...
28.05.2002. Nomoll wäge de Mormone: Also da chani der nid säge, ob's würkli mit de Vill-Wiiberei ufghört händ, oder ob die Tradition im Schtille immer no praktiziert würt. Grüchtewiis jo scho! Und da mit de "Schtadt i de Schtadt" häsch genau richtig gseh. De "Temple Square" isch es paar Blocks gross und isch s'eigentlichi Zentrum vo Salt Lake. Si händ dött es paar unglaublichi Bauwärk. Vom Tämpel und em Tabernakel hani jo scho verzellt, aber (under anderem) git's au no es Kongress-Zäntrum (da isch das Gebäude mit em Wasserfall) wo 21'000 Sitzplätz hätt!
Mit de Datebank, da sig eso: Si chömed schiins die Date vo LDS-Chile-Sprängel us de ganze Wält gliferet über, aber ob da akkurat isch und noch wa genau für Kriterie das "ghortet" würt, hätt mer di wunderhübsch Schwedin, wo mer's Programm erklärt hätt, au nid chöne säge. Aber irgendwie belaschtet mit da gar nid eso fescht, dass min Grosätti nid Aktekundig isch...
Und will d'Familie (drumm glaub au dä Kult mit de Vorfahre) s'heiligscht für d'Mormone isch, chömed so vill Päärli do häre cho hürote. De Rekord sig schiins bi 180 Trauige a eim Sunntig!

Wäge de "Utah Copper Mine" häsch natürli rächt: D'Meinig isch, dass me das Ding mit blossem Aug vom Space Shuttle uus gseht. Hani vergässe, z'erwähne. Leider händ's kein Truck zum Aaluege im Visitor's Center ghaa. Wäge de Grössi: "...a mountain once stood where the huge bowl is now... it's the world's largest man-made excavation: over three quarters of a mile deep and covers 1'900 acres (7.7 qkm)... at the top, it's over 2 1/2 miles (4 km) across... over six billion tons (1 ton = ca. 900 kg) of material have been removed since open-pit operations began in 1906..." Isch doch all daa, oder?
27.05.2002. Häsch gwüsst, dass es nu zwei "Man-Made" (Mensche-Gmachti) Bauwärk git, wo me us em Wältall cha gseh? S'einti sig schiins di Gross Chinesisch Muur, und vor em (bzw. im) andere bini geschter gschtande: "Kennecott Bingham Canyon Copper Mine". Chasch der jo vorschtelle, dass da e zimmli gigantischi Sach isch! Das Ding isch sit 140 Johr im Betrieb und si baued jöhrlich 310'000 Tonne Chupfer im Tagebau ab (15% vo de Chupfermängi, wo'd USA im Johr verbruucht)...!... Uf dere Foti, wo me i'd Mine abegseht, hätts a de Grueberänder eso chliini Ameisli: Da sind di gröschte Trucks vo de Wält (360 To. Nutzlast) und Löffelbagger, wo 98 To. uf's Mol i'd Schufle nämed... Si säged dämm Trumm "the richest hole on earth" (s'riichscht Loch vo de Wält), obwohl de Erz-Aateil mit 0,6% eigentli erschtuunlich tüüf isch.
Mit dere "Golden Spike"-Sach, da isch eso: Am 10. Mai 1869 händ sich, irgendwo "in the middle of nowhere" (uf em Promontory Summit, UT, zum genau sii...) di zwo Isebahn-Gsellschafte troffe, wo di erscht Trans-Kontinental-Strecki baue händ. D' Union Pacific Railroad hätt vom Oschte här (vo Omaha) guslet, und d' Central Pacific Railroad vom Weschte här (us Sacramento). Und a dere Schtell (uf de Foti gschehsch di zwo Loks, und dezwüsched die häller Schwelle) händ's mit vier goldige Spikes (Nägel) das gross Ereignis gfiiret. Muesch der vorschtelle: Vorhär häsch vo New York uf San Francisco öppe 4 Monet Reiseziit bruucht, und ab em 11.Mai 1869 nu no guet 7 Tag! Das ganzi isch für di säb Ziit natürli e Ingenieurs-Grosstat gsii! Di zwo Gsellschafte händ sich (s'sind jo schlussändlich Konkurränte gsii) wäred de Bauerei mit Schine-Lege wele überträffe. So händs e Wett uusgschribe, wär imene Tag am meischte Schine chöni uuslege: D' Grämper vo Central Pacific hätt schliesslich di 10'000$ iigsacket: Si händ i eim Tag 10 Mls.56 Ft. (16,107 km) verleit! (Jedi Gsellschaft hätt öppe 10'000 Lüüt uf em Bau ghaa...) Will das Ereignis für'd USA natürli en riise Schritt i'd Zuekunft gsii isch, händ's es "National Monument", äbe das "Golden Spike", druus gmacht.
Eigentli hani no wele über de "Great Salt Lake" öppis schriibe, aber ich find i mine vereinigte Büecher niene e gnaui Fläche-Aagob. So lömmer's eifach mit dämm bewände, dass de Cheib unändlich gross isch, und sau-salzig: S'Wasser chöni nu e gwüssi Mängi Salz löse, nochhär tüeg's uuskristallisiere. Und da machts jedefalls über hunderti vo Kilometer...!...
25.05.2002. Sid geschter bini z'Salt Lake City. Die Schtadt isch mer irgendwie no sympathisch! Si hätt zwar fascht 200'000 Iiwohner, aber si isch irgendwie eifach e grosses Dorf. S'Tempo isch gmächlicher und d'Lüüt sind vill fründlicher als inere normale US-Grossschtadt. Und Kriminalität isch es Fremdwort! Da hätt natürli mit de Mormone z'tue, wo de Grossteil vo de Bevölkerig uusmached. S.L.C. isch s' Wält-Zentrum vo dere Religion (Glaube, Sekte...?), quasi de Vatikan vo de "LDS-Church" (Latter Day Saints), wie si sich sälber nenned.
Bi hütt uf ere 5-schtündige (gfüehrte) Tour dur's Mormone-Heiligtum gsii, und mue säge: Da isch no zimmli iidrücklich! Schnäll en churze gschichtliche Abriss: Die Lüüt sind im Johr 1846 vo irere proschperierende Schtadt "Nauvoo" z'Illinois vertribe worde. De Hauptgrund (näbscht em Niid wäge irem relative Riichtum) isch iri Uuslegig vom alte Teschtament gsii, dass en Maa, (wänn er's vermag) meh als ei Ehefrau cha haa. Und Polygamie isch natürli i säber sitteschträng Ziit e unglaublichs Verbräche gsii! Und so hätt de Brigham Young (de zweit Füehrer vo de Mormone) di erschte wisse Sidler über dä legendäri "Mormon Trail" (öppe 1500 Meile) an grosse Salzsee uf Utah gfüehrt. Da mue en unglaublichi Strapaze gsii sii, vill vo dene Lüüt händ mit Hand-Chäre (Hand-Carts) ires Hab und Guet mitgfüehrt. Es paar hundert sind denn underwägs au verfrore / verhungeret / verdurschtet. Aber di nöchschte paar Johr händ's (gschätzt) doch öppe 70'000 Lüüt gschafft! Im Johr 1850 händ's dänn iren Schtaat "Deseret" wele gründe (da heisst "Honigbiene" uf "Mormonisch"), aber Washington hätt ene e bösi Abfuehr erteilt! Es hätt beinah en Bürgerchrieg gäh, bis d'Mormone im 1890 iri Vill-Wiiberei ändgültig uufgäh händ, und 1896 isch de Staadt "Utah" i'd USA uufgnoh worde. Aber ires State-Symbol "Beehive" (Bienestock) händ's ene z'Washington trotz allem no chöne underejuble...
Bi im "Tabernacle" (dä Chor isch jo wältberüehmt, leider tritt er nu am Sunntig uuf) gsii. Si händ dött eini vo de gröschte Chile-Orgle vo de Wält (über 11'000 Pfiiffe!). Zerscht hätt de Organischt, als Demonstration vo de Akustik, es Papierli verrisse und es Nödeli gheie loh. Glaubsch es nid, aber i dämm Riise-Saal tönt da, als wär's grad näbe dir! Und dänn hätt er d' "Toccata und Fuge in E-Moll" vom Bach gschpilt, es isch mer fascht andersch worde! (Die tüüfschte Bass-Pfiiffene sind über 30 Meter höch. Chasch der vorschtelle, wie da tuet...?...)
Und nochhär bini no i de "Family-History-Library" (di wältgröscht Ahneforschigs-Datebank) noch "Wittwer's" go sueche. S'hätt öppe 160 Träffer i de Schwiiz ghaa, allerdings hani käne mit mim Grossvatter (Geburtsjohr 1895) chöne identifiziere. Und vo mine Ur-Grosseltere weisi leider s'Geburtsjohr nümme...
Is absolut Heiligtum, in "Temple", lönd's nume taufti Mormone ine. A dämm Dings heged's schiins 40 Johr baue! Und hütt (am Samschtig) händ's über 30 Hochziite dött abghalte...
23.05.2002. Jou, isch no alles Ganz! De Wind hätt im Lauf vo de Nacht abgnoh und hütt isch es nu no es harmloses Windli (10-15 MpH) gsii, woni a'd Stateborder vo Utah füregfahre bi.
Sött am Friitig Nomittag biziite z' Salt Lake iifahre, schätze das i öppe am Zwei dött bi. Dänn müessti jo hoffentli no es Plätzli übercho (wärded jo nid alli a Reservation ha...). Dött bliibi sicher emol für drüü Nächt und gang echli um'd Schtadt und de Salzsee ume.
Bi hütt vo Rawlins uf Lyman (e chliises Kaff i de Nöchi vo de Staate-Gränze) gfahre, öppe 180 Mls. Wider e unändlich wiiti Landschaft, s'hätt nu öppe zwei namhafti Käffer underwägs. Do bini hütt nomittag no s' Fort Bridger go aaluege, aber da isch zimmli chalte Kafi. Dä bekannt Sidler-Wäg, de "Oregon Trail", hätt do verbiigfüehrt. Und de "Mormon-Trail" au no. Aber da risst di etz würkli nid vom Hocker, gäll...
Weisch, wa hani geschter zum z'Nacht gmacht? E Rägeboge-Forälle! Hätt (sid langem wider emol) en Safeway-Lade ghaa, und do bini natürli grad inegschtüüret. Und dänn hani die Rainbow-Trout gseh: Es Riise-Viech! So ne grossi Forälle hani bi üüs no nie gseh, isch sicher Gen-Technisch veränderet gsii... Item, ha nid chöne widerschtoh und ha dä tod Fisch poschtet (käni 4 $!) und dehei i'd Pfanne grüert. De Grind und de Schwanz händ drüberuus glueget. Aber dä Cheib isch Mega-guet gsii!
22.05.2002. Etz bini z' Rawlins uf em KOA und ha bedänke, dass es d'Chischte furtluftet! Ha grad de Weather-Channel am laufe und si zeiged, dass i zmitzt zwüsche emene Mega-Hochdruckgebiet über de Ostküste und emene Tüüf über em Nordweste hocke. Geil, si meined, es chönnt hütt z'Nacht no gfrüüre... Und de Yellowstone und de Süde vo Montana hätt teilwiis 40cm Schnee überchoo... Aber uf's Wuchenänd sött sich s'Tüüf noch Oste verschiebe. Me hofft wider!
21.05.2002. Si händ (sid geschter) au wider fürchterlich am Wätter-Schalter trüllet: Für de Yellowstone und de Süde vo Montana sägeds Schneeschtürm(!) aa und wo ich etz grad bi (Riverton) blooset en Gusty Southwind mit Böe bis zu 60 MpH! Ha vo Cody bis do häre (136 Mls.) über en drittel Tank bruucht. De Murphy hätt mit uufblosne Bagge voll degäge ghebet! (Tuet no weh, will Wyoming sautüüre Moscht hätt, um 1,60$ für d'Gallone.)
Wäge dämm Medicine-Wheel: Do bini geschter (leider, wäge Schnee) vor ere "Road Closed"-Tafle gschtande. Gemäss mim Buech isch da es Schtei-Monumänt vo 75 Meter Durchmässer, mit 28 Schpeiche. Si schriibed: "...Native American legends offer no clues as to the original purpose of these stones..."
Übrigens seit me, dass die Schtross, wo das mysteriös Ding i de Nöchli liit, (Alt.14) di tüürscht vo de ganze USA gsii sig, i Bauchöschte pro Meile grächnet. Si hätt schtiiffi 20% Grades und grad es paar "Runaway-Truck Ramp's"!
Und s'Ganz hani mit eme fürchterliche "Hangover" gmacht! Dä Oobig mit em Jeff und sine Rodeo-Kumpels (schiins no öppe e Koryphäe drunder) hätt zimmlichi Schpuure hinderloh... Mer händ jedefalls noch em Schpunte no i sim 5-th-Wheel wiiter bächeret und min Michelob-Vorrot isch uf kümmerlichi 4 oder 5 Fläschli zämegschrumpft. Und um's Riite bini zum Glück umechoo, will i geschter eso Chopfweh gha ha...
Aber wenn sich öpper für Rösser und Riite in ere Traum-Landschaft inträssiert, söll er sich bitte mit em Jeff i Verbindig setze. Sis Gschäft heisst "Cedar Mountain Trail Rides" und isch i de Nöchi vom Cody-KOA. Er hätt 35 Animäler, für jedi Stufe öppis, vo Beginner bis zu Rodeo-Profi! (Er hätt mer e wunderschöni Quarter-Horse-Stute zeiget, wo är sälber erscht zweimol druf ghocked sig, und da au nu je öppe 8 Sekunde...) Sis Telefon isch (001) 307-587-2637 (me cha Düütsch rede!) und s' Mail hmd@wtp.net.
Morn hani im Sinn, uf de I-80 abe z'hebe und dänn westward uf Utah übere. Ha eigentli zerscht no uf Colorado wele, aber usser Bärge und Skigebiet gits dött nüüt wahnsinnig wichtigs zum aaluege. Und noch Yellowstone bisch halt "Bärg-Technisch" scho zimmli verwöhnt... Do chunnt mer Salt Lake City inträssanter vor. So wotti z.B. de Mormone iri "Family History Library" go aaluege, schiins di wältgröscht genealogisch (Ahneforschigs-) Datebank. Die göng, für über 50 Länder, teilwiis über 500 Johr zrugg. (De Grund isch, dass'd Mormone iri Vorfahre eso chönd ufschpüre und nochträglich taufe...!...). Me törfi dött schiins sälber amene PC hocke und um de Rütlischwur umegusle...
19.05.2002. Bi hütt vormittag über de "Chief Joseph Byway" (via Cooke City / Montana) zum Northeast-Entrance vom Yellowstone Park gfahre. Cha der nu eis säge: T-R-A-U-M-H-A-F-T...!... Glaub, da isch definitiv s'schönscht, woni do änne scho gfahre bi. Chasch der vorschtelle: Meh als 60 Meile käs Kaff und überhaupt kän Verchehr! Bi praktisch muuselei uf dere Gebirgsstrecki underwägs gsi, und ha mer die unglaublich Landschaft inezoge! Nochhär hani de North-Loop vom Yellowstone gmacht und bi öppe 18.00 wider z'Cody iigfahre. De ganz Cher hätt öppe 250 Mile, jedi devo unvergässlich!
Ha tatsächlich underwägs e Grizzly-Mueter mit ihrem Puppy gseh! Si hätt em Junior s'Fische wele biibringe. Da isch en Aablick, da fahrt der richtig i'd Chnöche! Leider, leider, leider isch damoll de Zoom vo mim "Schätzli" eifach z'schwach gsii zum e gschiidi Foti häre z'bringe. (Näbe mir zue händ Jungs mit halbmeterlange "Tütene" vo Objektiv wohrschinli Atom-Pic's vo dämm Familie-Idyll gschosse!) Und sogar en Wolf isch mer vor em Jeep dure über'd Stross ghaset! Dä hani allerdings nid chöne knipse, er isch z'schnäll im Underholz verschwunde. Aber suscht bini Viicher-Technisch sauguet underwägs gsii.
No es paar Facts über de Yellowstone-National-Park: Da isch der erscht Nationalpark, wo vom Präsident Grant im 1872 i de USA gründet worde isch. Er isch 3'472 Square-Miles (9'000 qkm (zum Vergliich: Kanton TG 991 qkm)) gross und liit (generell) zwüsched 1800 und 2500 Meter über Meer. Speziell berüehmt isch er wäge sine Thermische "Naturwunder", ich glaube, er hätt meh Geyser's als Island. Und natürli wäge de Viecher's: So läbed 650 Schwarzbäre, 250 Grizzly's, 3500 Bisons, 25000 Elch, usw.usw. do i völliger Freiheit. Und d'Wölf, wo's erscht im 1995 wider aagsidlet händ (wäge starchem Widerstand vo de Rancher i de Umgägend) händ sich au scho uf über 150 Tier vermehrt.
Und weisch mit wämm gangi hütt z'Oobig is Pirr: Mit em Jeff, em "Only German cowboy in Wyoming"! Ha dä Typ hütt am Morge kenneglernt. Er isch sid 1985 do änne und hätt sin Buebetraum verwürklichet. Er hätt 35 Ross und macht mit Turis Tagesritt im Hinderland. Er hätt mi scho wele überschnöre, ich söll doch au uf en "Brämeschtänder" hocke, aber mich fürcht's vor Rösser immer no z'Tod...!... (Du weisch jo: lieber 400 PS uf vier Rädli als 1 PS uf vier Bei)
18.05.2002. Ich bi sit geschter z' Cody (Wyoming) uf em KOA, öppe 50 Meile vom Ost-Iigang vom Yellowstone National Park.
Wani bis etz vo WYO gseh ha, gfallt mer sauguet. Da isch (flächemässig) de 9-gröschti Staat vo de USA, aber mit de chlinschte Bevölkerig (öppe 490'000) vo allne 50 Staate. Do chasch etz rüebig "Wide Open Spaces" säge: I knapp 1 1/2 Schtund Fahrt uf em Interstate 90 (zwüsche Gillette und Buffalo) hani kä einzigs Kaff gseh. Di einzige Uusfahrte händ eso sinnige Näme wie "Death Horse Creek", "Crazy Woman Creek" und "Indian Trail Rd." I mim Buech schtoht, es heg meh "Pronghorns" (en Antilope-Art) z'Wyoming, als Mensche. Da chunnt mer au eso vor, bis etz hetti scho fascht zwei vo däne tumme Viecher übercharet... Di Iigeborene läbed vo Viehzucht und (da hani nid gwüsst) vo Oel. S'hätt en Siech voll "Esel", wo dä schwarz Saft us em Bode pumped. Und Cody (wägem Buffalo Bill Cody, da isch sini Schtadt) wär d' "Rodeo City" vo de USA. Jede Oobig es Rodeo, aber erscht ab em 1.Juni... Guruguru!
Uf em Wäg do häre hani en (fascht) 3000-er Pass überchlätteret. Do wäri wider emol froh gsi, wenn i öpper debii gha hett, wo mit em Jeep gfahre wär. Mit em Gschpann isch da eifach e Chalberei, di längscht Ziit im 2.Gang mit 25 Mph e gradi Wand duruf z'murkse...
