I d'eira üna jada üna stria chi es rivada in üna cità estra. I d'eira güsta mezdi ed üna gronda chalur. Sülla plazza gronda d'eira ün kiosc ingio cha blera glieud cumpraiva glatsch per ün franc. La stria ha tschüf l'aua in bocca, ma ella nu vaiva ingüns raps. Ella vess pudü striunar nan raps per sai, ma visavi d'eira üna banca chantunala e cun quai chi'd es scumandà da far raps sainza permiss eir per üna stria, vaiv'la temma da tils striunar nan. Ed uschè es nossa povra stria statta sper il kiosc cun üna tschera trista.
In quist mumaint es gnü pro ella ün mat chi vaiva nom Fortunat
ed ha dumandà ad ella che chi saja capità ch'ella fa üna
tala tschera. La stria til ha quintà da seis problem culs raps.
Fortunat ha dat ün franc a la stria chi ha subit cumprà ün
glatsch cotschen per sai. Intant ch'ella ha lichà vi da seis glatsch,
tilla ha Fortunat quintà sur da sias difficultats aint illa scoula.
Davo ch'ella es statta a fin cul glatsch, ha'la tut our da sia gialoffa
üna tablina naira. Ella tilla ha dat a Fortunat ed ha dit: "Qua
sülla tablina poust tü leger tuot quai cha tü voust savair.
Quai es mia recumpensa per quist fich bun glatsch cha tü m'hast pajà," ed es svanida per seis fat.
Fortunat es i subit a chasa a provar sia tablina naira. Propcha, tuot las
lezchas pudaiva'l be copchar sainza tillas stuvair imprender! Uossa d'eira
quai bler plü simpel per Fortunat dad ir a scoula. Bainbod d'eira'l
il meglder scolar. El scuttaiva eir tuot las lezchas a seis conscolars.
Eir seis frar chi stübgiaiva a l'università e nu savaiva adüna
tuot gniva suvent pro el. Fortunat pudaiva güdar a tuots sainza difficultats.
Ed uschè esa capità cha'ls scolars nu vaivan plü dad
imprender. Els copchaivan lur lezchas, ma nu savaivan inguotta. Quai d'eira
üna catastrofa.
Üna jada d'inviern es la stria tuornada in cità. Ella ha tscherchà inütilmaing il kiosc cul glatsch. Cha'ls kioscs sun serrats l'inviern, quai nu savaiv'la. Per quai ha'la dumandà al prüm mat sülla via maistra, ingio cha sajan ils kioscs. Il mat ha respus: "Eu nu sa inguotta, eu stögl dumandar a nos Fortunat, el sa nempe tuot. "La stria d'eira üna stria bundriusa ed uschè ha'la dumandà inavant: "Perche nu sast inguotta? Nun imprendast a scoula?" "Ma na, quai es superplü" ha respus il mat, "Fortunat scutta tuot a nus. Nus copchain be las lezchas."
In quist mumaint ha'la chapi che ch'ella ha fat: ella vaiva a tuot ils scolars sülla conscienza! Subit ha'la striunà nan ün franc cuntuot cha quai es scumandà ed es ida pro Fortunat. Ella til ha amo üna jada ingrazchà ed ha dit: "Qua es teis franc e dà'm inavo mia tablina!" Fortunat ha rovà da pudair tgnair la tablina be per sai, ma la stria nun ha permis quai. Da là davent faivan ils scolars lur lezchas svess ed imprendaivan tuot.
d'Alena
Parablas