JONIN E'L CHAN DA CLOWN DUMENGA Turich abitaiva ün pitschen mat chi vaiva nom Jonin e vaiva 5 ons. El d'eira unic figl e pervia ch'el d'eira stat greiv amalà avant duos ons, vaivan seis genituors gronds pissers per el. El nu pudaiva ir a giovar sulet cun tschels uffants e nu pudaiva neir ir a scoulina. El d'eira adüna be cun sia mamma e seis bap e vaiva gronda temma cur ch'el d'eira sulet.
Üna jada ha mamma stuvü ir a l'ospidal. Perquai ha bap telefonà sia sour a Scuol da gnir per Jonin per duos o trais eivnas. Tant'Ursina es gnüda e d'eira tuot surpraisa, cur ch'ella ha vis a Jonin, chi d'eira sblach e debel. Ella vaiva eir duos figls, ma els d'eiran ferms e viscals. Ella ha paquettà sia valisch e tuots duos sun its a la staziun.Il viadi cul tren in Engiadina plaschaiva a Jonin. Las muntognas d'eiran tuot albas. A chasa pro tant'Ursina nu d'eira ingün. Ils cusdrins da Jonin giaivan culs skis.
La saira sun els tuornats ed han cumanzà a far spass cun Jonin. La tanta til ha eir dumandà, sch'el sapcha ir culs skis. Cur cha Jonin ha respus, ch'el nu sapcha ir culs skis, ha'la dit: "Nus giain daman a bunura sün Motta Naluns pro clown Dumeng. El at muossa ad ir culs skis. Sgür cha quai at plascharà."
Jonin nun ha dit pled ed es i in let. Ma el nun es lönch na stat bun da s'indurmanzar. La bunura e'l i cun sia tant'Ursina sü pro la staziun. Là d'eiran fingià blers uffants listess vegls sco el. Clown Dumeng vaiva ün grond chan pro sai.
Jonin ha cumanzà a cridar cur cha sia tanta d'eira svanida. Il chan sigliva d'üna vart e da tschella e faiva adüna curiussas cupiroulas. Ils uffants riaivan da schloppar, ma Jonin cridaiva e cridaiva inavant. Cun ün pled dit, quist di d'eira üna catastrofa per Jonin ed eir clown Dumeng nu savaiva che chi füss da far cun el. La saira es tant'Ursina gnüda a tour a Jonin. Ella ha gnü displaschair cha Jonin nu giaiva culs skis. Davo tschaina es Jonin svelt i in let. El d'iera uschè stanguel, ch'el s'ha subit indurmanzaà.
![]()
Dandettamaing ha'l vis davant sai il chan da clown Dumeng. "Jonin, perche hast temma da mai? Eu sun grond, ma eu nu fetsch inguotta a tai. Eir tschels uffants nun han ingüna temma da mai", ha dit il chan. "Sast tü", ha respus Jonin, "eu nun ha ingüna temma da tai, ma eu sun la prüma jada davent da mia mamma e meis bap ed eu n'ha propcha üna gronda temma dad esser sulet. Eu nu sa ir culs skis e meis schnuogls tremblan uschè terribel, ch'eu nu sun bun da far inguotta." "Jonin, eu at güd, ma tü stoust collavurar cun mai. Apaina cha tü rivast sü daman, vast subit pro clown Dumeng e restast pro el. Dalum ch'eu cumainz ad üerlar at stoust dir: Eu nu sun sulet. Eunun ha ingüna temma. E quai duos jadas. Hast inclet?" ha dit il chan. "Hai, ma eu sarà tantüna sulet", ha dit Jonin plain pissers. "Tü hast intuors tai blers uffants ed eir clown Dumeng es cun tai. Tü nu stoust be na invlidar da dir las duos frasas e da crajer vi da quellas. Quai es fich important. Tü vezzarast chi pasarà."
Il di davo s'ha Jonin sdasdà fich bod ed ha vuglü ir svelt sü pro'l clown Dumeng. La tanta d'eira surpraisa, ma ella nun ha dit inguotta. Jonin vaiva adüna temma, ma el d'eira be buonder, scha quai ch'el vaiva s'imsömgià quista not, saja la vardà. Davo cha tant'Ursina d'eira ida davent, es Jonin i subit pro clown Dumeng a til salüdar. Lura ha'l eir salüdà al chan, chi giovaiva culs uffants. Ma il chan nun ha fat ingün tschegn. In quist mumaint han ils peis da Jonin cumanzà a tremblar sco her. El ha vuglü cumanzar a cridar. Tuot seis curaschi es svani. Tuot in üna jada ha il chan cumanzà ad üerlar ed ha muossà seis daints a Jonin. Jonin ha serrà seis ögls, ha fat puogns ed ha dit da bass be per sai duos jadas: "Eu nu sun sulet. Eu nun ha ingüna temma. Eu nu sun sulet. Eu nun ha ingüna temma." El ha badà co cha sia temma svaniva. El giaiva cun clown Dumeng e tschels uffants culs skis e dafatta insü cul runal. La saira ha clown Dumeng quintà a sia tanta quant bain cha Jonin haja imprais ad ir culs skis. Bainbod ha Jonin imprais ad ir culs skis uschè bain, ch'el pudaiva ir culs skis cun seis cusdrins e sia tanta.
Davo trais eivnas sun gnüts mamma e bap per Jonin e d'eiran be stuts co cha Jonin s'avaiva müdà. Jonin nun ha quintà seis sömmi ad ingün, ma adüna cur ch'el es in difficultats, s'algorda'l dal chan e da sias frasas.
d'Alena
Parablas