15.05.2002. Am Vormittag bini's Crazy Horse Mountain Monument go aaluege. Da isch würkli gröber, nid nu wägem Monumänt. Da söll (im End-Uusbau) e Kulturstätte für di indianisch Urbevölkerig wärde. So isch z.B. e Universität, es Mega-Spital, e Konzärt-Arena, usw.usf. planet. Etz scho isch de Komplex zimmli gross. S'bescht Indianer-Museum woni bis etz gseh ha isch fertig, es Kino wo me d'Gschicht vom Crazy Horse und vo dämm Monument erfahrt, natürli es Restaurant, en riisige Gift-Shop und e Schuel sind in Betrieb. Wäge de Bildli: Das wiissi Modäll (im Vordergrund) zeiget, wie dä Bärg öppe i 50 Johr söll uusgseh... Unvorschtellbar! (De eigentlich Bärg mit de Bauschtell isch übrigens 1,6 Meile hinderem Modäll...!...)
Nochhär bini dur de "Custer State Park" gfahre, öppe 100 Mls. Dött hani d' Bildli vo dene Viechers gschosse. Leider hani Elch, Bär, Puma und suscht no etlichi Animäler nid vor d'Linse überchoo, wo do (alli i Freiheit) läbed.
Wäge de Bisons (landläufig seit me eher "Buffalo", e verballhornig vom französische "Beuf"):
De Custer State Park hebet di gröschti Herde i öffentlicher Hand, öppe 2000 Stuck. Rund um de Park hätts aber etlichi privati Ranches, wo grad nomol öppe sovil händ. Di gröscht Herde i de USA (über 4000 Stuck) ghört übrigens de Jane Fonda, die sind uf ere Ranch z'Montana. Me schätzt, das i de ganze USA hütt öppe 120'000 Bisons läbed. Erstuunlich, will im Johr 1900 weniger als 100 Stuck (im ganze Land!) di sinnlos Abschlachterei vo de Wisse überläbt händ... Die zottige, churzsichtige Viecher sött me aber besser nid underschätze:
"...don't let the tranquil appearance of North Americas biggest mammal lull you into a false sense of security! An average bull can stand six feet high at the hump, weigh over a ton, outrun a horse, turn on a dime, and gore a human most efficiently..."
(Loh di nid vo de behäbige Art vo Nordamerikas grösstem Säugetier in es falsches Gfüel vo Sicherheit versetze! En durchschnittliche Stier cha bis zum Buggel 1,80m höch wärde, wiegt über ei Tonne, isch schnäller als es Ross, cha uf ere Münze wände, und spiesst en Mensch locker uf...)
14.05.2002. Geschter nomittag bini uf em Hill City KOA iitrudlet und ha emol drüü Nächt buechet. Aber ha etz scho gmerkt, dass da wohrschinli nid langet, zum alles echli aazluege wo's do i de Black Hills inträssants händ. Bi hütt uf e Tour uf d' Iron Mountain Road gange (mit em Jeep), voll fantastisch! E wunderschöni Schtrecki (Strossebauer's Alptraum...) wo'd freilaufendi Bisons, Bärggeisse, Rotwild und "Burros" (wildi Esel) aatriffsch. Und natürli jedi Mängi verlassni Bärgwärk us früenere Ziite. Si händ do obi nid nu Gold gfunde, sondern au no Zinn, Silber, Glimmer, Tungsten (Wolfram), Beryllium, Tantalum, Lithium und Quarz. Schiins siged die Black Hills di ältischte Bärge vom ganze Kontinänt, sogar vill älter als d'Rocky Mountains. De höchscht Gipfel, de Harney Peak, isch 7'242 ft. (2207m) höch.
Und natürli hani Mount Rushmore bsuecht! Da isch glaub (näbscht de Freiheitsstatue vo New York) dä Inbegriff vo de USA überhaupt. Si säged dämm Monumänt jo au "Shrine of Democracy" und es fallt der uuf, das fascht alli Bsuecher zimmli ehrfürchtig und liislig wärded, wenn's vor dämm Ding schtönd und ufelueged! Isch verdammt iidrücklich, wa die do i dä Bärg inegmeisslet händ! (Obwohl mir di technisch Siite fascht meh iifahrt, als di künschtlerisch.) Wettsch gärn es paar Superlativ? Bauziit 14 Johr (1927 bis 1941), öppe 400 Lüüt händ permanent draa gschaffet. De "Kreator", de G.Borglum, isch 6 Monet vor de Volländig gschtorbe, im zarte Alter vo 74. Total händs 450'000 Tonne(!) Granit müese ewägspränge und meissle, zum di vier Chöpf z'gschtalte. Jede Chopf isch über 18 Meter höch und wäme di ganz Person wür mache (i de entsprächende Proportion), wär si über 140 Meter höch. Ach so, s'wichtigscht hetti fascht no vergässe: Die vier sind de George Washington, de Thomas Jefferson, de Theodore Roosevelt und de Abraham Lincoln.
Aber es isch no nid fertig mit Superlativ! D'Indianer händ beschlosse (wo's de Mt. Rushmore gseh händ), si heged schliessli au grossi Persönlichkeite ghaa! Und etz sinds, nu 17 Meile vom Mt. Rushmore entfärnt, a de allergröschte Statue, wo's je uf de Wält gäh hätt: em "Crazy Horse Mountain Monument". Das Ding isch e "Work in Progress", aagfange händ's demit im Johr 1948, und me meint, das es (vo hütt aa grächnet) öppe i 50 Johr söll fertig sii...!... Bis etz isch eigentli nu s'Gsicht vom Crazy Horse (en grosse Sioux-Häuptling und -Chrieger) fertig, über 27 Meter höch. Und will er (schlussändlich dänn emol) uf eme Ross hocket, würt di ganz Statue 171 Meter höch und 195 Meter lang, grösser als d' Pyramide vo Gizeh. Me schätzt, dass uf em uusgschtreckte Arm vom Crazy Horse über 4000 Lüüt chönd schtoh... Die spinned, die Amis, hmmm?
12.05.2002. Ich bi hütt uf em "Badlands-KOA" iitrudlet und fahre morn uf Rapid City (Black Hills National Forest) füre, is Mount Rushmore-Gebiet. Ha im Sinn, öppe 3-4-5 Tag dött z'bliibe.
Geschter hani z' Mitchell dä berüehmti "Corn Palace" aaglueget. Die Wahnsinnige meched würkli jede Septämber für über 100'000$ neui Mais-Bilder a d'Ussewänd, wo vo namhafte Künstler entworfe wärded. En Farmer züchtet us verschidene Mais-Sorte diversi Farbe use (aktuell händ's 9) wo für die Bilder verwändet wärded, es isch also nüüt aagmolet.
Und ganz en lässige Antiquitäte-Schober hani gfunde, woni es "Time"-Magazin vom 4.April 1955 poschtet ha. Etz weisi äntli, was d'Wält drüü Tag vor minere Geburt bewegt hätt... (es isch vor allem de Rücktritt vom Winston Churchill us de Politik gsii)!
Und die Landschaft do isch gschpunne! Weisch no, wo mer z'New Mexico de "gross Himmel" ohni irgend en Horizont beschtuunet händ? Glaubsch es nid, aber do isch dä Cheib no grösser...!...
08.05.2002. Ha hütt uf em Sioux City KOA für zwei Nächt iichecket. Dämm Kaff chasch etz rüebig "Dreiländer-Eck" säge: Sioux City isch z' Iowa, South S.C. isch z' Nebraska und de Campground liit zwei Meile usserhalb, in North S.C. und isch z' South Dakota. Alles klar...?...
D'Gägend gfallt mir aber eigentli no guet, s' isch halt total "rural" (ländlich). Die "Düne"-ähnlich Landschaft (d' Amis säged "Loess" dezue) goht etz über hunderti vo Quadratmeile so wiiter gäge Weschte. Da isch au mini Richtig, ich hebe etz dänn uf em Interstate 90 zu de "Bad Lands" und de "Black Hills" übere, beides echli "mythischi" Gägende. Für d' Indianer sind das hütt no heiligi Gebiet, und sid de Kevin Kostner im 1990 de Film "Dances With Wolves" (Der mit dem Wolf tanzt) dött gmacht hätt, zieht's au no anderi Esoteriker i die Gägend... Das berüchtigti "Wounded Knee" isch au dött, wo'd US-Armee im 1890 es Massaker under de Indianer aagrichtet hätt. Meh Info, sobald i dött bi!
05.05.2002. Vo Paducah ha der jo scho verzellt. Di säb Nacht isches eso schwüelheiss gsii, ich ha um 01.00 beidi Dachklima-Aalage laufe loo! Am andere Morge isch es dänn schtockfiischter gsii und hätt gschiffet, was hätt abemöge. Und im Autoradio händ's all Viertelschtund e Sirene laufeloo, und e dumpfi Schtimm hätt gseit, me söll go d'Shelters (Schutzrüüm) uufsueche, wäme nid imene gmuurete Huus im Erd- oder Chällergschoss sigi! Jenu, wa hani wele mache? D'Schturmzone hätt sich i öschtlicher Richtig bewegt, und ich ha jo i'd Gägerichtig (uf St.Louis) wele. So bini halt um de Mittag ume losgfahre und eigentli problemlos westwärts under dämm Ding furtchoo.
Woni dänn am Nomittag uf em St.Louis West KOA aachoo bi, hätt mi s' Müeti ganz entsetzt gfrooget, ob i würkli us de Paducah-Region chömi, dött unne heged's doch en schlimme Schturm ghaa! Ha glaub damoll würkli zimli vill Dusel ghaa...
Am andere Tag bini dänn go'd Anheuser-Busch-Brauerei aaluege. Die mached e ganz lässigi Tour, wo öppe 80 Minute goht, dur en Teil vom Wärk. I dämm "chliine Buudeli" schaffed (wältwiit) 24'000 Aagschtellti! Da sind eifach scho anderi Dimensione, als me's bi üüs kännt! Inträssant isch d'Gschicht vo üsem "Lieblings-Stoff" (Michelob): Das Bier braued's schiins scho sit em 1890 (oder so), aber si händ's bis 1961 nur "On Draught" (im Offe-Uuschank) ghaa. Erscht ab 1961 gits es i de Fläsche, und sit churzem sogar au i de Dose. De Haupt-Underschiid zum Budweiser isch, dass si im Michelob nur Hopfe (alle importiert) und Malz verwänded, und im Bud au no Riis (!). Dä gab em Bud dä "Crispy Taste" (chnuschperig Gschmack)... Naja!
Am nöchschte Tag bini dänn uf de "Great River Road" (MO 61) öppe 70 Meile em Mississippi entlang Richtig Süde gfahre. Dött unne hätt's es härzigs Käffli, wo Ste.Genevieve heisst. Sig schiins di erscht wiss Sidlig weschtlich vom Mississippi, gründet vo französische Trapper im 1765.
Will mer d'Dischtanz uf Kansas City z'gross gsii isch, hani geschter Nomittag uf em Jonesburg KOA für ei Nacht iicheckt. Dött bini dänn echli um de Missouri-River ("Big Muddy") umeturnet und ha wider es "Swiss" entdeckt. Und nochhär grad au no es "Hermann"! Die Käffer liged au hütt no zimli i de Pampa, aber wa meinsch erscht vor 150 Johr...?... Ich froog mi immer wider, wa ächt die Lüüt dännzumol zum Bliibe bewoge hätt...
Am Oobig isch mer dänn no en zfridne Tigibautz zuegloffe und hätt sich grad hüüslich iigrichtet! Dä hani natürli eso "pampered" (verwöhnt), dass er bis schpoot i'd Nacht bi mir blibe isch. (D' Buffalo-Wings sind em zwar z'scharf gsii, aber ich hanem grad en Scholle vo mim Steak abträte...)
Hütt bini uf em Kansas-City East KOA iitrudlet und ha zwo Nächt buechet. Gang morn emol echli i'd City go schneugge. Tüecht mi luschtig, dass di inträssanter (und grösser) Siite vo KC no im Schtaat Missouri liit! Uf de Kansas-Siite sind eigentli nu "Suburbs" und d'Industrie.
02.05.2002. Ich bi hütt Richtig St. Louis (Missouri) losgfahre und ha underwägs Station uf em "Paducah KOA" gmacht. Das Schtädtli isch es richtigs "Schnuggerli", en alti River-Town am Zämefluss vom Tennessee- und Ohio-River. Die Murals (Wandbilder) sind zimmli berüehmt: D'Schtadt hätt en landeswiite Wettbewärb uusgschribe und zahlt jedem Künschtler für sones Bild 10'000$. Hätt sagehafti Sache drunder!
30.04.2002. S'Corvette-Werk isch würkli au inträssant gsii. Leider absoluts Foti-Verbot, si händ mer sogar s'Cellphone abgnoo! Si baued drüerlei Vettes: S' Coupé (55%), s'Cabrio (40%) und de Hardtop "Z06" (5%). Ich bi jo scho i verschidene Autofabrike gsii, und drumm hani di "ganz gross" Faszination nume bi zweine Statione ghaa: Dene Fuzzy's wo's Cabrioverdeck montiered, hetti schtundelang chöne zueluege! Wie die dä "Chnifel" mit traumwandlerischer Sicherheit "zämewörfed" und's nochhär au no funzet: Unglaublich! Und de Prüefschtand ganz am Schluss, wo's jedi Macchina uf em Rolleschtand uf ca.170 MpH (über 270 Km/h) minutelang tonnere lönd. S'tuet eim fasch weh: Di ganz, neu, schön Mechanik eso go plooge...!...
Und natürli au no es chliises "Schlüsselerläbnis": Bi de uusliferfertige Vettes isch e silbrigs Coupé gschtande, mit eme vill z'grosse Nummerefäld am Heck, orange Blinker (bi de US-Versione isch jo alles Uni-Rot) und blitzhässliche Rückstrahler uf de Schtossschtange. Ha natürli uf de Fabriks-Laufzedel güggslet: "Export / Switzerland" isch druffgschtande! Es isch jo so goil...
29.04.2002. Geschter bini z'Kentucky (Horse Cave KOA) iitrudlet und ha beschlosse, ich göng hütt go "Fort Knox" aaluege. (Du weisch sicher: I dämm Ding hätt d'USA en Teil vo irne Goldreserve iiglageret, gemäss mim Buech öppe 45'000 Tonne.) Und so bini fröhlich anegfahre und ha dänn grad e drüviertel Schtund mit zwei Wachtpöschte vom DOD (Department Of Defense) verbrocht. Die beide sind zwar saunätt gsii, aber si händ mer grad de Pass und alli Papier abgnoh, de Jeep mit Schpiegel vo unne beschtuunet, etc.etc.
Isch glaub echli e Schnapsidee gsii, aber zum Schluss hani dänn gliich törfe ine, wenigschtens es Schtückli. Natürli totals Foti-Verbot. Aber etz weisi wenigschtens, das i nid uf de Fahndigs- und Terrorischte-Lischte schtoh...
Nochhär bini uf de Kentucky-Bourbon-Whisky-Trip: I de Gägend vo Bardstown isch Jim Beam, Four Roses und Maker's Mark dehei. Bi däne bini überall go inegugge (ha natürli nid s'Jack-Daniels-Liibli aagleit, suscht hetted's mi vermuetli gschteiniget...) und etz hani 5 chliini Fläschli (375 cl) "Schtoff" dehei und fang etz dänn grad e Probier-Rundi aa... So goil...
Morn hani im Sinn, z' Bowling Green de GeneralMotors ires Wärk go aazluege, wo's d' Corvettes zämenagled. Als alte "Viper-Fuzzy" hani zwar nie vill mit ere "Vette" am Huet ghaa, aber si isch doch irgendwie de Inbegriff vom Ami-Sportwage. Gemäss mim Buech chame uf e Besichtigung i'd Fabrik, aber leider au wider mit Foti-Verbot.
23.04.2002. Mir sind geschter Nomittag uf em Birmingham KOA (Alabama) iitrudlet. Und will's Wätter hütt am Morge eso kitschig schön gsii isch, hämmer beschlosse, mer bliibed nomol en Tag doo. Etz isch es öppe 14.30h, und ich bi vor de Hitz am Pool is klimatisiert Gfährt gflüchtet und hocke am PC. S'isch unglaublich, aber d'Noel cha schtundelang a de pralle Sunne lige und chunnt kän Brand über! Defür gseht si etz uus wie en blonde Neger (ohni Chrusle)!
Morn fahred mer aber ändgültig uf Atlanta wiiter.
19.04.2002. Weisch wo mer etz grad sind? Törfsch drüü mol Rote: Uf em "Swinging Bridge RV-Resort" z'Jackson/MS...!... Weisch no, a de Wienacht? Nu mit dämm chliine Underschied, dass s'Noel etz grad am Pool hanget (s'isch soäbe 22.45h worde) und ich a de Chischte (On-Site-Phone-Jack, so goil). Mer händ beschts Wätter und e Sauhitz (dörftet um di 30 Celsius gsii si).
Morn fahred mer mit em Jeep s'underscht Stuck vom Natchez-Trace und dänn über Vicksburg wider zrugg. Hütt simmer scho öppe 70 Mls. uf dere legendäre Schtross gfahre, vo Kosciusko bis Jackson. Etz hani au meh Info: De Trace isch 8000(!) Johr alt und füehrt vo Nashville uf Natchez, total öppe 400 Miles. Z'allererscht en Wildwächsel (Bisons, Mammut's), dänn en Indianische Handelspfad und bis Aafangs 1800 de Rückwäg für d'Flösser, wo iri Güeter de Mississippi durapp gschiffet händ. Ab 1821, wo s'erscht Dampschiff uf em "Old Man River" gfahre isch, isch de Trace langsam wider verwildert und erscht i de 60-er Johr vo dämm Johrhundert "widerentdeckt" worde. Isch e wunderschöni Fahrt dur Wälder (vilfach mid dere Räbe überwucheret, wo's "Kudzu" nenned), dur Fälder und Sumpfgebiet. Und natürli eifach s'Wüsse, wie alt dass da Ding isch...
17.04.2002. Z'Memphis hämmer natürli s'ganz Programm abgschpuelet: Am erschte Tag simmer is Graceland. Die händ übrigens zimmli ufgrüschtet, d'Zimmer sind tipptopp reschtauriert (hani alles echli schmuddeliger in Erinnerig ghaa), und neuerdings chunnsch e digitals Grätli über (nümme nu en schtiere Tape-Recorder), wo'd zu jedem Uusstelligsschtuck chasch Info abrüefe. Und s'Ändi vom Lied kennsch jo: Glüehendi Streifli hinne uf de Kreditcharte im Record Store...
Geschter hämmer dänn d' Peabody-Ducks, s' Sun-Studio (au vill besser als früener!), s' Civil Rights Museum, de Mississippi und sälbverschtändlich d'Beale Street bsuecht. Mer sind zwei mol gsii, am Nomittag im "Schwab's" (das Chaufhuus vo 1876, isch en totale Hit zum aaluege. Das Ding isch würkli immer no in Betrieb und genau eso "altertümmlich" und "chruuschtlig" iigrichtet wie Anno Domini!), und am Oobig hämmer dänn natürli no de Blues iiwürke loo! Mer sind im gliiche Club hange blibe, wo mir dannzumal d' "Miss Zeno" gloset händ. Gäge schpööter hätt üüs d'Bänd eso is Härz gschlosse, das mer öppe es Bud meh inegnoh händ, als planet. Und de Sänger (de Lindsey Butler) hätt üüs sogar zu "Southern Soul Food" bi imm dehei iiglade...
