IL BARSCHUN DA DAINTS CULLA GIRAFFA.
Ad Ardez vivaiva üna famiglia cun duos mats chi vaivan nom Gian e Duri. Minchün vaiva seis barschun da daints. Ils barschuns d'eiran in ün magöl aint il bogn. Gian vaiva ün barschun gelg e Duri ün cotschen. Tuots duos dovraivan minchadi lur barschuns. Davo ün pêr eivnas d'eiran ils barschuns üsats e la mamma cumpraiva adüna darcheu nouvs.Üna jada es gnüda in visita tanta Cilgia da l'America ed ha portà blers giovarets pels mats. In plü ha'la portà eir duos barschuns da daints per els. Quels d'eiran oters co quels ch'els vaivan gnü fin hoz. Il barschun per Duri vaiva a la fin ün chavaglin e d'eira tuot alb, be il chavaglin d'eira brün. Il barschun cha Gian ha survgni vaiva a la fin üna giraffa cun striblas albas e nairas. La mamma ha miss tuots duos barschuns aint in magöl.
Ils barschuns nouvs han apaina salüdà als barschuns vegls. Pustüt il barschun culla giraffa guardaiva be blaga da suringiò muossond sias saidlas nouvas. El ha ris oura il barschun da la mamma. Propcha quel d'eira fich vegl, ma quai nu til faiva inguotta. El ha dit: "Spetta be, nus eschan qua per dovrar, quai es nossa vita. Cun quai cha'ls umans ans douvran, hana lur daints bels e sans. Quai sa tantüna minchün da nus e perquai vain nus plaschair vi da nossa saidlas veglias." Ma ils barschuns da daints nouvs nu d'eiran perinclets e faivan valair adüna darcheu lur aignas idejas. A la fin han els dispütta culs oters barschuns da daints.
Davo ün pêr dis es svani il barschun da la mamma ed ün nouv es gnü. Plü tard as lavaivan Duri ed Gian lur daints culs barschuns nouvs. Ma il barschun culla giraffa d'eira adüna sco nouv. Il barschun da daints il plü vegl nu d'iera bun dad incleger co cha quai saja pussibel, Gian douvra tantüna seis barschun minchadi, ma quist es adonta da quai adüna sco nouv e dvainta adüna plü superbi.
Davo ün pêr eivnas nun es Gian plü stat bun da mangiar tschiculatta. Dandettamaing ha'l gnü mal ün daint. Ma el nun ha dit inguotta a la mamma. Cul temp é'l stat bun da mangiar be mangiativas lommas. Quai ha sia mamma badà ed es ida cun Gian pro'l daintist. Quel til ha visità ils daints ed ha dit: "Gian, tü nu't lavast bain teis daints. Tü stoust tils lavar inandret sco cha tü hast imprais quai a scoulina. Uossa stöglia trar our ün daint. Id es massa tard per el. Per furtüna es quai ün daint da lat. Ma scha tü nu lavast teis daints inandret, alura perdast tuots." Gian ha tschüf temma e cur ch'el es gnü a chasa ha'l cumanzà a lavar seis daints inandret.
Il barschun culla giraffa d'eira tuot disfurtünà cha sias saidlas nu sun plü uschè bellas sco avant. Il barschun il plü vegl ha dir: "Guardai, ch'eu n'ha gnü radschun. Nus eschan qua per dovrar e na per ornar." Bainbod d'eira il barschun da daints culla giraffa precis listess trid sco tschels barschuns ed ils daints dad Gian d'eiran bels e sans.
d'Alena
Parablas