I d'eira üna jada üna mattina chi vaiva nom Mengia. Mengia mangiaiva fich jent e perquai d'eir'la il plü jent aint in chadafö, ingio ch'ella güdaiva a cuschinar a sia mamma. Ma cul temp es Mengia dvantada plü largia co lunga. In scoula vaiv'la bunas notas. Ella legiaiva eir blers cudeschs, perche cha lapro nu faiva dabsögn da cuorrer. Be las uras da gimnastica d'eiran üna sgrischur per ella. Mengia inventaiva adüna darcheu diversas malatias be per nu stuvair far gimnastica.
Üna jada ha la magistra tut cun sai üna corda da siglir. Tuot las mattas siglivan bain, be nossa Mengia na. Na perquai, cha quai nu tilla plaschess, ma ella nu d'eira buna da siglir sü ot. Ella d'eira simplamaing massa greiva. Uschè s'ha'la tschantada in ün chantun ed ha cumanzà a cridar. Ella as giavüschaiva uschè fich da siglir sur la corda!
Giond a chasa tras il parc, ha'la inscuntrà ad üna duonna veglia, chi tilla ha dumanà, perche ch'ella crida. Mengia tilla ha quintà tuot l'istorgia ed eir seis giavüsch. La duonna ha dit: "Eu n'ha üna corda magica per tai. Scha tü sigliast minchadi be desch minuts, vezzarast cha tü est bod buna da siglir meglder co tschellas mattas." Mengia es rivada a chasa.
Sainza gnir aint in chadafö, ha'la subit provà our la corda magica
da siglir. Al cumanzamaint nu d'eira quai simpel per ella, ma davo ün
pêr dis è'la statta buna da siglir sur la corda. Mengia nu
sigliva be desch minuts. Minchatant tilla ha mamma perfin stuvü clomar
da gnir a mangiar. Planet ha'la tut giò da pais e bainbod d'eira
Mengia uschè maigra sco tschellas mattas.
Davo ün pêr mais ha la magistra fat üna cuorsa culla corda da
siglir. Precis quella bunura nun es Mengia statta buna da chattar sia corda
magica. La corda magica d'eira simplamaing svanida. Mengia es ida a scoula
plain pissers. Chi sa che chi capitarà. Tuot las mattas d'eiran
fingià siglidas, be Mengia es statta in ün chantun e spettaiva.
A la fin ha dit la magistra: "Mengia, vè uossa a provar tia furtüna!" Mengia es ida, e che esa capità? Ella es statta buna da siglir listess bain sco cun sia corda magica. Da là davent faiva eir ella jent
gimnastica.
d'Alena
Parablas