Im "Marlowe's" simmer au wider go BBQ inesuuge, aber damoll natürli mit em Jeep. Sind würkli nu 5 Minute vom Campground (aber ebe nu mit em Auto...)
Über d'Stadt Memphis mueni jo nid gross prichte. Si isch eifach "The Birthplace Of Rock 'n Roll" und vom Blues, vom Gospel, vom Soul usw.usf. Früener d' Baumwulle-Hauptstadt vom Mississippi und sim Delta, isch si hütt en wichtige Induschtrie- und Chemie-Standort im Drü-Schtaate-Egge TN / MS / AK. D'Bevölkerig isch mehrheitlich Schwarz. Noch de Ermordig vom Martin Luther King im 1968, im "Lorraine Motel", isch en Art "White-Flight" (Wiisse-Flucht) us em Zentrum losgange, was de Downtown e fascht drissgjöhrigi Phase vo Nidergang und Verfall iitreit hätt. I de letschte Dekade hätt aber di (schwarz) Stadtregierig s'Rueder umegrisse. Etz würt baue und renoviert, wa's Züüg hebet...
14.04.2002. Mer sind hütt scho zimmli biziite uf em "Loretta Lynn" / Buffalo KOA aachoo.
Mer händ vor einige Tag de Film über de Loretta ires Läbe und d'Karriere glueget, und sind deswäge natürli voll motiviert gsii... (de Schtreife heisst "Coal Miner's Daughter" und d' Sissi Spacek spilt d'Hauptdarstelleri. Isch würkli total sehenswärt)!
De geschtrig Oobig i de "Grand Old Opry" isch natürli au e tolls Erläbnis gsii. Da isch jo di längscht, ununderbroche laufend Radio-Show wältwiit, sid 1924. Das Ding würt jewils am Friitig und Samschtig Oobig uusgschtrahlet, uf AM 650 Khz (d' Station heisst WSM 650 / We Shield Millions). Und eso, als Show, muesch der da au vorschtelle: Kän Musiker hätt meh als drüü Nummere brocht, defür häsch i däne (öppe) 2 1/2 Schtund natürli jedi Mängi Lüüt uf de Bühni gseh! De geschtrig Mega-Star isch de Willie Nelson gsi, aber au di andere Type händ sich nid lumpe loo! De absolut Gäg isch en 95-jöhrige Bäppel gsii (Jumpin' Bill Anderson), wo d'Lüüt zu Bifallsschtürm hiigrisse hätt! De Saal isch uf de letscht Platz uusverchauft gsii, aber scho vorwiegend e älters Publikum. Und au di meischte Stars, wo do uufträtted, sind scho echli "aagrauet", di einte chömed der sogar es bitzeli "abghalfteret" vor. Offesichtlich isch d'Opry en Art "Alters-Vorsorge-Institution" für d' Country-Szene...
Aagfange hätt das ganzi emol i de Downtown vo Nashville, im Ryman Auditorium. S' Ryman würt drumm hütt no gärn als "Mekka" vo de Country-Music bezeichnet. Aber 1974 händ's dä "Opryland"-Komplex baue. Allerdings händ's vor drüü Johr de härzig Vergnüegigs-Park abgrisse und defür e gigantischi Outlet-Mall (d' Opry-Mills) anegschtellt. Und en Iigweihte hätt geschter verzellt, do heged's en riise Mischt gmacht: Schiins sig de Theme-Park vill profitabler gsii...
12.04.2002. Mir sind geschter um de Mittag ume z'Nashville iitrudlet und nochhär grad uf e Rundi nach Downtown. Dött simmer i'd "Country Music Hall Of Fame". Das Ding isch erscht letschte Summer eröffnet worde, risegross, superschön gmacht und würkli sehr inträssant! En "ächte" Fan cha problemlos en Tag (oder sogar meh) dött inne umeschtöbere... Das isch übrigens nid nu es Museum, dött sind's au am schaffe. Me cha (dur Glas natürli) irgendwelche Techniker-Fuzzys zueluege, wo alti Tonbänder und Schellack-Platte reschtauriered und digital ufpäppeled. Schpöter hämmer dänn i de Printer-Alley, uf em Broadway und i de Music-Row scho echli Musig (und es paar Pirr...) inelogooloo...
Dass Nashville d'Country-Hauptschtadt vo de Wält isch, isch jo zimli bekannt. Aber häsch gwüsst, dass si au no "The Protestant Vatican" gnännt würt? Es git über 700 Chile do, meh (pro Chopf grächnet) als i jedere andere US-Schtadt. Und drumm natürli au jeglichi "fromme" Schuele und Institutione, wo Prediger und Missionare uusbildet wärded, Bibel-Verläg usw.usf.
Aber de Bescht mue der natürli no verzelle: Ha uf morn Oobig zwei Tickets für'd "Grand Old Opry" chöne uuftriibe. Mer wärded de Willie Nelson, Charley Pride, Porter Wagoner, Chris Ledoux, d'Osborne Brothers und no es paar anderi Life erläbe. S'isch so goil...
10.04.2002. Hütt simmer (bi schönschtem Wätter) üsi "Härzwasser-Fabrik", de Jack Daniel's z'Lynchburg go aaluege.
Mer händ leider nümme de gliich Guide ghaa, aber au ganz en coole Typ, öppe 120 Kilo schwär und mit ere markige Schtimm! Er hätt verzellt, si siged zur Ziit i de USA di beschtverchauft Marke, aber wältwiit nu Nummer 2 (hinder Johnny Walker). Aber da söll sich schiins i dämm Johr ändere, si weled d'Nummer 1 wärde. Lynchburg isch immer no "Dry" und hätt 361 Iiwohner (änderet sich offesichtlich nie), aber da ghört glaub alles zu de Marketing-Strategie...!...
E glatti Episode isch no, wie de "Uncle Jack" im Alter vo 61-zgi gschtorbe isch: Er isch amene Morge is Büro choo und hätt irgendwelchi Papier im Safe wele aaluege. Aber sin Neffe, de Lem Motlow (dere Dynastie ghört hütt de ganz Lade), hätt d'Kombination gänderet, und vergässe, em Jack di neu mitzteile. Us luuter verrückti, das er das Ding nid uufbrocht hätt, hätt er uuszoge und dämm Tresor en Gingg versetzt. Debii hätt er sich de gross Zeche broche. Es Johr schpöter händ's em müese es Bei amputiere, will er sich bi dere Aktion irgend e Bluetvergiftig (oder so) gholt hätt. Und a dere Operation isch er dänn gschtorbe...!...
Aber er mue en knurrlige Typ gsii si, so hätt er sich z.B. zu Läbziite gweigeret, meh als 99 "Bushels" Corn pro Tag z'deschtilliere, will er ab 100 Bushels nomol en Stüürprüefer hett müese zueloo. Und vo dene "Bundes-Trottels" well er nie meh als eine uf em Gländ gseh umeschtoffle!
09.04.2002. Das "Dollywood" chasch nid mit dene Mega-Pärk z'Orlando oder L.A. vergliiche, aber es isch irgendwie gliich no härzig gmacht. Und en Rollercoaster (Tennessee Tornado) händ's, wo über 70 Mph schnäll isch! Mer sind en halbe Tag i dämm Ding umegschuenet und am Oobig uswärts go ässe. Mis Birthday-Dinner isch natürli "rauchlos" und "troche" abgloffe, will Pigeon Forge es "Dry County" isch, so goil... Aber im RV hämmer dänn schpööter erfolgriich de Pirr- und Wy-Vorrot nidergmacht.
03.04.2002. S' Wätter do änne hätt sich, unmittelbar noch Oschtere, au wider massiv verbesseret. Hütt händ's 80 Degrees (knapp 27 C.) laufeloo, und prächtige Sunneschy dezue. Aber über d'Fiirtig isch es troschtloos gsii! Die Tüüfdruck- und Sturmzone isch über em Golf vo Mexico entschtande und hätt Texas und alles öschtlich devoo (inkl. Klein-Hausi...) zueteckt. De Weschte hätt's prächtig ghaa (z.B. Phoenix: 91 Degrees).
Hütt vormittag hettsch wahrschinli Iitritt zalt, wänn't mi gseh hettsch: Ich bi, bewaffnet mit zwo Kitt-Kartusche, Spachtel, etc.etc. uf's Tach gschtige und ha es Riise-Gschmier um mini Tach-Uufbaute gmacht. Etz isch de Wasser-Iitritt (hoffentli) behobe. Gschwitzt hani jedefalls wie en Tubel...!...
28.03.2002. Uf de Charte hani es Kaff im Backcountry gseh, wo "Grütli-Laager" heisst. Da hani dänn au gfunde und woni vo dött uus wiiter gfahre bi, hätt uf's mol de Wrangler aagfange z'rupfe und hätt abgschtellt.
S'erscht mol, sidi underwägs bi, hätt mi dä Cheib schtoh loh! Und da natürli zmitzt im Gaggo use, voll i de Pampa... Ha dänn zerscht emol sälber echli am Züüg umegnoderet, aber woni gmerkt ha, das er kä Sprit überchunnt, hani müese passe. Jenu, item: D'Hube offe und de Warnblinker laufeloo, und warte, wa passiert: Noch 5 Minute isch de Poschtli verbiigfahre, hätt aaghalte und grad alles i'd Wäg gleitet: Er isch (öppe 6 Meile) is nöchscht Kaff, hätt de Mech ufbotte und dä isch dänn au cho. Diagnose: The Fuel Pump (wani au vermuetet ha). Zerscht hämmer das Gschirr emol i sini Bude abgschleppt, en Art Landmaschine-Wärchstatt. Dänn hätt er sis Mämi i di nöchscht Schtadt gschickt, so nes Teil go hole. I dere Ziit händ's z'zweite de Tank uusbaue (isch en Sau-Morggs) und wo d'Mueter mit de Pumpi zruggchoo isch, isches di falsch gsii... Ich ha scho echli aafange z'bibere (s' hätt scho iidunklet und morn isch Karfriitig...), aber die zweit Pumpi (jojo, Mämi hätt grad echli Meile gmacht wäge mir...) hätt dänn passt. Wo de Avery (de Mech) gmerkt hätt, dasi scho zimli nervös worde bi, hätt er gmeint, im schlimmste Fall hetti au bi ine chöne schlofe...!...
Und am Schluss hätt mer dä Lieb Siech für d'Labor (Arbet) 80 Dolores verrächnet (öppe 3 Stund Arbet / Überziit / Abschleppe / Teilibeschaffig, alles inkl.)...!... Und woni e guets Trinkgält ha wele gäh, hätt er's abglehnt! Er hätt gmeint, so siged d'"Hillbillies" halt...
Isch klar, so ne Panne mueni nid all Tag ha. Aber s'Erläbnis isch glich lässig gsii, so hilfsbereiti und zfridni Lüüt triffsch vermuetli würkli nid a jedem Egge!
27.03.2002. Ha im Jack Daniel's Factory Store z'Lynchburg no es Buech über de Jack Daniel poschtet. Bi zwar erscht bim zweite Kapitel, aber s'fangt sauguet aa! Dä chlii Schnösel isch tatsächlich im zarte Alter vo sächsi dehei devoogloffe, wil en sini (10...) ältere Gschwüschterti immer wäg sinere chliine Grössi ghänslet händ. Und so ischer bimene Farmer glandet, wo ne "Still" (Destillerie) betribe hätt. Und dött hätt er, vo me Negersklav Namens "Uncle Nearest Green", sis schpöteri Handwärk glernt. Ob er ächt dännzumol scho vermuetet hätt, dass do druus emol e grösseri Sach würt...?...
27.03.2002. Wäge de Cherokees und de Sklave, da isch eso: Während em 18. und em früehe 19.Johrhundert sind d'Cherokee de mächtigscht Indianerstamm im Drüü-Staate-Egge Tennessee / Georgia / North Carolina gsii. Zitat us mim Buech: "...they forged close links with white pioneers, adopting white methods in schooling and agriculture, intermarrying - and owning African slaves..." Si sind de einzig Indianerstamm gsii, wo e eiges, gschribes, Alphabet entwicklet und e eigni Ziitig usegäh händ, de "Cherokee Phoenix". Si händ sogar Soldate zur Verfüegig gschtellt, wo de General Andrew Jackson de Engländer uf's Dach gäh hätt (1814), i de Hoffnig, si chömed im Gägezug bi de Bundesregierig en gwüsse Iifluss über. The John Ross, es Halbbluet, isch 1828 zum "First Principal Chief" (Ober-Häuptling) gwählt worde und er hätt e Verfassig (aaglehnt a'd US-Constitution) iigfüehrt. Aber das alles hättene schlussändlich nüüt gnützt, gäge de Landhunger vo de Wiisse Sidler sinds machtlos gsii. 1838 sind's vertribe worde, und "Ross's Landing" isch zu "Chattanooga" (Wasser, wo useme Felse usechunnt, i de Cherokee-Schproch) umtauft worde.
26.03.2002. Bi etz di dritt Nacht uf em Chattanooga South KOA. Vo de Schtadt sälber cha der nid vill inträssants brichte, s'isch relativ überblickbar mit Attraktione! Isch glaub würkli dene ires Glück gsii, dass de Glenn Miller dännzumol dä Wält-Hit gschribe hätt, suscht wäred's vergässe gange... De ehemalig Bahnhof vo de Cincinnati Southern Railroad isch hütt es Holiday-Inn-Hotel.
Allerdings chame (als Gag) imene ächte, alte Schloofwage übernachte und im Schpiiswage ässe.
Apropos Marketing-Gag: Grad noch em zweite Wältchrieg hätt en wirblige Wärbe-Fuzzy d'Idee ghaa, uf Schüür-Dächer de Wärbe-Slogan "See Rock City" z'vermarkte. Und so händ's de Farmer offeriert, si schtriiched ene d'Schüür gratis, wänn's dä Slogan dörfed uf's Dach pinsle. 1956 sind über 600 vo dene Schüüre im ganze Land gschtande! Rock City sälber isch e härzigs (chliises) Ding uf em Huus-Bärg vo Chattanooga, em Lookout-Mountain. Wär ohni dä Werbe-Gag natürli au scho längschtens vergässe...!...
24.03.2002. Ich bi di letschte zwei Tag uf em Knoxville-East KOA gsii und hütt nomittag z' Chattanooga (South) iitrudlet. Und da isch eso choo: "Dollywood" macht erscht am 1.April uuf. Und de KOA z'Pigeon Forge grad au! (Lappi tue d'Auge uuf, me hett jo gnueg Lektüre, wo's wür dinneschtoh...)
Zudäm isch es vorgeschter Znacht uf under Null gheit (27 Degrees händs im Radio duregäh), will e Polarluft-Front durezoge isch. Und woni am Morge kä Wasser im RV ha chöne useloh, hätt's mi natürli furchtbar a Texas erinneret...!...
So bini geschter echli i de Smoky Mountains umeturnet, bi wunderschönem Sunneschii, aber immer no under Null Celsius. Die Gägend, woni bi go schnuppere, liit westlich vo Gatlinburg. E gwüssi Bekanntheit (me müesst zwar eher säge: Berüchtigtkeit) hätt die Region, will do d' Vertriibig vo de Cherokee-Indians, de legendär "Trail of Tears", sin Aafang gnoh hätt. 1838 sind 14'000 Lüüt uf Oklahoma "umgsiedlet" worde, öppe 4'000 händ die "Züglete" allerdings nid überläbt... Me cha sich dä aggressiv "Land-Hunger" vo dene Sidler fasch nid erchlääre, wäme die troschtlos Gägend hütt aalueget. Wa mi no inträssant tüecht: Häsch gwüsst, dass d'Cherokees Negersklave ghalte händ...?...
Mini "Umsidlig" uf Chattanooga hätt sich (emel wättertechnisch) bewährt: 69 Degrees (20 Grad) hani uf ere Wärbetafle gseh. U da fröit eim!
Morn haui's zerscht emol go d'Schtadt aaluege. Ich glaub, es git chuum en anders Kaff uf Gottes Ärdbode, wo eso mit eme Musig-Stuck identifiziert würt, wie das: Mit em "Chattanooga ChooChoo" vom Glenn Miller. Und debii händ di arme Schnägge nid emol me en Amtrak-Station...!...
20.03.2002. Hütt bini guet 100 Mls. uf em Blue Ridge Parkway nordwärts gfahre und dänn querbeet dur's Hinderland wider zrugg uf Asheville. De ganz Trip wär e mehrtägigi Aktion, die Schtross isch 469 Meile lang, vom Shenandoah National Park (Virginia) bis in Great Smoky Mountains National Park (im Gränzgebiet Tennessee / North Carolina). Isch e wunderschöni Gägend, aber so öppis gottverlassnigs hani scho lang nümme gseh. Do isch etz nid nu de Hund begrabe, d'Chatz glaub grad au no! Chani mer guet vorschtelle, das es di Junge Lüüt do nid hebed, dass' i'd Schtädt wägzüched. Glaub di gröscht Attraktion i dene Käffli isch würkli d'Chile am Sunntig. (Es hätt jedefalls meh vo däne, als Schpünte...) So wie's uusgseht, isch es e zimlichs Chopf-a-Chopf-Ränne zwüsched de Baptiste und Presbyterianer, gfolgt vo de Methodiste und de Mormone...
Do obe isch jedefalls d'Heimat vom Bluegrass, oder de "Mountain Music", wie's es sälber nänned.
Noch "Switzerland", "Little Switzerland" und "New Bern" z'schlüsse, hätt sich öppe en Eidgenoss do häre verirrt! Aber wänn i etz no sött über "New Altnau" inegheie, cheeri sofort wider um uf Florida...!... (hihihi)
17.03.2002. Ich bi hütt nomittag z' Charlotte (N.C.) aachoo, noch zwo Nächt z' Florence. Dött isch allerdings de Hund begrabe (ussert emene Race Track, wo's hütt es NASCAR-Ränne ghaa händ). Sprich: De Vatter isch wider emol uf em "Overflow" glandet...
Morn gangi s'Kaff Charlotte go aaggüggsle, aber ich glaub, da isch grad au nüüt Wältbewegends. Und übermorn isch no Asheville aagseit, dänn Pigeon Forge. (Du weisch jo: Dollyland / oder Silicon Valley...)
14.03.2002. Bi no z'South Carolina, etz grad no z'Myrtle Beach. Morn züchi wiiter, uf de Florence KOA (immer no S.C.).
Luschtig, uf em letschte Platz (Charleston) hani mit de Campground-Mueter und irere Tochter echli glaaberet. Die beide sind ursprünglich vo Tennessee, ganz us de Nöchi vo Dollywood. Si händ mer en Bsuech empfole, es lohni sich uf jede Fall!
Z' Charleston bini s'erscht mol ufeme Flugzüügträger umegschtofflet. Da isch dänn e grösseri Sach! Obwohl en älters Teil (d' USS Yorktown hätt iren letschte Iisatz z'Vietnam ghaa), hani's gschafft, mi im Maschineruum (öppe im 6. Underdeck) fascht z'verlauffe! Das Ding hätt vier Dampf-Turbine als Aatrieb, alles mittleri Eifamilie-Hüüser! Chasch der vorschtelle, wie da bienehuusmässig abgange isch: über 2000 Maa händ do gschaffet und gläbt... Aber isch scho no iidrücklich!
