I d'eira üna jada üna matta chi vaiva nom Lucrezia. Ella d'eira üna matta fich viscula. Ella giovaiva il plü jent a ballapè culs mats. In scoula nu vaiv'la fat attenziun cur ch'els han imprais a scriver las cifras. Il di davo han ils scolars gnü da scriver üna lezcha cullas cifras.Lucrezia es gnüda a chasa, ma ella nun ha gnü ingüna peida per üna tala lezcha. Hoz hana ün grond "matsch". Quai es tantüna plü important co üna lezcha! La saira tard è'la tuornada a chasa, e nu vaiva ingüna vöglia da far bain sias lezchas. Ella ha tut seis quadern da lezchas ed ha scrit a la svelt ün pêr cifras. Il di davo ha'la surdat seis quadern da lezchas a la magistra chi ha portà ils quaderns cun sai a chasa. Davo tschaina ha la magistra cumanzà a correger las lezchas. Ils uffants scrivaivan propcha bellas cifras. Ma cur ch'ella ha avert il quadern da Lucrezia, ha'la vis alch schnuaivel. Las cifras vaivan ruot lur peis, üna cifra guardaiva a schnestra, tschella a dretta e tuot las cifras clomaivan: "Agüd, agüd, nus vain mal ils peis!"
La magistra ha cumanzà a correger las cifras uschè bain co pussibel. Il di davo ha la magistra muossà las cifras a Lucrezia ed ha dit: "Guarda quant temp ch'eu na dovrà pella correctura da tias cifras. Il pè da l'üner va a schnestra impè dad ir dret giò. Il tschincher guarda our sco ün trajer e la nolla es sco üna fletta." Lucrezia ha impromiss ch'ella fetscha tschella jada cifras plü bellas. Ün pêr eivnas ha'la propcha scrit bellas cifras.
Ma ün di nun ha'la darcheu na fat attenziun ed ha copchà cifras in üna sveltezza da la tabla. A chasa vulaiva ella far sias lezchas, ma ella nu d'eira buna da leger sias cifras!
Ella nu savaiva scha la prüma cifra curiusa füss ün trajer
o ün otter o ün tschincher, la seguonda cifra ün setter
o ün üner e cun quistas cifras vess'la gnü da far quints.
Quai d'eira impussibel. Ella es ida a scoula sainza sias lezchas ed ha
survgni üna noscha nota. In quist mumaint ha'la chapi perche chi'd
es fich importatnt da scriver bellas cifras.
d'Alena
Parablas