I d'eira üna scoula cun blers scolars. Sülla plazza da scoula giovaivan ils scolars cur ch'els vaivan lur possa gronda. Els nu giovaivan be, ma els büttaivan eir davent lur suondas e la frütta. Ils rests giaschaivan dapertuot intuorn. Il pedel lagnaiva adüna darcheu culs scolars. Ma invan! A la fin ha il directur da la scoula postà ün grond container. Quai d'eira fich pratic pels scolars, perche cha uschè ingün nu vezzaiva che chi's büttaiva davent.
Il container da metal d'eira da culur grischa, fich trista. Perquai ha il magister permiss als scolars ch'els til possan dar sü culuors. Ils scolars han pitturà diversas bes-chas sulvadias e bes-chas da chasa. Il container faiva üna gronda parada e d'eira eir superbi. Dürant l'inviern vaiva il container sü ün chapè da naiv. Ils scolars passantaivan las posas aint illa classa e mangiaivan lur marendas. Davomezdi giaivna culs skis. A la fin es tuornada la prümavaira.
Ils mats giovaivan a ballapè e las mattas faivan gös culla balla. Els nu vaivan
ingün temp per mangiar. Tuot las suondas, la frütta e tschellas
bunas mangiativas gnivan büttadas minchadi aint il container. Al cumanzamaint
vaiva'l jent quistas bunas mangiativas, ma cul temp d'eira quai tantüna
massa bler. 
Seis
purtrets bellischems han cumanzà a perder lur fuormas e las culuors
han cumanzà a crodar giò dal container.
El d'eira fich fich disfurtünà e nu savaiva che tour a man. In mais gün han qualche mats e mattas cumanzà ad avair mal il stomi e'l cheu. Quai capitaiva uschè suvent, cha'l magister es i culs scolars pro'l meidi. Il meidi ha dit, davo ch'el ha visità als scolars: " Üna chosa curiusa es quai, ils uffants nun han avuonda da mangiar. Co es quai pussibel?" Ed uschè, è'l i il di davo a far üna visita in scoula. E che ch'el nun ha vis: davo la posa han ils mats e las mattas büttà davent lur marendas aint il container impè da tillas mangiar. Pac da's dar da buonder cha'ls scolars d'eiran amalats e'l pover container perdaiva sias culuors. El es dvantà uschè gross, cha impè da seis bels purtrets vaiva'l sün sai be amo ün purtret grond cun fuormas curiusas.
Il meidi ha clomà als scolars pro sai, ha muossà il container ed ha dit:" Guardarai! Grazcha a tuot las marendas cha vus vais büttà davent ha il container pers seis purtrets e voss stomis han reclamà. Il container ha survgni massa bler per mangiar e voss stomis massa pac." Davo ün pêr eivnas d'eiran ils scolars darcheu sans e'l container ha survgni sia bella fuorma. Ils scolars han pitturà ils purtrets nouvs amo bler plü bain co avant. Ils scolars giovaivan inavant lur gös e mangiaivan lur marendas.
d'Alena
Parablas