Myrtle Beach muesch der als öppe en 20 Meile lange Schtrand (er heisst übrigens au "Grand Strand") vorschtelle. Vollpflaschteret mit Souvenir-Läde, Hotels, Motels, Minigolfplätz, etc.etc. Aber noch über 6 Wuche Florida hani da eigentli scho alles zimli gseh...!
S'bescht, woni do gfunde ha, isch s'House of Blues. Das Ding ghört tatsächlich de "Blues-Brothers" Elwood und Jake.
Und, Glück ghaa: Si händ es Meeting vo Street Rods (bi üüs seit me eher "Hot-Rods") ghaa. Hunderti vo"Strosseverchehrsamt-TG-Alpträum"! So goil...!...
Und de Rollercoaster isch eigentli nüüt bsunders, usser de Laag: Er schtoht z'mitzt im Kaff inne...
11.03.2002. Z' Savannah bini noch drüü Tag wiiter, etz grad hocki uf em Mount Pleasant / Charleston KOA (South Carolina).
D'Stadt Savannah hätt en sehenswärte "Historic District", wo sich vom Savannah River uus öppe 8 Blocks im Quadrat uusdehnt. De Hafe isch früener eine vo de wichtigschte Baumwulle-und Riis- (und drumm natürli) Sklave-Umschlagplätz vo de USA gsii. Di rote Bachschtei-Baute a de Riverfront sind ehemalige Lagerhüüser, hütt alles Läde, Spüntli, Boutiqe, Restaurants, etc.etc. D'Bevölkerig isch mehrheitlich Schwarz! Apropos: Bi etz grad amene Super-Inträssante Buech über di sog. "Underground-Railroad". Da isch d'Gschicht über die Organisation, wo entflohni Sklave i'd Nordstaate und teilwiis bis uf Canada gschleuset hätt. Isch scho e unglaublich grausami Sach gsii, die Sklaverei! Und jedefalls e zimmli düschters Kapitel do unne i de Südstaate.
Das Bild "Fort Pulaski" zeiget übrigens di ächte Iischusslöcher vo de Nordstaate-Artillerie. Im Bürgerchrieg gäge di Konföderierte (Südstaatler), hätt de Norde das Fort, wo eigentlich als unbezwingbar golte hätt, innert 30 Schtund zur Kapitulation zämegschosse!
Min erschte Iidruck vo South Carolina stimmt zimli guet mit dämm Satz us mim ticke Buech überii: "S.C. remains, with Mississippi, one of the poorest and most rural pockets of the US..." Obwohl d'Stadt Charleston au es Bijou isch! (Imene ähnliche Stil wie Savannah, sind jo au nu öppe guet 100 Miles usenand.) Do, im Fort Sumter, sind übrigens di erschte Schüss vom Bürgerchrieg gfalle, am 12. April 1861.
Wäge dere blöde "Switzerland"-Tafle bini hütt übrigens meh als 200 Mile gfahre (guet, bi au no chli im Backcountry umeturnet...)! Bi scho uf em KOA am erschte Pirr gsii, woni d'Landcharte genauer aaglueget ha. Das Kaff isch grad ännet de Border zu Georgia... Guruguru! Aber eigentli chasch em nid emol me Kaff säge: A de Schtross schtönd nu es paar verfallni Ruine und Baragge! Und öppis sältsams: Ännet eme unbewachte Bahnübergang isch en schneewiisse, kilometerlange Hag mit eme Stahl-Tor und Überwachigskameras. Ha kä Ahnig, wa sich dehinder verbirgt!
07.03.2002. Geschter hani ändgültig, noch guet 6 Wuche, Florida verloh. Also dä Fähler machi nümme, z'säge, z'Florida sig nüüt los! Dä Staat hani zimli underschätzt! Mir isch es jedefalls nie langwiilig worde!
Bi geschter Richtig Norde, uf de Savannah South KOA (Georgia) wiiterzoge. Hütt gangi emol Downtown echli go schneugge, d'Schtadt mües zimli hübsch sii. Aber susch hätt Georgia glaub nid vill z'büüte, i mim ticke Buech handled's de ganz Staat GA jedefalls uf nume öppe 10 Siite ab!
Di nöchschte Täg haui's dänn über South- und North-Carolina wiiter, uf Pigeon Forge (Tennessee), de Dolly Parton ires "Dollywood" go aaluege.
03.03.2002. Ich bi sit em Samschtig uf em Saint Augustine Beach KOA. Z' DeLand händ's (wäge de Bike-Week) voll uusbuecht gha, drumm hani müese wiiter. Dä Aalass isch natürli nid z'Smyrna Beach (wieni im letschte Mail fälschlich gschribe ha), sondern z' Daytona Beach. Etz isch mer au alles klar: Da isch de gröscht Biker-Träff vo de Wält, do goht 10 Tag lang d'Sau ab! Bi hütt emol rasch füre gfahre (sind nu öppe 50 Mls. vo St.Augustine) und ha es Aug voll gnoh. Unglaublich! Sovill schrilli Vögel, bösi "Motorcycle Mamas" und natürli Bärge vo Chnattertons hani etz würkli no nie uf eim Huufe gseh!
S'Kaff St. Augustine isch en absoluts Bijou, so öppis härzigs hani glaub i de Staate no sälte aatroffe! Da isch di ältischt (ununderbroche bewohnti) Sidlig vo de ganze USA. 1565 vom Spanier Pedro Menendez de Aviles gründet, öppe 15 mol abebrännt, im Chrieg zerschtört, vo de Pirate uusgraubt, und immer wider früsch ufbaue worde!
27.02.2002. Bi vorgeschter z' Cape Canaveral, im John F.Kennedy Space Center, gsii (isch übrigens wesentlich intressanter als Houston). Und weisch waa: Hütt am Morge, 06.54, händs en Shuttle-Start vorgseh ghaa! Ich ha natürli ghofft, da sig es "once-in-a-lifetime" Erläbnis. Allerdings bini uf de falsche Siite vo Orlando ghocket, öppe 75 Mls. ewägg. Also hani geschter uf de Titusville KOA wele wiiter, dä wär ganz i de Nööchi. Murphy: S'allererscht mol kän Platz ufeme KOA überchoo! Offesichtlich händ no meh Lüüt dä Start wele gseh.
Uf em "DeLand"-KOA hani dänn no e Site überchoo. Ha hütt de Wecker uf di füfi gschtellt und bi, bi Arschchälti (öppe 1 Grad Celsius...) uf Smyrna Beach, öppe e halb Schtund ewägg, tuckeret. So geil, si händ de Schtart wäge Problem mit de "Landing Gears" (Landechlappe?) verschobe...!...
Jänu, wenigschtens hani etz es Bildli vomene Sunne-Ufgang gschosse (dörft au s'einzig bliibe...)!
Aber weisch waa: Ab morn händ's z' Smyrna-Beach es Biker-Träffe! Dött gangi natürli emol go'd Nase inehebe, da chönnt no öppe e glatts Föteli gäh! Isch offesichtlich öppis grössers, jedefalls hätt's uf em Campground Töffler us de ganze USA, Irland und sogar einigi Gumihäls!
24.02.2002. S'isch so goil: Di letschte zwei Täg (und Nächt) hätt's ununderbroche gschiffet, und ich ha meh als ei Rolle Hushalts-Papier bruucht, zum alli Bächli, Güntli und Seeli uufztröchne, woni im Wohnmobil gha ha! Wohrschinli fülli etz dänn dä Cheib mit Wasser, und dött wo's uselauft, seichts ine... (hihihi). Und im Jeep chönnti e Forällezucht uufmache, dä hätt's grad au no gfüllt! U da fröit eim! Aber im Ernscht, etz mueni dänn gliich emol uf's Dach go luege, ob me irgend öppis gseht, wo das Wasser inelauft.
Us luuter Fruscht bini natürli dauernd am Weather-Channel ghanget. Dött hätt me die Tüüfdruckzone genau gseh, wo über Zentral-Florida ghanget isch, tipptopp stationär, natürli... Und für'd Keys händs sogar e Hurricane-Vorwarnig duregäh!
Aber hütt isch wider alles vergässe: Schönschts Wätter! Irgendwänn im Lauf vo de Nacht hätt sich de Piss äntlich ostwärts uf de Atlantik verzoge. Und so bini dänn hütt echli uf'd Pischte. D' Universal-Studios händ do z'Orlando e Filiale, aber mit ere Erwiiterig: "Universal's Islands of Adventure". Hätt würkli es paar gueti Coasters, bi natürli grad alli go uusprobiere... Und morn gangi glaub "Fantasy of Flight" go aaluege, gemäss mim Buech s'gröscht Flugzüügmuseum vo de USA. Und uf Cape Canaveral sött me doch au no... Ojeoje!
22.02.2002. Z' Lake Okeechobee bini drüü Nächt blibe, und hütt uf Orlando (Fort Summit KOA) wiitergfahre. Okeechobee git nid vill här, de See gsehsch äbe eigentli nie vo de Schtross us, will de Damm z'höch isch. Dass dä Cheib riisegross isch (1940 Quadrat-Kilometer) hani jo scho gwüsst (im Vergliich: De Bodesee hätt 540 Q-Km). Aber susch isch es mit Attraktione zimli überblickbar! Do bini natürli z'Orlando besser draa: Ich glaub, die händ es "Theme Park"-Wettrüschte aagfange! I dere chliine Broschüre, wott im KOA überchunnsch (Official Orlando Attractions Guide) sind über 50 Sache uufgfüehrt, vo "Bush Gardens" bis "Wet 'n Wild". Aber eigentli wotti jo nid 3 Monet bliibe...!...
17.02.2002. Die zwei Sache, woni z'Miami no ha wele go aaluege (Coral Castle und Monkey Jungle) hani leider müese vergässe, will's geschter gschiffet hätt. Und de Sunset-Kitsch z'Key West isch grad am gliiche Problem gschiiteret. Hütt isches natürli wider wunderschön gsii, woni uf Lake Okeechobee ufegfahre bi. Murphy...!...
No schnäll wägem Okeechobee-KOA: Da isch de gröscht KOA i de ganze USA (meh als 700 Sites!), hätt zwei Pools, en eigne Golfplatz und e lässigi "Shanty-Bar" (das Gebäude links uf de Foti). Etz haui's äbe i di "besagte" Shanty-Bar und nime no es Firoobig-Pirr (zwei, drei, meh...) und tue euer gedänke (morn isch Mäntig, oder?).
14.02.2002. Tüecht mi no inträssant: De Name "Key West" isch e anglifizierig vom spanische "Cayo Hueso" (Knochen-Insel). Di erschte Spanier, wo do glandet sind, händ schiins en ganze Bärg vo menschliche Chnoche aatroffe. Si vermueted, da siged Überräschte vomene Indianer-Chrieg gsii.
Das Kaff isch, gäges uusgehend 19. Johrhundert, di riichscht Stadt vo de USA gsi (pro Chopf grächnet, natürli). Die Type händ vom "Ship-Wrecking" gläbt: Alles, wo do umenand Schiffbruch erlitte hätt (und da isch offesichtlich zimli vill gsii...) isch vo dene "Wrecker's", legal und anderscht, zu Gäld gmacht worde! D'Gränze vo Seenot-Rettig und Piraterie siged jedefalls zimli flüssend gsii...
1912 hätt dänn de Isebahn-Magnat Henry Flagler sin Traum (oder Furz...) wohrgmacht, und e Isebahnlinie vo Miami bis uf Key West baue. 43(!) Brugge und 700 Toti Bauchnuschti hätt da bruucht! Jedefalls hätt dänn Key West e neui Dimension erläbt: Tourismus. Hütt hätt das Kaff öppe 27'000 Residents und über 10'000 Hotelzimmer...
De Titel "Southernmost Point of the Continental USA" händ's übrigens scho lang an en Platz uf Big Island, Hawaii, verlore. Aber die doof Boje isch doch eso fotogen...
Und hütt händ's mer grad nomol e Falle gschtellt: Wil "Valentine's Day" isch, chasch hütt zoobig au nid uswärts go fuettere. Alli Schpünte sind voll uusbuechet! Guruguru...
13.02.2002. Dä Rägetag hani vor em Compi verbrocht: Ich ha "Railroad Tycoon" gschpilt, bis mer de A... wehtoh hätt! (Öppe am morge am vieri hani ufgört.) Das Spiel hani dehei schomol aagfange, aber wil's eso komplex isch, hanis dänn verschtaube loo. Und etz hani jo Ziit, und bi natürli scho süchtig worde...!...
Am andere Tag isch dänn wider wunderschön und heiss gsii. Und so hani es Bootli mit eme 25-Pfünder-Outboard gmietet und bi echli um Long Key umetuckeret. Und (typisch, alte Tubel) ha mer natürli en Prachts-Sunnebrand gholt!
Am Oobig bini dänn mit zwei knufflige Type liecht iigsunke: Doris & Bill. Die zwei sind öppe 70-gi und sauguet druff! De Doris iri Eltere sind Dütschi gsii, und si mag sich no erinnere, wis 1939 via Rotterdam i'd USA gflüchtet sind. Und de Bill hätt mer (ändlich) chöne erkläre, wa da mit dene "American Legion Post's" uf sich hätt. (Isch e Selbsthilfe-Organisation für Chriegs-Veterane, die Post's schtönd überall im Land.) Mer händ jedefalls meh als ei Chischte Michelob's entsorgt...
Und über dä komisch "BALAIR-Bomber" (HB-ILY), woni z'Tucson fotografiert ha, hätt de Mänu vo Biel d'Background-Story usegfunde: 1969 Stellte die Amerikanische Regierung dem IKRK und der Church Aid USA diese insgesamt neun Maschinen für Hilfeeinsätze zur Verfügung. Unter Schweizer Immatrikulation operierte die Balair in Afrika während elf Monaten zur Versorgung der Bevölkerung im Konflikt Biafra/ Nigeria.
Hütt vormittag bini dänn uf de Sugarloaf-Key KOA abegfahre. Glaubsch nid: Dä Platz isch eso rappelvoll, si händ mi in "Overflow" (diräkt bi de Marina) gschtellt. Eigentli hani wele drüü Nächt bliibe, aber si händ nu zwo Nächt frei ghaa. Isch mer aber grad gliich, woni nochhär uf Key West abedüset bi, hätt's mer fascht es Kabel gää! Stell der Mallorca i de 4. Juliwuche vor, öppe sovil Volk hätt's do! Und mit "Sloppy-Joe's Bar" macheds grad au en Art Wettrüschte...
Wohrschinli züchi gäge Ändi Wuche Richtig Lake Okechoobee wiiter. So langsam hetti's lieber wider echli ruhiger...
09.02.2002. Im KOA-Schpüntli isches no lässig gsii. Zerscht bini elei anen Tisch ghocket und ha gfuetteret (Conch-Fritters natürli, me isch jo schliessli uf de Keys...), und ha de Musig zuegloset. Dä Typ isch solo, mit ere akustische Klampfe, am "schaffe" gsii. Hätt guets Züüg gschpilt, echli Gordon Lightfoot / Paul Simon / Hank Williams und eso i dere Art. Und dänn isch es Päärli zu mir aneghocket, de Tom und d'Sue us Columbus (Ohio). Die zwei sind im Excavator-Business (Trax und Bagger) tätig und händ mer vo irne Sorge brichtet. Und dänn hätt me halt öppe ei Rundi "Bud's" um di ander bschtellt...
Und etz grad isches guet zwölfi am Mittag und weisch waa: Es pisst in Strömen! Und ich ha d'Klimaalaag iigschalte (wäg de Schwüeli) und hocke vor de Chischte und weis gar nid rächt, wani hütt söll aafange. Wohrschinli hocket dä blöd Murphy uf em Wölkli und lueget abe und freut sich... (grummel, brummel)!
07.02.2002. Geschter bini no i'd Everglades: Im Mikosukee-Reservat (nördlich vo de Alligator-Alley) händs e schöni Aalag i de Everglades: "Billy Swamp". Dött hani natürli grad mit eme Swamp-Buggy i'd Pampa müese. Isch no lässig!
Hütt bini uf d'Keys abe, uf de Fiesta-Key-KOA, dä Platz woni im letschte Mail eso gschwärmt ha. Isch würkli öppis vom schönschte, woni bis etz a KOA's gseh ha. (Allerdings isch de Priis au entsprächend -sovil hani no nie zahlt!) Jedefalls händ's e eigni Bootsvermietig (sogar Jet-Skis!), es Spüntli und es Pub mit Live-Musig. Dött füre haui's etz dänn grad...!...
05.02.2002. Flamingo isch würkli nüüt bsunders. Es hätt es paar Trails, wome cha umeschuene, oder mit eme Kanu umepaddle. Aber ich ha geschter s'Antibrumm vergässe mitznäh und i de Mangrove bini jo z'Fort Myers scho gsii. S'bescht isch da chlii Schildchröttli gsii, wo under Todesverachtig über d'Schross hätt wele. Ich ha jedefalls em "Highway-Jimmy" (so hanen grad tauft) übere gholfe!
Hütt bini dänn no uf'd Keys abegfahre. Z'Key Largo bini im "John Pennekamp Coral Reef State Park" das ominösi Koralleriff mit eme Glasbode-Boot go aagugge. Isch aber nüüt speziells. Da wür mit Taucher-Iirichtig und Underwasser-Kamera natürli vill meh härmache.
Nochhär bini dänn no bis Fiesta Key wiiter und ha de döttig KOA aaglueget. Isch fantastisch schön: Diräkt am Bach, eigni Bootsvermietig und alle pipapo, wome sich nu cha wünsche. De voll Karibik-Kitsch! Etz hani tänkt, dasi übermorn dött abe hebe und no es Ziitli uf de Keys verbringe. Isch zwar sautüür, aber ich glaub, da lohnt sich!
02.02.2002. Vo Fort Myers bini über de 41-er uf Miami überedüüset und ha uf em hiesige KOA grad emol es Wücheli buechet. Geschter hätt's de ganz Tag tropischi Rägegüss abeloo, aber hütt fiired's wider schwüelbrüetigi 89 Degrees (über 31 Celsius)! Ich bi jedefalls im eigne Saft gschwumme, woni Greater Miami abgchlapperet ha. Bi natürli überall gsii, wome als Turi nid häre sött: Little Haiti, Little Havana und im Hafeviertel. Aber Miami Beach (e vorglagereti Halbinsle) isch geil zum aaluege! Die "Art-Déco"-Bünker us de 20er Johr sind jedefalls total sehenswärt. Und di Riiche und Schöne us de ganze USA händ ihren Zweitwohnsitz alli doo.
D'History vo Miami isch so ne typischi "Ami-Tellerwäscher-Story". Vor hundert Johr isch de "Panhandle", de Nordweschte, s'eigentlichi Florida gsii (drumm au d'Hauptstadt Tallahassee). Miami isch dännzumol en vorgschobne Usseposchte i de Sümpf gsii, nid meh als es paar Blockhüttli. Und hütt isches grad umgekehrt! De Norde isch puritanisch protestantisch (di Iiheimische säged "Crackers" zu dene) und im Süde herrscht de total Boom ("everything goes..."), liberal und kosmopolitisch. Greater Miami hätt 2 Millione Iiwohner, knapp d'Hälfti devoo Hispanics. Sid em 1959 (wo de Castro s'Regime z'Kuba übernoo hätt), isch e riisige Zahl spanischsprochigi Lüüt iigwanderet. Aber di aktuell gröscht Iiwanderergruppe sind Rentner us em Norde! Und die bringed s'Sicherheitsproblem vo Miami wider i's Lot (emel statistisch, sit de spoote 90-er-Johr goht di berüchtigt Kriminalität massiv zrugg). Mir isch jedefalls hütt nüüt böses zuegschtosse, obwohl mis Buech seit: "...do not venture into Liberty City (s'Hafeviertel) at any cost... / ...Little Haiti should also treated with caution...".
