Unseri Pfyffergrubben und mir (3. Dail)

Carnevale Venezia 2005

Wenn d Harlekin-Grufti en Idee hänn, denn wirds gfärlig und intressant, maischdens no zimmlig dyyr und fir Schnyderen und Larvebauer asträngend. Sonen Idee hämmer vor ebbe zwai Joor gha. Zerschd hämmer e bitz gschbaart, denn hämmer ys emool mit e baar Bilder bi dr Myrtha, dasch unseri Schnydere, agschliche. Die hett zerschd faschd e Luftsprung gmacht, denn hett sy gmaint mer dääte spinne und denn hett sy gfunde das gäb e diggi Sach. Bim Larvemacher Businger in Rünebärg hetts ebbe glyych deent. Unsere Hanspeter Kassier het e Budget gmacht, denn het er verno was es koschdet, denn hets en faschd uff e Rugge bänglet und denn het er dapfer glächlet und zaalt.
Und so het denn die scheenschd Alt Garde vo Weschdeuropa und Greenland usgsee.

Nadyrlig hämmer au wiider mit verschiidene Pfyffergrubbe derfe laufe. Do sin wiider d Znynibigger derbi gsi und die Biirewaiche. Au s IRS het wiider mitgmacht. Dr greenendi Abschluss au vo däre Fasnacht sin wiider die Abverheyte gsi.

Well mer s letschd Joor e bitz digg yne sin, hämer im 2006 wiider e Nullrunde gmacht. Schliesslig hämer bi de Grufti immer non e baar näddi Costym. Do loonts sich scho no, in dr Scharadekischde z grabe. Also hämer halt unseri Häxe fiiregholt.
Nadyrlig hämer au das Joor wiider mit e baar Pfyffergrubbe derfe laufe. Do sin noonem Morgestraich d Znynibigger mit ys zem Zmorge gloffe. Zoobe hets e gmainsami Tour mit de Biirewaiche und de Duschuurli gä. Denn am Zyschdig e diggi Runde mit de Vorstadtgässler. Am Mittwuch Zmidaag isch wiider Konzärt gsi mit em IRS und Zoobe sin denn die Abverheyte wiider bynys gsi, faschd bis zem Ändstraich.

Aber anne 2007 het wiider ebbis miesse go. Dr Herr Obmaa und dr Herr Schryber hän die, bi de Grufti usserordedlig dankbaari, Ufgoob derfen ibernä, e Costym z erfinde. Dasch dorum danggbar, well suschd niemer en Idee hett, aber hindedry faschd alli ebbis z näggele. Vor allem dr Herr Kassier mit synere kreatyve Brämsi, sprich Budget! Het däne Zwai aber iberhaupt kai Ydrugg gmacht. Also hän sy Märlibiecher gschdudiert, als Grossbabbis hän sy gwisst wo me mues Keenig sueche. Alli wänn Keenig sy, aber mir sin se!
Die Zwai sin mit den Entwirf zer Schnydere und zem Larvemacher und alles isch scheen glaar gsi.

Dr Räschde vo dr Clique het usnamswys numme ganz weenig z muule gha. Aber e baar Daag speeter het se dr Herr Kassier welle teere und fäädere, well sy s Budget e glai wunzig bitzli iberzooge hän. Aber an dr Fasnacht sin wiider alli ai Härz und ai Seel gsi.
Drotz zem Dail beesem Wädder isches fir uns non e glungeni Fasnacht worde. Au wiider mit unsere divärse Pfyffergrubbe. Noonem Morgestraich wiider d Znynibigger, denn aschliessend dure Zuefall, hets non e Rindeli mit de Pyranhas gä und Zoobe simmer wiider mit de Biirewaiche underwäggs gsi. Am Zyschdig Zmidaag simmer mit zwai Drummelkolleege vo dr Staine im Glaibasel go rätze und Zoobe sin d Duschuurli ko. Am Mittwuch, wie allewyl s IRS und Zoobe hädde mer d Duschuurli wiider sedde dräffe, wenn mir Riisenesle nit dr Abmarschort

verwäggslet hädde. Aber die Liebe sin ys nit bees gsi und mer hän die versuumte Runde am Bummel noche gholt.
Laider isch die Fasnacht dur e deetligen Unfall iberschaddet worde. E Binggis vo dr VKB isch vomene Waggiswaage iberrollt worde. D Untersuechige hän aber zaigt, ass me niemerem kan e Vorwurf mache. Zwai Maa hän dä Waage bi sim Maneever beglaidet und Alkohol isch au kain im Spiil gsi. Es het denn dert am Barfi e richtigi Gedänggstett ge mit Mimoose, Kerzen und Spiilsache. So noch kenne Laid und Fraid bynand liige.

Er wissed jo, dr lieb Gott strooft amme sofort. Und e Kassier au! Well dr Herr Obmaa und dr Herr Schryber s letschd Joor s Budget iberzooge hän, het dr Herr Kassier fir 2008 e Budget gmacht, wo me nit emool het kennen e Relleli Fasnachtsbändeli kaufe.
Aber well jo drei Daag lang wunderbrächtig Wädder gsi isch, hämer au kenne unser Scheenwäddercostym fiirenä. Nämmlig dr Venezianer. Am Zyschdig simmer denn wiider mit eme Charivari gloffe.
D Stimmig isch vom Ladärnen ynepfyffe bis zem Ändstraich ganz toll gsi. Am Morgestraich hämmer mit em Stamm drei Runde gmacht und aschliessend mit de Znynibigger no aini. Denn Zoobe mit de Biirewaiche e baar rassigi Runde. Am Zyschdig isch wiider Rätzebälle Noomidaag gsi mit unsere Frind vo dr Alte Staine und gly noonem Znacht e glungenen Oobe bis am Morgen am Drei mit de Duschuurli.

Am Mittwuch Nomidaag simmer mit em IRS go gässle und denn wiider noonem Znacht mit de Duschuurli . Bim e Halt anere Stubete, me dänggt nyt beeses, hets däwäg Lym an de Stiel gha, ass mer faschd no zämme dr Ändstraich verbasst hän. Aber fir e Wettstaimarsch vor em Mutz hets no glängt.

S Joor druf, 2009, hämmer gfunde, mer kennte emool e Charivari mache wies jede gärn hät. Asso jedes nimmt oder macht e Costym, wos scho lang emool gärn gha hät. Do hets e baar gä, die hän in dr Charadekischde gwielt und anderi hän sich halt ebbis neys glaischdet. E Waggis, en Alti Dante, e Tschäggädä, e Marie üs em Alsace oder e Nachtwächder…

Pfiffe hets au die Fasnacht wie lätz, drotz Räge!
D Znynibigger sin ko, mit em Stamm simmer flyssig gsi, die Biirewaiche hän ys bsuecht, mit em IRS hämmer konzärtiert und mit de Duschuurli simmer nit nummen im Rägen umme gloffe, s het au wiider e Stubete brucht. Suschd hät ebbis gfäält.