I d'eira üna jada üna lindorna chi ha chattà üna chasa da lindorna gronda vöda. Quai tilla ha fat grond plaschair. "Eu n'ha furtüna. Eu farà our da la chasa da lindorna ün auto da posta. Eu til strarà davo e sarà il manaschunz. Eu sarà bainbod fich richa." Ella ha miss roudas vi da la chasa vöda e dat sü culur gelgua. Da la vart dretta e schnestra ha'la taglià oura fanestras e davo ha'la scrit il nomer. Uossa d'eira quai l'auto da posta il plü bel aint il god.
Quai plaschaiva eir ad otras lindornas. Ellas vulaivan eir strar davo l'auto, ma la lindorna ha dit:" Na, scha vus lessat, pudessat star in alch lö e far fermativas pel auto da posta." Quai nu d'eira üna nosch'idea. Las lindornas d'eiran subit perinclettas e sun idas davent a far fermativas, minchüna in ün oter lö.La prüma ha scrit sün sia chasa fermativa "Chasa Lindorna" ed ha drizzà aint ün'ustaria cun aua minerala. La seguonda ha drizzà aint üna pastizaria. Duos otras han cumprà giovarets e s'han missas üna sül muot e la seguonda giosom il muot. La prüma ha scrit sün sia chasa "Chasa da gös" e la seguonda ha scrit "Butia da giovarets". Nossa lindorna ha permiss a la lindorna la plü pitschna chi d'eira si'amia, ch'ella possa far il conductur e ch'ella possa vender ils bigliets. Sülla fermativa d'eiran fingià blers passagers - ils scarafagis.
La lindorna la plü pitschna clomaiva: "Tuot dess ir aint!" Ils passagers sun its aint il auto e lura ha'la fat ün segn e cumanzà a serrar l'üsch da l'auto. Ils passagers s'han tschantats aint il auto sper las fanestras ed han spettà fin cha l'auto da posta parta. Ma i nun es capità nöglia! "Perche nu giaina?" "Perche staina salda?" "Forsa nun ha'l ingün benzin?" ha dit ün scarafagi. "Perche nu vast? Quai nun es bel da tai", schmaladivan ils passagers. "Che, eu sun salda?" s'ha datta da buonder la lindorna. "Eu vegn tantüna culla plü gronda sveltezza. Be guardai bain!" Ils passagers han guardà bain e propcha. L'auto da posta giaiva, ma uschè plan, uschè planin ch'ingün nun ha badà quai. In quist mumaint hana chapi. "Nus eschan svess la cuolpa. Quai vessna pudü savair cha üna lindorna nu po ir plü svelt co culla sveltezza da lindorna!"
Ed uschè suna its a pè pro la "Chasa Lindorna", illa "Butia da giovarets", pro la "Chasa da gös" ed illa "Pastizaria". Là hana cumprà per lur uffants pastinas, aua minerala, giovarets e sun its a chasa. Aint il auto da posta sun restadas inavo be nossa lindornina e la lindorna la plü pitschna chi fa fin hoz da conductur. I nu tilla fa inguotta ch'ella nun ha ingünas passagers. Ella fa sco schi füss là blers. Mincha pezzetta clom'la: "Tuot dess ir aint!" e lura venda ella ils bigliets e tils foura eir. Ella ha üna tas-cha cotschna e la zanga tuot pitschna. I tilla plascha bain aint il auto da posta e nossa lindornina es furtünada ch'ella nun es restada suletta.
Ondrej Sekora/trad. Alena
Parablas