30.01.2002. Geschter bini no schnäll bim "Blick" go's CH-Wätter aaluege. Ihr händ jo bigoscht über Null...!... (hihihi) Do händ's hütt schwüeli 85 ghaa, da sind (schwitzigi) fascht 30 Celsius!
Bi hütt echli um Pine Island und Fort Myers umekurvet. Öppis intressants hani z'Fort Myers entdeckt: De Thomas Edison (Glüehbire, Grammophon) hätt sini "Winter-Residenz" do unne ghaa, Türe a Türe mit em Henry Ford (Autos) und em Harvey Firestone (Pneus). Die drüü Type sind befründet gsii, jede uf sim Metier en Tüftler und en Art Genie. Das "Bäumli", woni gföttelet ha, hätt de Firestone 1923 us Indie mitbroocht und em Edison gschänkt. Und hütt hätt dä Cheib unglaublichi 122m Umfang! D'Sorte isch "Ficus Bengalensis", d'Amis säged em "Banjan-" oder "Walking Tree". Jedefalls sigs de tickscht Baum i de USA.
Und i dämm Mangrove-Urwald woni no umetappet bi, hätt's Manatees ghaa (de Tip hani uf em Campground überchoo). Leider gsehsch vo dene Viechers nume en verschwummne Umriss im Wasser. Und d'Moskitos händ mi gfrässe! Ha (trotz Anti-Brumm) öppe 20 Stich verwütscht. U da fröit eim!
29.01.2002. Also, etz mueni schnäll rapportiere: Vo Alligator Point ha der s'letscht mol gschribe. Dött bini drüü Nächt blibe, aber s'Wätter hätt mi nid rächt möge freue: Ticks Gwülch und dänn no en ganze Tag Piss, dänn hätt's mer abglöscht (sowieso, woni im Weather-Channel gseh ha, dass die Tüüfdruckzone nu über em "Panhandle" hanget).
Bi dänn südwärts wiiter uf Old Town (Suwanee River KOA) und nochhär uf St.Petersburg / Tampa (Tarpon Springs KOA). Und dänn hatt's Wätter ändli mitgmacht! Ha ämel beidi Klimaalaage müese aawörfe, woni geschter nomittag vo de "Leutsch" zruggchoo bi! Die Bildli vo de Schwammtaucher's sind vo dött. (Sind übrigens alles Grieche, wo da mached. S'ganz Quartier gseht uus, wie nes Käffli i de Ägäis.)
Hütt vormittag bini dänn uf Fort Myers losgfahre. Bi öppe am drüü hütt nomittag (schweissnass...) uf em Pine Island KOA iitrudlet. S'hätt 83 Degrees (öppe 28 Celsius) ghaa, und e richtig schön tropischi Luftfüechtigkeit. Bi jedefalls sofort an Pool! Etz isch es öppe 7.15 am Oobig, und di nöchscht Amtshandlig isch de Grill! Dä Siech hani etz doch scho lang nümme füregnoo...!...
Aber es isch glaub scho eso: Süd-Florida isch dä Platz i de USA, wo me de Winter mue verbringe! De Campground hätt 360 Plätz und isch (gschätzt) zu 90% voll! Fascht unglaublich. Und natürli alles "Snowbirds", ich chume mer vor wie en Teenager under dämm Volk! En Siech voll Kanadier hätt's do, offesichtlich hätt's meh als eine, wo kän Schnee mag verträge...
24.01.2002. Z'Perdido Bay bini zwo Nächt gsii und geschter wiitergfahre uf de "Alligator Point KOA". Die säged dämm Egge sälber "Florida's Forgotten Coast", und so chunnt's der au vor! Herrlich lauschigi Käffli (vili scho liecht verfalle) und schöni Beaches, aber eigentli menscheläär. Offebar zieht's d'Lüüt in Süde abe, noch em Motto: Wenn schon Florida, dänn grad rächt!
De Automat hätt bis öppe 20 Meile vor em Ziil problemlos funktioniert, dänn hätt er wider aagfange z'schpinne. Aber eigentli wotti etz no bis Miami (oder Umgäbig) durewürge, bis i Nägel mit Chöpf mache. Dött unne bliibi sicher eini bis zwo Wuche, und dänn chani für'd Ziit vo de Reparatur ine Cabin uuswiche.
Etz isches öppe Zäni am Morge und näblig, aber de Wätterbricht babelet vo 80 Degrees am Nomittag! So goil! Aber en Schiibechratzer bruuch i glaub au: De Sand vo de Beach und d'Salzwasserluft gänd en prächtige Belag uf de Schiibe...!...
Und, weisch wani no gseh ha: De Zeller uf de Houmpeitsch seit, etz sig definitiv Halbziit...!... ('s Glas isch no halbe voll, gäll...)
21.02.2002. Bi hütt losgfahre und gäge Oobig z'Perdido Bay (AL, aber nu e halbi Bruggelängi vo FL ewägg) iitrudlet. Öppe 20 Meile vor em Ziil hätt dä huere Automat tatsächlich wider aagfange z'spinne. Jenu, etz chumi halt nümme um e tüüri Reparatur ume. Aber es hett jo chöne sii...
New Orleans isch lässig gsii, aber etz fönd's a, uf de Mardi Gras iizrichte. Do wärded ganzi Schtrosse dekoriert und umgmodlet, die Schpinned voll! Und dänn hani no ghört, si erwartid 2 Mio. Bsuecher uf dä Aalass! Chasch der vorschtelle, wa dänn i dere (relativ chliine) Stadt abgoht? Und wil ich jo sowieso nid eso en "Fasnächtler" bi, hani beschlosse, da Puff müesi etz doch nid au no go aaluege... Und vilicht lauft mer jo z'Florida e blöds Krokodil vor'd Kamera!
20.01.2002. Bi hütt de 23-er südlich gfahre, bis es eifach nümme wiitergange isch. Dött unne bisch uf de Schtross en Ussesiiter! De mehrheitlich Verchehr spilt sich uf em Wasser ab. Aber isch scho no iidrücklich. D'Mündig vom Mississippi in Golf vo Mexico isch no sage und schreibe über 70 Meile underhalb vo New Orleans! Da mit de hungrige Ziitgenosse isch übrigens nid eso gföhrlich: Gators sind jo Chaltblüeter und drumm i dere Johresziit zimli Iigschränkt. Ich glaub, Winterschlof chame dämm nid säge, aber si hocked, Körperfunktione uf es Minimum reduziert, i irne Höhlene (Gator-Holes) und warted uf besseri Ziite...!...
Geschter isch ganz verreckt gsii: Um de Mittag ume hämmer 82 Degrees (öppe 27 Celsius) ghaa und schwüel, fasch nid zum uushalte! Und dänn isches innert ere guete Schtund arschchalt worde und hätt pisst, was hätt abemöge! Hütt isch de ganz Tag bewölkt gsii und empfindlich chüel. Die händ scho kurligs Wätter do unne!
Morn bini scho e ganzi Wuche doo. Wohrschinli züchi Richtig Florida wiiter, öppe bis Pensacola. Mol luege, was Wätter macht. Wenn's Chatze haglet, bliibi halt no es Tägli (oder so) länger.
18.01.2002. Schaad, hütt isch's Wätter nüme eso prächtig wie au scho. Geschter hätt's im Lauf vom Nomittag (woni i de Swamps gsii bi) aagfange zuemache. Eigentli hani wele is "Jazzland", en Vergnüegigspark mit böse Coasters, ganz i de Nöchi. Die händ i de Wintersaison au nu Friitig bis Sunntig offe. Aber etz bini echli unschlüssig...
17.01.2002. Geschter hani de Mississippi (stromufwärts) uf beidne Ufer abgchlapperet, zum Plantations z'knipse. Es hätt es paar würkli iidrücklichi Sache, aber meh gsehsch petrochemischi Fabrike und Zuckermühlene...
Am Oobig hani mi echli im Vieux Carré umetribe loo. I de "Preservation Hall" bini dänn zimli lang hangeblibe: Dä Schober isch eso truurig und gruusig, bi üüs würdsch nid emol me Härdöpfel iilagere i so öppisem...!... Die händ nu öppe 20 Sitzplätz (di andere 100 Lüüt schtönd), nüüt z'Trinke und au kä Pippibox! Aber für traditional Jazz isch da tatsächlich di "heiligscht Halle" vo New Orleans! 7 schwarzi Bäppels schpiled Dixieland, es würt der fascht anders... (de Reisefüehrer schriibt: ...unbelievably shabby room, but the music, played by old professionals, is outstanding...)
Sou, etz gangi uf d'Pischte! Hütt isch äntlich "Swamps" aagseit! Gang de Bach abwärts, Richtig Barataria Preserve. Bis d'Schtross ufhört!
15.01.2002l S'RV schiint momentan O.K. z'sii. Bi jedefalls vo Lafayette dohäre ohni Problem choo. S'Überdruckventil chönnt aber de Grund für's Wasser uf em Schloofzimmerteppich gsii si. Er isch emel etz troche. (Ha jo nie usegfunde, warum dä Siech immer nass gsii isch.)
Geschter bini uf em "Mardi Gras RV Park" iitrudlet. Isch nüüt schöns (*** im Wheeler), aber tatsächlich nume 5 Meile vom Vieux Carré entfernt. Do bini hütt echli go umeschneugge.
Wani hütt no gseh ha: S' Pharmacy Museum. Do haui's natürli ine, wenn i echli früener draa bi. Isch au im French Quarter, Egge St.Louis/Chartres Street. Und überhaupt: Es wimmlet vo "geile" Sache...!...
13.01.2002. Hütt hani no e Rundi nordwestlich um Lafayette trüllet (Crowley / Eunice / Mamou / Basile / Evangeline / Jennings und zrugg). Aber etz hani's gseh. Die Gägend git nüüt me här. Morn züchi gen New Orleans wiiter.
12.01.2002. Ich bi immer no z'Lafayette: Bis vorgeschter hani scho rapportiert. Geschter bini i de Tabasco-Fabrik z'Avery Island gsii. Isch no sehens- und vor allem schmöckenswärt! De Gruch im ganze Areal isch fascht unbeschriiblich! Halt wie wänn'd würsch d'Badwanne mit Tabasco fülle und driihocke... Die händ übrigens en Sauschtolz, wils da Züügs au drüü Johr i Eicheholzfässer laagered. So vergliiched's sich gärn mit Wiihärsteller!
Am Hiiwääg hani no öppis iidrücklichs erläbt: Do isch mer en Konvoi vo öppe 30 Polizeiauto entgägechoo, alli mit iigschalteter Discobelüüchtig (aber ohni Sirene), und zmitzt drin sind 5 Liichewäge gfahre. Da hätt mi scho echli tschuderet! Wa händ ächt die für e Schüüsserei (oder so) ghaa? Und hinnedrii en meilelange Schtau...
Woni zrugg choo bi, isch zerscht emol grossi Action losgange: Us em Überdruckventil vo mim Water-Heater isch's Wasser usegschträäzet dass es e wahri Freud gsii isch! Zum Glück händ di liebe Sieche uf em Campground e sones Ventil ghaa (und au eine, wo's hätt chöne ersetze).
Gescht z'Oobig schpööter bini dänn würkli no Downtown i's "Randols". De Seafood isch sauguet gsii, aber die Musig... Noch öppe zwoo Schtund hani scho zimli s'Muffeflattere ghaa! Also das Cajun- und Zydecozüügs isch scho zimli Gschmacksach! Und zu allem ane wänd's di no allpott zum Tanze cho hole...
11.01.2002. Hütt bini echli im Hinderland vo Lafayette umeturnet. Mit Swamps isch es allerdings zimli überblickbar: Mehrheitlich topfebes und troches Land.
Aber defür hani suscht öppis scharfs entdeckt: Gübi-Town (St. Martinville) und Frosch-City (Rayne). Das Kaff nennt sich sälber "The Frog Capital of the World"... (isch klar, die wüssed no nüüt vo Altnau Niederdorf...) I däm Rayne händ's früener tatsächlich im grosse Stil Frösch züchtet und d'Schänkel i di ganz Wält exportiert. Hütt isch da zwar verbii, aber d'Wandmoolereie (Murals) sind wiit umenand berüehmt.
Isch natürli schad, das mer da s'letscht Mol nid gwüsst händ, wo mer do durechoo sind. Frosch wär eventuell grad Ehrebürgeri vo Rayne worde...?... Uf jede Fall hett si de Plausch ghaa!
Eigentli hani morn wele wiiter, aber ich bliibe glaub nomol en Tag länger: D'Fabrik vo de Firma Tabasco isch do i de Nöchi, z' Avery Island. Do müesst me doch au no go inegugge, wäme scho emol do isch, oder? Und morn z'Nacht sött me Downtown echli Cajun und Zydeco go inelogooloo... (S'hätt grad es paar Schöber, wo am Samschtig Live-Musig abgoht!).
10.01.2002. Bi hütt z'Lafayette aachoo. S'Wätter isch hütt bezoge gsii, aber superschön warm. Etz isch es halbi Zähni und ich hocke bim offne Fänschter am töggele (ohni Öfeli, natürli...)! Und morn haui's i'd Swamps go güxle.
09.01.2002. New Orleans machi uf jede Fall nomol. Vo Shreveport (nüüt bsunders zum Aaluege) hebi morn emol südlich bis Lafayette. Dött bliib i sicher au no zwo Nächt und nochhär machi wohrschinli en diräkte uf New Orleans. Baton Rouge wär zwar vilicht au no en Bsuech wärt... Hani wider schöni Sorge, hmm?
Geschter hani no de Weather Channel im TV gseh. Glaubsch es nid, etz isch es im Weschte (Arizona, etc.) über 80 Grad warm. Florida isch beschisse...!...
07.01.2002. Hütt bini uf Shreveport abedüüset, ohni s'chlinscht Problem mit em Automat. Die Sau hätt sogar z'vill Oel dinne...!...
Mer händ tatsächlich 70 Degrees, uf morn händs sogar 73 aagseit. U da fröit eim! Und weisch waa: Etz hani s'erscht mol en "On-Site-Phone-Hookup"! Da bedüütet wohrschinli, dass Vatter di ganz Nacht am Internet verbringt...!... So goil!
D'Bellamy-Brothers hani uusfalle loo, aber ha defür am Flohmärt us luuter Verrückti 7 Musigvideos chauft, für 1.99$ s'Stuck.
06.01.2002. Geschter bini im Billy Bob's de David Allan Coe go lose. Dä Typ muesch der öppe vorschtelle, wie eine, wo letscht Wuche di erscht AHV überchoo hätt. En Aablick, wie us em Lehrbuech "Rocker für Fortgschrittni...". De Bart isch fascht no länger als de Zopf. Aber d'Musig isch schteihärte und sauluute 70-er-Johr-Rock. Und en abgrundtüüfe Bass massiert der's Zwärchfäll! Als Country chame da etz würkli nu mit vill Goodwill bezeichne (Lynyrd Skynyrd isch degäge scho fascht ballademässig).
Und es Indoor-Rodeo händ's au! 9 Bullriders hani gseh absattle. De längscht isch öppe 6 Sekunde dobeblibe... Leider isch em "Pfürzli" sin Blitz eifach z'schwach für so Züügs, d'Bilder sind nid gschiid worde.
De Fuzzy am Box-Office (Biletschalter) hätt gseit, si siged hütt z'Oobig für'd Bellamy-Brothers uusgschosse, s'heg käni Bilet me. Aber ich söll's doch eifach probiere, vilicht sägi jo öpper ab. Etz bini echli am Zwiifle: Uf's Grootwohl uf Fort Worth überedüüse...?...
Woni vom Billy Bob's heichoo bi, hät's aagfange z'Rägne. Aber tüütlich wärmer, als di letschte Täg! Uf de Ziischtig hätt de Forecast 65-70 Degrees (öppe 20 Celsius) aagseit. So hani grad nomol 3 Nächt uf em Trader's Village verlängeret. Wott wider emol a de Sunne höckle und echli schwitze...
31.12.2001. Chalt, chalt, chalt - nüt mit Zäh buze: Im RV isch's Wasser iigfroore... Hütt Oobed mached mer uf irgend en Art Fondue - Wohrschiinli ufem Gashärd und jede lauft de Reie no dra vorbii und holt sich sin Bolle.
30.12.2001. Fertig mit Sünnele: am gröschte Floomärkt vo Texas isch asewäg arschchalt gsii, da sich Hausi umgehend e Polar-Daunejagge kauft hätt. Als Chopfwärmer händ sich dänn alli drei Manne i de Stockyards no en böse Cowboy-Huet zuetue. Im Billi-Bobs, eme härzige Schpüntli mit grad emol 6000 Pläz hämmer no z'Nacht gässe - da hingege isch nid Wältklass gsii, sälber choched mer alleweil besser.
29.12.2001. Öppe 175 Meile weschtlich uf Dälläs - Frosch und gübi händ bi däre Glägeheit de Tschiip wider mol chli bewegt. Am Flughafe hämmer dänn no e Edelkarosse gmietet, de gwünscht Miniwään händ's jo nid gha.
28.12.2001. Nordwärz uf Texarkana, TX. Dä Cämping hoket tiräkt uf de Gränze zwüschet Texas und Arkansas - ein grosse Schritt, und du bisch dänne. Do simmer wider echli a de Sunne ghoket und händ bi däre Glägeheit em Haus sis Chüelschrank-Schublädli entsorge loo - na ja... (zum guete Glück isch de Inhalt (rooted mol: richtig! Pier!) scho gso... gsii...
27.12.2001. KOA Shreveport, LA. Dä isch wägeme Football-Schpiil pumpevoll gsii und mier händ mit Müe und Not grad no e Pläzli gfunde. Am Nomittag simmer bi brüetiger Hiz hämpsärmlig a de Sunne ghoket und händ üs de Schtei verbröötle loo.
26.12.2001. Weschtwärts bis Monroe Pavilion RV Park, LA. Grundhässlich, aber mit de schönschte WC- und Gmeinschaftsaalaage. Gässe hämmer wider scheusslich: Tschili a la Hausi - und da erscht no schpezial.
24./25.12.2001. D'Wiehnachtstäg hämmer z'Jackson (Missouri) uf eme guete Platz verbrocht. Mer händ e unglaublichi 2-tägigi Frässorgie veraaschtaltet: S'Menu hät sich vo Salat / Hüehnerflügeli / Spare Ribs / Filetsteaks / Süesshärdöpfel / Härdöpfelstock / Röslichööl / Bohne, etc.etc. bis zu Nusstorte mit Kafi (und natürli Härzwasser) i'd Längi zoge... Am Schluss sind alli mit chugelrunde Ränzli umeghocket und händ gsüüfzet...
23.12.2001. Uf de Cajun Queen hätt's allne gfalle - Frosch hätt scho's erscht Mol Wienacht gha. Mier sind nochem Iitunkle bi Live-Dixiemusig und eme schöne Buffet zwei Schtund uf em Mississippi umekurvet. Nochane simmer nomol a d'Bourbon-Street e par Hurricanes (Frosch's und Lis' neue Lieblings-Drink) und e par Pier (Hausi's und Gübis Lieblings-Drink) go ie zieh...
22.12.2001. Mer händ's bis New Orleans gschafft und sind grad a'd Bourbon Street go Musig inezieh. Geschter hämmer e Stadtrundfahrt gmacht und sind eine vo dene berüehmte Fridhöf (City of the Dead) go aaluege. Morn gömmer uf d' "Cajun Queen" (en Schufelrad-Dampfer) anes Jazz-Dinner uf em Mississippi River.
20.12.2001. Wiiter de Küschte entlang, Richtig Louisiana. Mer sind bis Lafayette cho und händ uf eme schöne KOA übernachtet.
18./19.12.2001. S'Houston-Space-Center go aaluege. Vo do uus wärded alli Ruumflüüg vo de NASA gschtüüret. Abschüsse tüend's die Dinger aber z'Forida. Isch allerdings vor luuter Sicherheits-Türgg echli müehsam!
17.12.2001. Da hämmer au fertigbrocht. Au mit de verkappte Rennfahrer (si warned di überall vor em Verchehr z'Houston...) simmer ganz guet fertigworde. Am Oobig hämmers erfolgriich fertigbroocht, zwo Schtund lang en Läbesmittel-Lade z'sueche!
16.12.2001. Richtig Golf vo Mexico ghebet und imene chliine Kaff übernachtet. Unglaublich warm, scho fascht echli schwüel... Morn fahred mer de Küschte entlang uf Houston übere.
15.12.2001. Hütt simmer (wider im Piss) bis Fredericksburg gfahre. Da isch e düütschi Sidlig. Me gseht's de Strossenäme und de Restaurants aa: "Ausländer Bierhalle" und so... Gübi's Eltere, d'Lis und de Herbert, händ hütt iri goldig Hochziit gfiiret. Mer händ natürli en Schampus und e Torte dezue uufgworfe...
14.12.2001. Noch em "iipuffe" simmer no bis Temple (120 Mls.) Richtig Süde gfahre, bi schönschtem Sunneschii.
13.12.2001. Gübi's und Frosch am Airport abgholt. Wider besch... Wätter! Aber mer händ trotzdäm de Grill aagworfe und ganz vill Michelobs nidergmacht...
12.12.2001. D'Stockyards (de Viehmärt) vo Fort Worth isch würkli sehenswärt! S'ganz Quartier isch e reschtaurierti "Western-Town", wie me sich da bi üüs vorschtellt. Und de Schpunte (Billy Bob's) isch entschprächend: Öppe 3000 Plätz, e paar Bar's und zwo Live-Bühne. Alli Country-Superstars sind do scho uufträtte oder händ iri Karriere do aagfange. S'Wätter isch gschpunne: Wi wenn eine würd am Schalter trülle! Hütt isch schtrahlende Sunneschii und warm gsii!
11.12.2001. Hütt simmer inere "Mall" gsii go poschte, will s'Wätter nüt bessers erlaubt hätt. S'hätt de ganz Tag eifach nu pisst!
09.12.01 Hütt simmer z'Oobig de Pädi (Noel's Junior) am Airport go abhole. Übrigens de gröscht vo de Wält (stoht jedefalls i mim Texas-Reisefüehrer). Das Ding isch würkli "e Stadt i de Stadt"! Grad näbem Campground isch de gröschti Flohmärt vo Texas: 1800 Ständ! Do chasch di z'Tod pöschtele... Zum z'Nacht simmer mit Noel's Kollege (Luc und Judy) ines Steakhouse go fuettere. Super gsii!
08.12.2001. Mir sind bis uf Dallas duregfahre (330 Mls.) und händ uf em "Traders Village RV Resort" grad für e Wuche buechet. Dänn chömed s'Gübis aa! (Geil: E "troches" County... Wii und Härzwasser gits erscht z'Fort Worth, öppe 12 Mile ewägg...) Aber ich bi froh, das mer do sind. Di letschte 3 Tag hani gnueg Meile gfrässe, öppe 1000.
07.12.2001. Total ödi, kargi Wiitene! Und massehaft "Esel" (Ölpumpe). Au de Gruch isch entsprächend. Leider hätt min Grossvatter do e kä Land gchauft, wo mes no gratis überchoo hett... Koma hätt aaglüte, si sig guet aachoo 6.12.01 Am 04.15 uf em Flughafe gschtande. Die händ wele, das me drüü Schtund vor Abflug dött isch. Schiins hegeds dänn aber de Schalter erscht am halbi sexi ufgmacht. So goil... A dämm Tag simmer no bis El Paso (Texas) gfahre.
05.12.2001. Em "Koma" sin letschte Tag. Und am Nomittag hämmer d'Noel am Airport abholt. So quasi en "flügende" Wächsel...
03.12.2001. Mer sind hütt (im schtrömende Piss) vo Phoenix uf Tucson abegfahre. Etz (öppe halbi sexi am Oobig) schiint sich vo Weschte e Wätterbesserig aazbahne, s'isch scho chli blau am Horizont! (Oder sind ächt da die drüü Michelob...?...)
01.12.2001. Z'Vegas hämmer allerlei Züügs gmacht: Hütt simmer (mit em Jeep) über Beatty und dur's Death Valley zrugg uf Vegas. Dä Cher isch zimli genau 300 Mls. lang. Me isch drum es bitzli uf de Schnäuz... S'Wätter isch sunnig bis liecht bewölkt gsii. Aber chasch der vorschtelle, das me im Death Valley e Jagge aaleit...?...
Geschter hani's Koma uf de Flüüger (Grand-Canyon und Beigemüse) too. I dere Ziit bini mit em RV umeghaset: En chliine Service mache loo, uuftanket und dä Siech inere Wöschaalag (vo Hand) gwäsche. Weisch wie mänge Quadratmeter...?...
Vorgeschter hani es Erfolgserläbnis ghaa: Ha äntli gschiidi Campinglampe (für de Ussetisch) gfunde. Und en knufflige Schtaubsuuger(...!...), e geils Teil. Er hätt au scho en Name: "The Red Devil". (S'Koma hätt gmeint, si heg bis etz no niemer kenneglernt, wo en Staubsuuger geil findi... Isch ächt da en Alterserschiinig?)
Aber am Oobig am Strip hätt si no's grösser Erfolgserläbnis ghaa: Si hätt tatsächlich am Roulette-Tisch 350$ (netto) abgsahnet... Ich hanere fortzue di grosse Chips ewäggnoo, so hätt si nu mit de 1$-Chäfer gschpilt. (Wenn da de Max wüsst...)
28.11.2001. Hütt z'Oobig simmer z'Vegas aachoo und grad is Monte Carlo as Buffet. Nochhär im NewYork NewYork uf de Rollercoaster. Z'Vegas isch Scheisswätter und bitterchalt...!... Chasch da glaube? Die händ (gemäss Baxter) 350 Sunnetag im Johr! De Wätterbricht hätt au nüüt erfreulichs gwüsst. So en Chotz!
28.11.2001. Im Kaff Mojave ist es zum ersten Mal passiert: Ein Polizeiauto mit Lightshow hinter mir...!... Shit! Eine ziemlich streng aussehende Sergeantin und ein Typ in schwarzer Uniform kamen auf der Beifahrerseite an’s Fenster. Musste die Fahrzeugpapiere und den Führerausweis abgeben. Dann die ersten dummen Fragen: Wieso Arkansas und California? Wieso verschiedene Adressen bei den Jeep-Papieren? Und noch eine andere im Studentenausweis? Nach einer Viertelstunde können wir losfahren. Aber mein aufschnaufen hat nix genützt: Nach zwei Meilen wieder das gleiche Polizeiauto hinter uns. Wieder anhalten. Diesmal konkretere Fragen nach Pass und Visum. Der Typ fragt ganz direkt, ob ich je in Sta. Barbara war. Habe ich bejaht, war ja am Labor-Day-Weekend mit den drei Madels dort. Irgendwas ist den Cops über Funk durchgegeben worden, aber was genau habe ich nicht geschnallt,. Nach einigen weiteren Fragen sagt der Mann zur Frau (offenbar die Chefin), mein Einreisedatum sei ja nach dem ominösen Vorfall. Und so lassen sie uns nach längerem Palaver wieder weiterfahren. Ein leichtes Muffensausen habe ich schon verspürt...
26.11.2001. Geschter simmer am Morge biziite uf SFO gfahre. Mir händ's uf d' Elfi-Mäss im Glide Memorial gschafft . S'isch wider es total guets Erläbnis gsii. Koma isch emel ganz erschütteret usecho...
Nochhär hämmer e uusgibigi Stadtrundfahrt gmacht, sind am Nomittag is Amoeba go CD's poschte und am Oobig simmer mit em Ben und sim Girl is "House" (fantastisch) go fuettere.
Dänn hämmer's natürli nid chöne loo, und sind is "High Tide" (min ehemolige Stammschpunte) go iisinke. Sind no es paar vo mine alte "Spezi's" uuftaucht, und so isch es dänn sauschnäll 02.00 worde. Dänn isch's Koma uf Petaluma gfahre und mir Tubi's händs no uf 04.30 uebroocht... (me hätt jo no schnäll di neue CD's müese aaschpile...)
So hani halt hütt am Morge beschlosse, mir bliibed nomol en Tag z'Petaluma... Mer sind dänn schpööter is Napa Valley und no zum "Old Faithful". Mer händ de ganz Tag Sunne ghaa, aber zimli chüel.
Im Radio bringet's etz grad en scheussliche Wätterbricht (Heavy Rainstorms und Schnee bis 2000 Fuess...) Da heisst, das mer morn Richtig Süde losfahred. De Tahoe-Egge hani gschtriche, wott mit minere Gumichue und em Tow-Vehicle ganz sicher nid in Schnee...!...
22.11.2001. Mir sind hütt z'Buellton im Flying Flags. Unglaublich: Universal Studios sind wäge Thanksgiving gschlosse. So simmer halt wiitergfahre. Hütt zum z'Nacht gömmer natürli en Turkey go iiwörfe (ha imene Restaurant en Tisch reserviert). Uf das Dinner bini emol gspannt.
21.11.2001. Z'San Diego simmer geschter vormittag i's Sea-World. Mir händ tatsächlich 3 Shows gseh: Delphin / Seelöwe / Shamu. Alli sauguet! Damol hätt mi zwar d'Shamu nid eso vom Hocker grisse wie s'letscht Johr. Aber isch vilicht z'wenig Ziit-Dischtanz dezwüsche! S'Koma hätt jedefalls mit seltsame Kuscheltier Bekanntschafte gschlosse...
Nochhär simmer Richtig LAX losdüüset und öppe am sächsi uf em L.A.-Pomona KOA aachoo (am füfi isch es stockfiischter, und zum Glück isch au no d'Autobahnuusfahrt gschlosse gsii, goil...!...). Aber dänn hämmer es Full-Rack Rippli uf de Grill gschmisse und de Oobig isch grettet gsii!
Hütt simmer z'Anaheim im Disneyland gsii (Koma-Wunsch). Ire hätt's gfalle, aber es isch scho eso: Wänn'd ein Disney-Park gseh häsch, kännsch eigentli alli. Hütt hauemer en Satz Rindsfilets hindere! (Immer die blöde Hamburger, gäll...)
19.11.2001. S'Wätter isch bis etz genial! Sunne, gueti Temperature und e sautrochni Luft (git Durscht...). Z'Nacht chüel und etz grad sogar echli "hündelig"...
Abschtürz hämmer bis etz jede Oobig fertigbrocht (Hütt hämmer di ganz Infraschtruktur müese haa: Härzwasser, Rosé, Bacardi und Pirr...)
19.11.2001. Vorgeschter hämmer usserplanmässig en Tag z'Tucson aaghänkt, wil mer uf de Sch...koffer vom Koma gwartet händ. D'Uuskunft vom Delta Baggage Service isch die gsii, dass de Koffer erscht am 17. z'Züri use sig. Mit däm Ding isch es äbe so ne Sach: D'Pippi hätt en de Margot vertlehnt. Und dänn isch de Murphy is Schpiil choo: Z'Chlote isch er natürli uufgheit, wil d'Schlösser irgendwie kabutt gsii sind. So hätt's Koma e Schnuer gnoo und en zuebunde. Und die Schnuer hätt's wohrschinli fertigbrocht, dass de Koffer irgendwie i de Förderaalag hangeblibe isch...
Geschter hämmer denn nomol de Flughafe abchlapperet (zum 5. Mol...) und händ beschlosse, mir weled etz nümme länger warte und sind (Richtig Yuma) losgfahre. Und dänn wider Murphy: Noch drü Viertelschtund lütted's Handy, und d'Debbie vo Delta isch draa. De Koffer sig etz aachoo. Dänn simmer nomol umgchehrt und händ das Ding in Empfang gnoo. Hosianna...!... Geschter z'Nacht simmer z'Yuma gsii. Hütt simmer biziite z'San Diego uf em KOA iitrudlet, sind es Schtündli oder so an Pool und nochhär de Harbor-Drive duruuf- und durappgfahre.
17.11.2001. Immer no z'Tucson! Hüt simmer natürli wider am Airport gsii, und händ s'erscht mol e bruuchbari Uuskunft überchoo: De ominös Koffer sig erscht hüt Morge z'Züri uf'd Reis gschickt worde... Wenn alles rund laufi, sig er hüt mit em 22.04 Flug vo Atlanta do! Bi emol gschpannt!
14.11.2001. Geschter bini schnäll i'd Colossal Cave. Chasch eigentli vergässe, wenn's d'Kartchner Caverns gseh häsch! Au Historical District Tucson isch zimli chalte Kafi. Am Wäg uf de Campground hani en Car Wash gseh. Sofort ane, go Jeep fidle. Am Heiwäg sind di erschte Tröpfe gfalle. Und chuum hani s'Verdeck dobe ghaa: En ultimative Wolkebruch! Jenu, hütt isch wider s'schönscht Wätter. Etz gangi halt nomol go Wäsche...
11.11.2001 Zerscht uf em 77-er nördlich düset, i de Nöchi vo Oracle (ca. 30 Mls. vo Tucson) isch's "Biosphere II". E voll gschtörts Ding, wo's do i'd Wüeschti ineklotzet händ! Es paar Facts: S'Gländ: 3,15 Acres, S'Gebäude: 7,2 Mio. cubic feet, Höchi 91 feet. Ca. 2000 Spezies (natürli ohni Mikrobe). De Bau hätt 200 Mio$ koscht, isch vomene texanische (muusarme) Öl- und Viehmensch zahlt worde (er chunnt au für di monatliche Fixchöschte vo 1 Mio$ uuf...). Betribe und wüsseschaftlich undermuuret würd's vo de Columbia University (New York). Si leged e ganz sympathischi Bescheideheit an Tag: Uf d'Frog, wa denn "Biosphere I" sig, isch d'Antwort eifach "the earth"...!... Das Gebäude isch eso fantastisch, dass i mit minere chliine Kamera eifach nüüt gschiids cha uusrichte (ein vo de wenige Momänt, woni mer e "richtigi" Apparatur mit Wiitwinkel, Tele, etc.etc. wünsche).
Am Heiwääg bini is "Titan II Intercontinental Ballistic Missile Silo" uf em I-19 (20 Mls. südlich vo Tucson) go gugge. Erschtuunlicherwiis händ's mi ineloo (ha liechti Zwiifel ghaa)! Das Ding isch natürli es Relikt us em chalte Chrieg, isch Endi 80-er Johr (im Rahme vo de Salt-Abkomme) vo de Air Force uufgää worde. Apropos chalt: Eso lauft's der der Rugge durab, wenn d'ghörsch, das sones Monster en 7-Megatonne-Nuklearchopf treit. (Rächne mol uus: Uf en Ami-Isebahnwage chasch 40 Tonne TNT lade. Wivil Isebahnwäge voll TNT bruuchsch für die 7 Megatonne...?...) Und elei i de Umgäbig vo Tucson händ's 18 söttigi Silos ghaa... S'Triebwerk vo de 1.Stufe hätt en Schub vo 430'000 Pfund entwicklet (meh als 17 F-16-Kampflugzüg!) Aatribe händ's es mit "a fifty-fifty blend of hydrazine (N2H4) and unsymmetrical dimethylhydrazine (UDMH), called = FUEL, and nitrogen tetroxyde (N2O4), called = OXIDIZER. Both of these propellants were extremely toxic..." S'bescht a dene Dinger isch sicher, dass es nie bruucht händ. Wo wäred mir suscht ächt hütt...?...
10.11.2001 Geschter hani wele uf de Mount Lemmon, underwägs wider umkehrt (ha dermasse an Arsch gfroore...). Dänn bini halt echli go lädele und nochhär an Pool.
Hütt: Projekt nomol gschtartet (mit Jagge). Isch e lässigi Tour, öppe 70 Mls. Uf em Gipfel (öppe 9000 Ft.) tatsächlich en Skilift!
Am Abewäg hani s' AMARC gsuecht (und gfunde), leider lönd's di nid ine. Aber de härtischt (bi fascht uf de Arsch gheit) isch die Boeing C97 "Stratofrighter" mit em Balair-Schriftzug und em Hoheitszeiche HB-ILY. Wie isch ächt da här- und zuegange?
07.11.2001. Bi hütt vo Lordsburg uf Tucson überedüüset. Hanen wunderschöne Platz gfunde und grad bis am 16.11. buechet: CACTUS COUNTRY RV RESORT. Dä Cheib isch zwar relativ tüür, aber defür isch de Pool no offe, si händ en Data-Port, Kabel-TV und pipapo. Bi hütt scho chli am Pool ghocket und ha s'Ränzli a'd Sunne ghebet...
06.11.2001. Bi hütt am vormittag im schtrömende Piss vo Silver City uf Lordsburg abegfahre (chasch scho fascht säge: gflüchtet...)! Und tatsächlich: Do unne händ's schöns Wätter! Also im Momänt hani min "Bärg-Trip" gseh, etz wotti eifach wider schön und warm und Pool, etc.etc.
De Lordsburg KOA isch ähnlich wie's Kaff: Zimli überblickbar! Dene ires Glück isch einzig, dass öppe 1851 e Stagecoach-Linie do dure gfüert hätt. Und schpöter händ's d'Isebahn au do gleit.
05.11.2001. Vo wäge, Barclay siged mer scho wider mol uusgange: Schliesslich händ's es z'Altnau gschafft, em Metzgi kä Schlüüch für mich mitzgäh...!... Ich rauch scho sit Wuche Camel Menthol. Und da vom Grindweh stimmt grad au! (...amtereckte...)
(Wägem Gwaggle hani no wele säge: Je 1,5 Miles (eimol ufe und wider abe...!...) Da tüecht mi no der Erwähnig wärt... (hihihi))
05.11.2001. Bi hütt uf em Mogollon-Trip gsii. Underwägs, z'Glenwood, händ di Verrkuckte Ends letschts Johrhundert e Pipeline us eme Canyon füre baue, für'd Erzmühli. Dä sogenannti "Catwalk" bini öppe 1,5 Mls. hindere- und wider füretipplet. Mogollon sälber isch öppe 14 Meile wiiter i de Hills inne, absolut pittoresk und sehenswärt. Das isch i de 1880-er Johr e riichs Bergwärks-Städtli gsii, die heged für Millione Dolores Gold und Silber abbaue. Hütt hät's no 5 Iiwohner, wo immer no i de alte Mine umegusled... Leider isch's Wätter nid uf minere Siite gsii. S'erscht mol, sidi underwägs bi, hät's richtig pisst!
04.11.2001. Und hütt z'obig bini dänn im Buckhorn-Saloon gsi. Unglaublich: Dött chasch fantastisch ässe! Da gäbsch däm Schober z'allerletzt, wänn d'en vo usse gsehsch (siehe Foti)! Si händ sogar e Live-Band ghaa (2 Maa), wo di allerdings nid vo de Söcke ghaue hätt. Aber de Schpunte isch jedefalls en grössere Abstecher wärt. Dä figuriert etz bi mir under Gheimtip!
04.11.2001. Hütt hani e heissi Fahrt gmacht, die wär ganz i dim Sinn! Vo Silver City über San Lorenzo, em Mimbres River noo duruf, dur d'Gila Wilderness bis zu de Gila Cliff Dwellings (Wohnhöhlene vo de Mogollon-Indianer, A.D.1270), und zrugg entlang em Cherry Creek über Pinos Altos uf Silver City. Da Ding chasch der öppe vorstelle wie de Vivione-Pass, nu stundelang! Underwägs chrüzisch au no de Continental Divide. Isch ganz e lässigi Tour. Da isch äbe scho s'gääli vom Ei: S'RV stooloo und mit em Jeep im Züüg umechroose... (Mit de Chischte chämtisch nid emol du uf d'Idee, do dure z'welle...)
03.11.2001. Bi hütt am Morge Richtig New Mexico losdüüset, de Lordsburg KOA hani aber links ligeloo. Da isch mer doch gliich z'vill Wüesti gsii! Ha gseh, dass es in Silver City nomol en KOA git. Das Kaff isch uf 1800m obe und liit wunderschön i de Hills. S'KOA-Müetti hät mer so vill Züügs zum aaluege i de Charte iizeichnet, dasi grad drüü Tag buechet ha. Si händ sogar en Modem-Stöpsel: Im KOA-Büro (s'Müetti hät gseit, si ruumi dänn de Schriibtisch vorhär no uuf...!...) Isch da nid härzig?
01.11.2001. Morn hebi wohrschinli mit em Gschpann Richtig New Mexico übere. Dänn bini e Wuche z'Benson gsii. Ha glaub öppe 800 Mls. vo de Umgäbig abgchlapperet. Insgesamt bini öppe 6 mol i ne Strossesperri vo de Border Patrol inechoo (wäge de Gränznöchi), aber de letscht Officer hätt mi nid eifach duregwunke. Dä hätt saublöds Züüg gfroget...
27.10.2001. Hütt bini ufere Kurve dur's Conchise County gsii. Tombstone isch no glatt, aber halt zimli "touristy". Morn gangi uf en anderi Siite (Benson / Willcox / Douglas und zrugg), hätt öppe 4 Ghosttowns underwägs.
26.10.2001: Zerscht schnäll mini neu Location: Benson KOA (40 Mls. südöstlich vo Tucson), nöchi Mex-Gränze. Isch zwar nüt wunderschöns, aber ich ha e Wuche buechet. I de Gägend git's allerlei intressants: Hüt gangi uf Tombstone (du weisch: OK-Corral, Wyatt Earp, etc.). Dänn händs sid em '99 e neus National-Monument: Karchner-Caverns. Und s'Wätter isch herrlich: Geschter nomi am Pool hani 35 Grad ghaa, und i de Nacht chüelets wunderschöö ab!
26.10.2001. Bi hütt uf em Apache-Trail gsii, dä füehrt um das "Lost Dutchman"-Gebiet ume, über Page zrugg uf Apache Jct. Di säb Gägend isch au inträssant, jeglichi Mines, wo hütt no gschaffet würt. Wini gseh ha, baued's Copper ab. Leider chame die Bärgwärk nid besichtige.
Wunderschöns, warms Wätter (92 Fahrenheit hani uf eme Wärbeschild gläse!). Nochhär natürli an Pool und echli gsünnelet. Z'Nacht hani mer es Pork Tenderloin (Schwiinsfilet, mariniert mit Sänf und A1) uf de Grill gschmisse und en Sweet-Potato gmacht. Fantastisch...
23.10.2001. Ich bi hütt no z'Flagstaff uf em KOA, morn hebi Richtig Phoenix (Apache Junction). Dött bliibi sicher e paar Tag und tue echli umeschnüffle. Wohrschinli gangi dänn Richtig Tucson, aber bi no nid sicher.
23.10.2001. Geschter hani mit de "Trissa" e gröberi Party im RV gfiiret, hätt emel zimlich gsuuset hütt am Morge... Öppe am 11fi hani no es Ründeli (200 Mls) über de Grand Canyon trüllet. (Bildli sind au underwägs.) Hütt oobig blibt's jedefalls schö seriös dehei...
21.10.2001. En erfreulichi Überraschig hani erläbt, woni's RV z'Las Vegas bi de Abfahrt ufgfüllt ha: Ha für 550 Meile "nume" öppe 56 Gal. Sprit bruucht, das sind, weni richtig grächnet ha, knapp 24 Liter uf 100 km! (Und das mit em Gmorks über's Death Valley!) Do chasch würkli nüüt säge, schliesslich beweged sich doch öppe 12,5 Tonne! Und würkli windschlüpfrig isch das Teil jo au nid grad...
18.10.2001. Morn fahri uf Flagstaff, ha am Oobig mit de Ursi und em Mänu (vo de Schuel) dött abgmacht. Die zwei schlofed e Nacht bi mir, mit Grillparty und allem, wa dezue ghört.
18.10.2001. Ha der jo scho gschribe, dass d' American Airlines d'Liebi mit Swissair ufkündt hät. Wäge dämm hani mer dänn überleit, ob i de Metzgi nid gschiider diräkt uf L.A. söll charre, anstatt wie planet uf Phoenix. (Vo de Dischtanz här isch es zimli ghupft wie gsprunge.) Da hämmer denn eso gmacht und sind geschter morge mit em Jeep uf L.A. gfahre, händ Universal und Hollywood aaglueget, ei Nacht imene Motel verbrocht und hütt vormittag hanen am LAX Airport uusglade. Em Metzgi hätt's gfalle! (mit mir chame's jo mache...)
18.10.2001. D'Vehikels sind i.O., so langsam hani sogar de Wrangler is Härz gschlosse! Irgendwie muesch der eifach en alte Armee-Jeep in Schwarz vorschtelle, that's it! Aber etz hani scho 2000 Meile mit em gmacht, und er lauft immer besser! S'RV hätt 6 Schlofplätz, aber da isch dänn es Gmoscht.
18.10.2001. Wäge Modem-Friendly: De Vegas-KOA hätt ein(!) zentrale Stöpsel für Phone-Hookup, usse am Lädeli. Aaschluss a de Site wär de Wunschtraum...
18.10.2001. Wägem Wätter trau i mi fasch nid z'säge: Z'Vegas händs täglich über 90 Degrees ( > 32 °C). Hütt, woni vo L.A. zrugggfahre bi, hani em Jeep ändlich s'Verdeck abegmechet. (De Metzgi isch leider kein Cabi-Fan, so hani's halt dobe gloo.) D'Nächt sind allerdings zimli früsch, do chüelet's dänn scho deftig ab. Aber so schlofsch jo au besser!
14.10.2001. Mer sind hütt uf em (Standard) Flug über de Grand Canyon gsii. Em Metzgi hätt's gfalle (wämm nid?), obwohl dä Flug, wo mir s'letzt Johr gmacht händ (mit Landig) nümme möglich isch, schiins us Sicherheitsgründ.
Mir sind en ähnlichi Tour gfahre wie mir si scho zweimol gmacht händ: SFO / Tahoe (isch uusgschtorbe, am 15. mached's zue) / Lone Pine (Yosemite, Tioga und Sonora hani uusgloo) / Bodie (es Goldmine-Geischterstädtli, isch geil) / Death Valley (isch e Chalberei mit em Gschpann!) / Vegas (do simmer etz grad) / morn Kingman und Flagstaff / dänn Phoenix. De Metzgi flügt am Donschtig zrugg.
10.10.2001. Geschter morge hani de "Metzgi" z'Emeryville abgholt. De Zug isch (scheduled) 08.15 aagseit gsii, 12.30 isch er choo, und ich bi no e Stund z'früe dött gsii. So goil...!... Über 5 Stund hani jo au no nie uf en Metzger gwartet!
Aber er hätt risig de Plausch am RV und am Campingläbe: Geschter hämmer grilliert und debii e Fläsche Old #7 fasch nidergmacht... Und hütt simmer im Napa gsii und über Santa Rosa zrugg gfahre.
Morn am Morge früeh fahred mer los, richtig Sacramento / Tahoe.
06.10.2001. Di letzte zwei Täg hani e gröbers Gschtürm ghaa, da chasch mer glaube! Am Donschtig hätt de Chopf vo Burlingame aaglütte, är heg etz en schwarze Jeep für mich gchauft. Er machi no en chline Service, und am Friitig sölen cho abhole. Mir händ jo am Donschtig oobig (25-30 People) no en fürchterliche Abschturz ghaa, si händ mi ghöörig verabschidet... D'Beizeri hätt zwo Magnum-Bottles Schampus uufgrüert, und mir no dauernd "Tequila-Bumms" anegschtellt. Und zäme mit de Bud's on tap hät's Vater wider emol prächtig hinderegschtrählet!
Nu item, am Friitig morge bini no schnäll i'd Schuel go's Certificate hole und go tschüss säge. Am zwei bini dänn bi Burlingame Motors inetappet. Und siehe da: Es isch zwar würklich e kä "Beauty", aber mechanisch schiint er einigermasse gsund z'sii. Ha tatsächlich nid gwüsst, dass es Wrangler's ohni Servolänkig gäh hät. Mine hätt jedefalls keini! S'isch so goil... Bis gäge oobig hani dänn no s'Gschtürm ghaa, bis d'Zugvorrichtig draa gsi isch, aber am Schluss hätt da au no klappet.
Und am Samschtig bini dänn mit mim Bagaschi uf San Leandro übere go's RV hole. Da hingäge isch e wahri Freud: Es "Flair", Modell 2001, 40'000 Miles, GPS-System, 3 Klimaalage, Radio-CD, Color-TV, Videorecorder, etc.etc. Und, glaubsch es nid: De Typ woni d'Paperwork gmacht ha, isch mit em Thömi Hofer i'd Gwärbschuel... D'Wält isch eifach glich es Dorf! Die händ sogar en Hitch (Aahängerhoogge) für das Teil ghaa (da hätt mer au no Buuchweh gmacht) und so bini dänn öppe am eis vom Platz gfahre. Di erschte Paar Meile hani zimli Bluet gschwitzt, z'Oakland dur e fiischteri Neighborhood dure uf de Freeway. Aber etz bini z'Petaluma, ha di erschte Grossiichäuf tätiget (jojo, en Wäber-Grill!) und ha sogar scho s'erscht Steak mit Sweet Potatos hinder mer. Morn mueni no go Schloofsäck, Fixliintüecher, Chüssi und so Züügs go organisiere, aber dänn bini scho zimmli iigrichtet.

04.10.2001. Judihui, min letzte Schueltag! Sind tatsächlich scho 10 Wuche dure? Etz gäge de Schluss häts aagfange seckle, die Täg sind so schnäll verbiigange.
Zwar wär de regulär letzti Tag erscht morn, aber mir händ üs i de Schuel emol prophylaktisch abgmolde. Die Party im High Tide hüt z'nacht dörfti bi öppe eim zimlich Spure hinderloo... Natürli luegi morn i de Schuel no ine, zum Adie säge und's Abschlussdiplom in Empfang z'näh. Aber da cha jo au no am spötere Vormittag sii, oder...?...
30.09.2001. Aber hütt am Morge hani öppis erläbt, da mue der unbedingt verzelle: Mir sind i de "Glide Memorial Methodist Church" (330 Ellis Street) am Gottesdienst gsii. Dä fangt am elfi aa, aber du muesch e Stund vorhär dött sii, susch chunnsch kän Platz me über (stell der da emol bi üüs vor...). Wo mer dänn dinne und abghocket sind, isch de Gospelchor inechoo. Bi füfzg hani ufghört z'zelle, s'dörfted öppe achzg Sänger gsii si. Und dänn isch es abgange, so öppis hani etz würkli no nie gseh! Das Feeling, wenn di wildfremdi Lüüt (teilwiis mit Träne i de Auge) eifach umarmed, cha der nid beschribe. Mues aber geschtoh, das i ziitewiis au füechti Blinker gha ha... Glaubsch, das de Reverend zmitz us de Bsuecher use en Muslimische Priester uf d'Empore zitiert hät? Und dä hätt gredt: Natürli mües d'USA B52-Bomber uf Afghanistan schicke (muggsmüüsligi Stilli), gfüllt mit Blueme, Riis, Wasser, Medikamänt, und das alles über de Bevölkerig abwörfe... S'Publikum hät vor Freud tobet! So ne Predigt sprängt alles, wa'd scho je gseh häsch. Do würt klatschet, Kommentär abgää, gsunge, eifach unglaublich!
26.09.2001. Ha, aber etz händ's endlich am richtige Schalter trüllet! S'Wätter isch en Rise-Hit! Hütt am Morge simmer grad öppe zwo Stund im Cable-Car-Cafe ghöcklet und händ e Klassenarbet gmacht. Isch mir natürli rächt gsii, so hani mi mit e paar Kafi chöne über Wasser halte...
26.09.2001. Bi schuurig knapp ufgstande... mer sind i däm blöde "High Tide" wider emol prächtig abgsumpft. Do isch en Mandel- und Riis-Farmer us em Central Valley (nördlich Sacramento) mit sim Girlfriend inetappet und hätt aagfange, Rundene z'zahle. Dänn hätt sich das Madel no als ächte Scherzkeks entpuppt, und scho isch es wider emol passiert...!... Uf's mol isch es zwei gsii...
24.09.2001. S'Blues-Festival isch en Hit gsii. Di erscht Bänd am Morge (Omega Airs Gospel Singers) händ mi jedefalls scho fascht ab de Socke ghaue. Und denn isch es bis am Oobig am sächsi eso wiitergange, all 40 Minute mit ere andere Band. S'Konzert isch bim Fort Mason, uf de Great Meadow, gsii. Sind schätzigswiis 3-4'000 Persone am zuelose gsii, alli total zfride und mit ere lässige Stimmig.
21.09.2001. Ha mer denn ärnstlich überleit, ob "pray to the porcelain god" ächt e gueti Idee wär, aber ha mer de Oobig nümme welle dur de Chopf dure logooloo...
21.09.2001. Geschter simmer jo mit em Lehrer Ben im Sunset gsi und nochhär hämmer eine vo mine liebschte Kollege "uusgschwemmt", de Hiro (the Ultimate Japanese Beer-Killer-Machine). Dä Typ isch mit mir zäme aachoo, hätt am gliiche Tag d'Schuel aagfange und isch i jedere Pause vor de Schuel usse am Rauche gsii. So isch me sich natürli schnäll nöcher choo. Und woni (am erschte Oobig) gmerkt ha, dass dä au no gärn Pirr hett, isch sowieso alles greglet gsii... Aafänglich hämmer mit de Kommunikation no echli Müe ghaa, will er i de "Beginner"-Stufe aagfange hätt. Alli Asiate händ's gliich Problem: Die sind fantastisch uusbildet i Grämmer, aber si chönd da Züüg nid uusspreche, will's bi ine dehei z'wenig ächt englisschprochigi Lehrer händ. Aber mit de Ziit hätt sich denn da scho iigränkt. Ich ha uf jede Fall sau vill über die Kulture ghört und ha mittlerwiile au scho paarmol Sushi gfuetteret... Und är über Europa und üsi Chuchi. Sind dänn amigs scho echli schwäri Abschied... Naja, es isch jedefalls scho zimmli fescht hütt gsii, wo me heichoo isch...!...
21.09.2001. Hütt hani wider en guete uufgläse: Couch-Potato (Stubehocker). Isch no sinnig, oder?
20.09.2001. Hüt hani no en guete Spruch ghört: Nature has given women so much power, that the law has very wisely given them little... Guet, hä? Uf ere Skala vo 1 (agree strongly) bis 5 (disagree strongly) hät mini Klass e stramms "1" abgää!
20.09.2001. So langsam nöchered's sich s' End vo minere Schuelziit. Sind da tatsächlich scho 7 Wuche gsii? Nöchst Wuche würi nomol beförderet. Etz chumi i'd "Advanced"-Stufe. D'Linzi hätt mi allerdings zimli müese "überschnurre", ich ha mi i de Upper Intermediate eigentli wohl gfüehlt. Und neui Büecher chaufi wäge zwei Wuche würkli au keini me. Si hätt mer versproche, si machi Kopie, so bruuch i kä neui "Cutting Edge" z'chaufe. Naja, so würsch halt zum Glück prüglet...!...
18.09.2001. De Rauchmälder händ's mer wider iibaue. Die vom Hotel händ da glaub nid eso luschtig gfunde... Bim nöchste Filet rissi etz halt alli Löcher speerangelwiit uuf.
17.09.2001. Ich ha im Safeway (jojo, mit Chundecharte!) 2 wunderschöni Filet's gchauft. Woni de erscht vo dene zwei Schölle bröötlet ha, isch natürli de Rauchmälder im Zimmer abgange und hätt en sau Lärme verfüehrt. Wa meinsch, bis i dä Siech us de Wand usegmechet und de Stecker abzoge ha... Am andere Tag hätt mi dänn de Portier vom Hotel eso blööds Züügs gfroget. Die händ natürli d'Mäldig uf ihrer Zentrale ghaa... Aber bim nöchste rissi alli Löcher uuf und mach en Gwalts-Durzug!
12.09.2001. Hütt isches eigentli wider zimli normal gloffe, si händ mi mit öppis neuem plooget: Summary verbs. So langsam bini dänn froh, wenn d'Schuel fertig isch. Irgendwie hani s'Erfolgserläbnis vom Aafang nüme, s'isch en Art vo "I've got stuck" (feststecken). Aber ich ghöre das Phänomen au vo Andere. Es paar händ au scho d'Afternoon-Class gschmisse, obwohl ich d'Nomittäg eigentli fasch lieber ha: Do würd meh Vocabulary, Conversation, Field Studys usw.usw. gmacht. Am Morge isch immer e handfeschti Ladig Grammar debii...
11.09.2001. ...Ich selbst hatte zuerst keine Ahnung von den dramatischen Geschehnissen. Als ich AOL heute morgen aufstartete, sah ich wohl ein Bild eines Hochhauses mit einem Loch in der Fassade, aber ich habe gar nicht realisiert, worum es ging. Ich schrieb ein belangloses Mail an Gübi und ging dann meinen gewohnten Weg zur Schule. Bereits beim verlassen des Gebäudes traf ich auf Tomoko, eine meiner Mitschülerinnen. Sie fragte mich, ob die Schule wohl heute geschlossen wäre. Ich sagte, ganz verdutzt, „natürlich nicht, warum?“ Nun, zehn Minuten später sah dann alles ganz anders, dramatisch verändert aus. Eine meiner Lehrerinnen war gerade daran, die Schule zu verlassen, verheult und beinahe hysterisch. Von ihr hörte ich zum ersten mal Genaueres. Im Aufenthaltsraum der Schule dann ein beinahe unglaubliches Getümmel: An einer Wand des Raumes ein TV-Gerät, das die ersten Bilder des Geschehens ausstrahlte. Zum ersten Mal hörte ich die Zahl von 50'000 möglichen Opfern und den Vergleich mit Pearl Harbor im zweiten Weltkrieg. Später wurde bekanntgegeben, dass die Schule für heute ausfallen würde. In San Francisco wurde angeordnet: Financial District und Civic Center werden evakuiert und abgeriegelt. Die Golden Gate-, sowie die Oakland Bay Bridge bleiben bis auf weiteres gesperrt. Der Internationale Flughafen von SFO: Gesperrt. Alle öffentlichen Gebäude, Institutionen, Schulen: Geschlossen. Sogar Pier 39 in Fisherman’s Wharf wurde abgeriegelt. Alle US-Flaggen in der Stadt wehen auf Halbmast. Es herrscht eine beinahe unheimliche Ruhe auf den Strassen. Ich verbrachte Stunden vor dem TV und am Internet. Bis zur Stunde werden mehrheitlich die gleichen Bilder gesendet und aus den Kommentaren hört man ein hilfloses „Warum?“ heraus...
07.09.2001. S'Wätter isch prächtig, mich tüecht's au, de Näbel gäbi echli ab. Geschter und Hütt isch es vom Morge früeh bis z'Oobig strahlend schön gsii. Wär jo au nid meh als rächt, me isch jo schliessli z'Kalifornie...
07.09.2001. "Stomp" isch würkli en Riise-Hit gsii. Da isch e Perkussions-Show, wo di fascht ab de Socke haut. Während fasch zwei Stund würd nid eis Wort gredt, aber defür mit allem, wott der nu chasch vorstelle, Rythmus gmacht. Da goot vom Ziitigspapier über Zippo-Füürazünder und Abwöschbecki(!) bis zu Oelfässer. Hätt sich ächt glohnt!
04.09.2001. Sid hüt nomittag hani es Handy (es lauft sogar au scho!) vo AT&T. Die händ beschlosse, miteme 1000$-Deposit (zu 6% verzinst...) würed's da mache! Do hani dänn nümme vergässe, jo z'säge. Ich ha es NOKIA 8260 für 130$ überchoo, und etz schicked's mer no 80$ Cashback zrugg! (Die händ en mittlere Sprung i de Schüssle, die Amis...). Naja, öppis hani müese haa, und da isch glaub scho s'gschiidscht.
01.09.2001. Hüt hani imene Metzgerlade e prächtigs Steak (3,49$) und e Fläsche A1 poschtet. Etz würd (s’erscht mol) dehei bröötlet! Wenn da nu guet chunnt... Aber nochhär gangi scho no schnäll um d’Hüser uf es Pirr (oder 2...) Ha jo morn schliessli frei!
31.08.2001. Geschter bini wider im Aemoba-Records gsi. Glaubsch es nid, grad churz noch em Rütlischwur hani emol e Platte vo de "New Christy Minstrels" (e saugueti Mischig zwüsche Folk, Country und Mainstream) ghaa. Und genau die CD lachet mi us em Regal "Folk" aa, für ganzi 6.95$ !!! Und e unbekannti Peter Paul & Mary grad au no. Am Schluss bini wider mit 12 Schiibe underem Arm usegwagglet. Etz fangi denn do au aa, Sampler z'brenne. Grad etz, während i am töggele bi, lauft im Background "Freight Train Boogie", e Schiibe, wo's der fascht z'Zechenegel hindereröllelet... So goil!
29.08.2001. So, etz probieri no bi AT&T öppis z'mischle, das i ohni di blöd Social-Security-Number (ohni die chönt's kein Credit-Check mache, oder e Credit-History abrüefe) es Handy überchume. Hüt hätt mer nämli en Verchäufer imene Elektroniklade gseit, vilicht chöni me mit eme grössere Deposit öppis mache. Aber ich söll's online probiere. (Susch isch es tatsächli problematisch. Verizon hätt es Pre-Paid-System, aber nu mit 75% Abdeckig vom normale Netz. Und Sprint hätt öppis ohni Credit-Check, aber die händ nu i de grosse Balligsrüüm e gschiidi Coverage.) Naja, si mached's der nid liecht...
29.08.2001. Wäge de Peitsch: Natürli sind alli gwunderig uf d'Bildli. Sogar von e paar Lehrer hani scho Komplimänt überchoo! Mir händ i de Schuel en Compi-Ruum mit öppe 12 Maschine, wo öffentlich zuegänglich sind, nu mit dere Iischränkig, dass niemer länger als 20 Minute dörf draahocke. D'Madels händ allne Kollege i de Schwiiz mini www-Adrässe aaggä.
28.08.2001. Sou, mer gönd hüt emol ine's Irish-Pub. Wänn me döt nid cha rauche, bini aber blitzartig wider im High-Tide. Mit däm tunkle Bier wür i sowiso nid eso richtig warm.
Au, di beschte News vom hüttige Tag ha der no gar nid verzellt: Me hätt etz en Studänte-Uswiis vom St.Giles-College. Weisch wa für es Datum drinnstoht? Juli 01 bis August 02...!... S'isch so goil! Mit dämm Chärtli müesst jetz würkli au de hinderst Sheriff z'fride sii!
24.-26.08.2001. Uf üsem Trip über de Highway #1 hämmer zwei lässigi Sache neu entdeckt: Südlich vo Monterey gits en "17-Miles-Scenic-Drive", wo dur Wälder, Küschte, gschtopfti Villesidlige usw. füehrt. Und wiiter unne, i de Nöchi vo San Luis Obispo, gits es Kaff, wo "Solvang" heisst, e noobaut's dänisches Dorf. Da isch eso schön kitschig, du gsesch de leibhaftig Disney! Do simmer es Stündli (oder so) umegschlenderet und händ üs da aaglueget. Santa Barbara sälber isch sehenswert. D'Stadt hätt 87'000 Iiwohner, e Hauptstross wo's z'Nacht schöö abgoot, und das Ganzi isch im spanische Stil noch em Erdbebe vo 1923 neu ufbaut worde. S'Courthouse umfasst öppe 10 europäischi Baustil, im innere isch es "alt Spanisch" gmacht. Unglaublich uufwändig!
22.08.2001. I de Schuel händ's mers hüt wider rächt kochet: Mer händ d' "Infinitive Forms" duregnoo. Isch ganz eifach: Infinitive with to / Inf. without to / negative Inf. / perfect Inf. / continous Inf. / passive Inf. Am liebschte hett i s'Buech zum Fänschter usegheit...!...
Und am Schluss chunnt d'Lehreri mit eme Trost: Es git eigentli kä bruuchbari, eifachi Regle für dä Sch...! Am beschte lernsch da Zügs uswändig. Isch jo scho guet!
Aber hüt zobig gömmer min 4-Wuche-Ufenthalt go begüsse. Und morn isch scho Dunnschtig! Am Friitig hämmer freignoo (für üsen L.A.-Trip). S'isch glaub glich no nid ganz alles verlore!
22.08.2001. Geschter isch min National-Parks-Pass iitroffe. Wänn i da richtig gschnallt ha, gilt de Iitritt nid nu für mich persönlich, sondern für alli Insasse vo mim Auto. Da wär doch ken Seich, oder?
Ich cha übrigens, im Gägesatz zu Dir, d'Schtore rüebig dobeloo. Es isch en neue, typische Safranisco-Morge: Näbel und arschchalt. Luschtig, wie da innert chürzischter Zit cha ändere. Geschter isch es no wunderschön gsii.
21.08.2001. D'Schuel isch guet gange. Aber d'Lehreri hät zimli Vollgas gäh. Und zwo Siite Uufgobe hüt zobig... Grummel! I de Klass simmer 11 Studis, devo 5 Schwizer und 3 devo sind Lehrer... Macht aber Spass!
21.08.2001. Mit Pipper & Mäge gangi am nüni is "Bisquit's & Blues" go ässe und echli Sound go inezieh. Morn übernämed's ihres RV.
20.08.2001. Min erschte Bsuech (Pippi und Mäge) hani planmässig empfange. Geschter simmer im Napa (Beringer Vineyards, of course!) und im Forbe's gsi. Hüt chömed's mi am vieri i de Schuel go abhole, dänn mache mer no de 49-Miles-Scenic-Drive. S'Wätter isch natürli beschisse gsii (Golden Gate am Vormittag und am Nomittag im Näbel...), aber im Hinderland 36 Grad. Aber ich glaub, es hättene glich gfalle. Bildli chömed dänn emol...
19.08.2001. Di erscht Rächnig vo Pacific-Bell (für's Telefon) isch cho. Ich ha jo no nie i de USA e Iizahlig gmacht, drum bini de Portier go froge. Do würsch dänn ganz ehrfürchtig: Er hät mi zumene Chruschtli-Lädeli grad um de Egge gschickt, e "Money Order" (en Art vo Check) im genaue Betrag z'chaufe. Da Ding stecksch dänn ines Couvert, chläbsch e Marke druf und da rüersch dänn in nöchste Briefchaste. Pfahlbau isch nu de Vorname! Do wundereds di nümme, dass d'Amis s'Kreditchartewäse erfunde händ! (Murphy: PacBell nimmt natürli keini...)
19.08.2001. Hüt bini s'erscht mol in Haight-Ashbury-District. Da isch dött, wo s'Hippiewäse i de sächzger Johr aagfange hät. Hippies hät's zwar nümme vil (die woned hütt i de bessere Viertel), aber s'Quartier isch voll schrill und schräg. Lädeli, Spünte, Wohrsäger, Psycho-Fuzzys, da muesch gseh! Und zmitz drinne de ultimativ Musig-Lade: AEMOEBA. So öppis hani schlichtwäg no nie gseh! CD's und Platte, sowiit s'Aug reicht! De Gäg isch, das me bruuchti CD's cha trade. Di billigste vertschuttets denn ab 1$! E so ne Uuswahl, do würd's der ächt anderscht! (Zum besser vorstelle: am Uusgang hätt's 8 Kasse, und ich bi sicher e Viertelstund aagstande, bis i a eini anechoo bi!) Etz hani Total 13 (neui) CD's (devo 5 Doppel-CD) postet, für 109$ (exkl. Tax). Do chasch aber nüt säge, oder? Do bini ganz sicher nid s'letzt mol gsii.
18.08.2001. Die Mixtur us Rotwii, Grappa und Pirr hätt mi ganz schön duregschüttlet! Bi natürli au nüme so im Training wie au scho... Am Friitig nomittag hämmer kei Schuel, und etz hani grad e paar Stündli müese anelige. Glaub, etz chunnts wider langsam.
17.08.2001. Hüt oobig hämmer "Italy-Go-Home-Party". Mol luege, wie da wider usechunnt...
17.08.2001. Hüt simmer mit de Klass inere Grichtsverhandlig gsi. En Drogefall isch verhandlet worde, nüt würkli wichtigs. Aber de Gäg isch cho, nochdem's de Aagklagti abgfüert händ: D'Richteri hätt üs diräkt aagsproche und gfroget, wo mer herchömid, ob mer alles verstande heged, usw.usw. Dänn hätt si di längscht Ziit mit üs gspröchlet und dies und jenes erchlärt. Stell der so öppis mol i de Schwiiz vor... Isch e guets Erläbnis gsii! Und üsi Lehreri hätt en saustolz ghaa.
16.08.2001. Hüt hani 3-wüchigs Jubiläum z'Safranisco! Die Ziit chunnt mer vil chürzer vor. Und pünktlich uf dä Tag händs mer hüt i de Schuel eröffnet, dass s'mi nöchst Wuche i ne höcheri Klass tüeged upgrade. U da fröit eim! Ha mer säge loo, dass dött de Grammar-Türgg vil weniger gfrooget sig. Und mit em Vokalubar bini eigentli guet debii.
12.08.2001. So, etz hani's "Forbes Island" hinder mer! Isch tatsächlich en Hit, ha grad für nöchste Sunntig reserviert (mit Pippi und Mäge). Scho s'hiicho isch e Show: de Boss (Mr. Forbes) holt di persönlich mit eme Böötli ab. Dä Wahnsinnig hät e 700 Tonne schwäri, künschtlichi Insle mit Lüchtturm, Palme und allem wa dezueghört is Hafebecki vo Pier 39 inegmechet (jo, döt wo d'Seehünd sind) und es französisch aaghuuchts Luxusrestaurant iigrichtet. Da muesch gsee, susch glaubsch es nid... O.K., ganz billig isch de Gschpass nid: Für drü Persone hämmer 250 Dolores gläderet, aber mit eme Spitzewii, Martinis, Desserts, Tip and so on debii. Hät sich scho glohnt.
09.08.2001. D'Draft-Situation hät sich geschter entspannt, ei Sorte (Spaten, München) war wieder available!
08.08.2001. Aber am Samschtig gangi in es Atom-Beizli go test-foode (Forbes Island a de Fisherman's Wharf: Die holed di mit eme Boot ab, de Spunte isch e schwümmendi Insle im Hafebecki, de Ess-Saal isch under Wasser mit Blick uf d'Fisch. Bi emol gschpannt)!
07.08.2001. Naja, geschter hämmer noch eme ziemli stränge Tag e Prachts-Chläppere glade. Im High-Tide, gägenüber vo mim Hotel (do chame smoke!) hämmer mittlerwiil 3 verschiedeni Draft's (Offebier) läärgsoffe. D'Beizeri hätt de Plausch, wenn si chunnt: Sorry, we're off of that beer...
07.08.2001.Zwüsche zwei Erfolgserläbnis (vo de Linzi hani en Arbet mit em Vermerk "Excellent, Hausi" zruggübcherchoo, und d'Kelly hätt im Lift gseit "It's good to have you in my Class, Hausi"), hani wieder en raabeschwarze Absturz ghaa: Bimene Test (Ziitforme) hani's gschafft, kei einzige richtigi Antwort z'träffe... U da fröit eim!!!
04.08.2001. Sou, etz gangi go es Auto miete und dänn gaitz is Hinderland!
02.08.2001. So, etz gangi go "WISCHIBARA", nochhär i'd Schuel. (Am Nomittag simmer immer no a üsem Projäkt MEDIA. Geschter hämmer de Uuftrag gfasst, e Ziitig für's St.Giles-College z'mache. En Kolleg und ich händ's Thema "The History of St.Giles" gfasst. Isch no saulässig! Geschter hämmer s'erscht Interview mit em Alan Turner (Diräkter) gmacht. Däm sin Brüeder isch übrigens Captain bi de Swissair und wohnt z'Eglisau! D'Wält isch halt eifach es Dorf!
31.07.2001. Hüt hani min erschte Schueltag prächtig überstande: Ich chume grad etz vonere Pintecheer mit 3 Japaner (2 Güdels, 1 Madel), und 1 Polish-Man zrugg. Zerscht simmer mit de Schuel anere Happy-Hour gsii, nochhär mit dere chline Gruppe go Thai-Foode und spöter go Pirr inelogoloo. Hät en Sauspass gmacht! (Ich weiss äbe scho zwo Spelunke, wo's der uf Verlange en Äschebächer anefahred! Di andere sind begeisteret gsii). Du muesch i de Schuel eifach English spoke, ob'd wotsch oder nid. I minere Klass (die händ mi, noch mim empfinde, uhuere höch iigstuuft) sind 11 Lüüt, wovo 6(!) Schwiizer. Und hüt händs es üs scho gchochet: S'Thema isch "Media" gsii. (Ziitige, TV, Internet usw.) Do bini dänn scho öppe amene Fachuusdruck is schlüüdere cho. Oder kennsch du de Underschied zwüsche "Headline" und "Topic"? Oder weisch du wa es "Board of Editors" z'tue hät? Naja, di andere händ's au nid alli blickt!
Aber wenn da etz no drüü Monet e so wiiter got, würi sicher nid tümmer debii!
29.07.2001. Apropos Uusgang: E paar Schritt vom Hotel ewäg isch's "BISQUITS & BLUES" (isch fasch i jedem Reisefüehrer dinne). Do bini geschter iegheit, und da wohrschinli nid zum letzte Mol! E paar Almöhis händ Chicago-Blues gschpilt und es Bijou vomene Madel hät gsunge: Vatter hätt öppe e drüviertelstündigi Gänsehut wachse loo! Noch drüü Nummere isch's Publikum uf de Möbel gstande. Sensationell!
Hosianna! Ufem Compi funktioniert alles wie gwohnt! Alli Favorite sind ume, Outlook funktioniert, etc.etc. S'isch so goil!!!
So, etz gangi veruse. S'schönscht Wätter lachet!
28.07.2001. Ha, da Mail schriibi scho vo mim Läpptöppli uus! Es isch immer s'gliich:Frag de Hotelportier! Dä hät gseit: "Wait a minute", dänn ischer mit ere AOL-CD doogschtande. Etz hani da Gmües installiert, aber da isch e grösseri Zeremonie! Ich baschtle etz emol a däm Ding ume.
27.07.2001. Hüt bini am achti us de Fädere, ha duschet, Kafi gmacht, etc.etc. und bi nochher de Wäg i d'Schuel gschtiflet. (Es 1:1-Manöver...) Es sind genau 10 Minute vom Hotel i'd Schuel. Auto und Töff isch beides sinnlos. Weder im Gaylord no i de Schuel händs au nu en Schimmer vomene Parkplatz! Etz hani us luuter Verrückti grad en "City-Pass" für di öffentliche Verchehrsmittel poschtet. Und wili eso früeh dra gsi bi und's a de Drehschiibe vo de Cable-Cars a de Market Street nonid Schlange gstande sind, bini mit somene Ding a d' Fishermans-Warf ghöpperlet. Macht no Spass, aber zwo Stund aaschtoo wür i nid für da!
Etz hocki im Pier 39 imene Internet-Kafi und tue chlappere. S' X und's Y sind au no amene andere Ort, und di dütsche Sonderzeiche au! OGottogottogott...
26.07.2001. Alles sowiit im grüene Beriich. I bi do imene Internet-Kafi am Töggele. Mit de Flügerei häts eigentli guet klappet, aber du bisch imene KLM-Bomber scho de einzig Usländer... Rundume tönts zwar scho wi Schwiizerdütsch, aber ebe glich nid richtig!
Bim Visum bini am Flughafe zerscht hange blibe (ha natürli s' falsch Formular uusgfüllt...) aber nochher isch es denn zügig gange.
S' Wätter isch nid guet: z' Frisco händs im Summer s' Fog-Phenomena (heissi Luft usem Hinderland trüfft uf chalti vom Pazifik und kondensiert: Näbel bis am Mittag, denn riisst's aber uuf und isch guet bis am Oobig.)
Grad vorher hani en eigne Telefonaaschluss im Hotelzimmer bschtellt, wo nid über d' Hotelzentrale lauft. PACIFIC-BELL macht so oeppis. Ab Samschtig sött's laufe, solang bruchets zum schalte).
So, etz hoeri zerscht emol uuf und gang um d' Hueser. S' isch viertel vor eis am Mittag.

 


Aktualisiert 25-Jul-2002  © 2001/2002 Hausi Wittwer